Maliket Iray Mapaabeba
“Say Dios kaingli’to so saray atagey a linawa, et itdan to na gracia so saray mapaabeba.”—1 PEDRO 5:5.
1, 2. Diad Sermon to ed Palandey, panon ya insiglaot nen Jesus so pagmaliw a maliket ed inkamapaabeba?
KASIN say pagmaliw a maliket tan pagmaliw a mapaabeba so mansiglaotan? Diad sankabantogan a sermon to, si Jesu-Kristo, say sankabalgan a toon nambilay ed kapiganman, so manedeskribi ed siameran liket, odino gayaga. (Mateo 5:1-12) Kasin insiglaot nen Jesus so pagmaliw a maliket ed pagmaliw a mapaabeba? On, ontan so ginawa to, lapud say pagmaliw a mapaabeba so nalalanor ed dakel a liket a binitla to. Alimbawa, say sakey a too so kaukolan a magmaliw a mapaabeba pian magmaliw a sinononot ed espiritual a pankaukolan. Say mapaabeba lambengat so naeerasan tan napepegaan na inkatunong. Tan saray mapaatagey so aliwan maoyamo tan aliwan mapangasi, nisay sikaray mareen.
2 Maliket iray mapaabeba lapud maptek tan matua so pagmaliw a mapaabeba. Nagkalalo ni, say mapaabeba so maliket lapud makabat so pagmaliw a mapaabeba; saya so mangiletneg na maabig a siglaotan ed si Jehova a Dios tan ed kaparan Kristianos. Sakey ni, maliket iray totoon mapaabeba lapud sakey a panangibalikas na panangaro ed inkasikara so pagmaliw a mapaabeba.
3. Akin a kakaukolanen itayo na inkamatua a magmaliw a mapaabeba?
3 Akin a sikatayoy kakaukolanen na inkamatua a magmaliw a mapaabeba? Manuna, lapud sikatayon amin so akatawir na ag-inkayadyari tan mantultuloy a nalilingo. Nipaakar ed inkasikato et inkuan nen apostol Pablo: “Amtak a dia ed siak, salanti, dia ed laman ko, angapo so manayam a bengatlan maong: ta wala ed siak so panlabay, bangbalet say pangawa na kaabigan andi.” (Roma 7:18) On, amin tayo so nankasalanan tan agmakaabot ed gloria na Dios. (Roma 3:23) No sikatayoy matua agtayo magmaliw a mapaatagey. Say pangaksobi ed sakey a lingo so mankakaukolan na panagpaabeba, tan say inkamatua so ontulong ed sikatayon awaten so tetel kapiganman a sikatayoy nalingo. Lapud sikatayoy mantultuloy a nalilingo ed gunaet tayon agnalingo, walaan tayo na maong a rason a magmaliw a mapaabeba.
4. Anton kapilitan a rason so inter na 1 Corinto 4:7 para’d pagmaliw tayo a mapaabeba?
4 Iikdan itayo nen apostol Pablo na sakey nin rason no akin a nepeg tayon magmaliw a mapaabeba lapud inkamatua. Kuanto: “Siopa so mangawa ed sika ta pian miduma ka ed arum? Tan anto so wala ed sika ya ag mo naawat? Et no inawat mo, Akin et manpaspasirayew ka a singa ag mo naawat?” (1 Corinto 4:7) Anggapoy suppiat, aliwan sakey ya inkamatua no awaten tayo so gloria ed inkasikatayo, mampaatagey lapud kaykayarian tayo, saray abilidad, odino inaral. Say inkamatua so walaay nagawaan pian nawalaan na maong a konsiensia ed imaton na Dios, pian sikatayoy “manbilay a sigagalang dia ed saray amin a bengatla.”—Hebreos 13:18.
5. Panon ya ontulong met ed sikatayo so pagmaliw tayon matua sano sikatayoy nalingo?
5 Say inkamatua so ontutulong ed sikatayo a magmaliw a mapaabeba sano sikatayoy nalingo. Mas mainomay tayon naaksobi so tetel, imbes ya ikatunongan tayo so inkasikatayo odino ipasa ed arum so pakatetelan. Kanian, anggaman tinetel nen Adan si Eva, si Batseba so agtinetel nen David, diad pangibagan, ‘No sikato komo’y agnanames ed mapalaway. Ag’ak la komon atukso.’ (Genesis 3:12; 2 Samuel; 11:2-4) Talaga met, a nibaga a diad biek a dapag, say pagmaliw a matua so ontulong ed sikatayo a magmaliw a mapaabeba; diad biek a dapag, say pagmaliw a mapaabeba so ontulong ed sikatayon magmaliw a matua.
Say Pananisia ed si Jehova so Ontulong ed Sikatayo a Magmaliw a Mapaabeba
6, 7. Panon tayon tutulongan na pananisia ed Dios pian magmaliw a mapaabeba?
6 Say pananisia ed si Jehova so ontulong met ed sikatayo a magmaliw a mapaabeba. Say pamidbir no panon so kabaleg na Manamalsa, say Sankatalbaan a Soberano, so peteg ya ontulong ed sikatayo pian ag-ipasen so inkasikatayon dili ya importantin tuloy. Agaylan maabig ya ipapanonot ed sikatayo nen propeta Isaias! Diad Isaias 40:15, 22, nabasa tayo: “Nia, saray nacion singa ra sankatedter na sakey a timba, tan nibilang ira a singa melanting a dabok na simbangan. . . . Sikato a manyorong ed tagey na tibukel a dalin, tan saray manayam ed sikato singa ra dondonaron.”
7 Say pananisia ed si Jehova so ontulong met ed sikatayo sano liknaen tayon sikatayoy manasagmak na ag-inkahustisya. Imbes a pampagaan tayo itan a bengatla, sikatayoy mapaabeban manalagar ed si Jehova, singa ipapanonot ed sikatayo na salmista ed Salmo 37:1-3, 8 9. Ontan met so indanet nen apostol Pablo: “Aleg a sikayo a dili so onbales, inararo, no ag ingen itdan na pasen so sanok na Dios: ta nisulat; Siak so akankien na panamales; siak so ontumang naani, kuan na Katawan [Jehova, NW].”—Roma 12:19.
Panagpaabeba—Say Kurang na Kakabatan
8. Akin a say inkamapaabeba so ontutulong pian nawalaan na maong a siglaotan ed si Jehova?
8 Walaray dakel a rason no akin a say pagmaliw a mapaabeba so kurang na kakabatan. Say sakey et say nipanengneng la, satan so ontulong pian nawalaan tayo na maong a siglaotan ed Manamalsa tayo. Malinew ya ibabaga na Salita’y Dios ed Uliran 16:5: “Balang sakey a mapangta ed puso sikato so makapadimla ed Jehova.” Nabasa tayo met ed Uliran 16:18: “Say mapangta onla ed unaan na kabagbag, tan say mapasang ya espiritu ed unaan na kapelag.” Agmanbayag say toon mapaatagey so makasagmak na ermen. Talagan ontan so nepeg a nagawa lapud nabasa tayo ed 1 Pedro 5:5: “Amin yo balkesan yoy inkasikayo na panagpaabeba, a manlilinkoran so sinansakey: ta say Dios kaingli’to so saray atagey a linawa, et itdan to na gracia so saray mapaabeba.” Ontan met a punto so nanengneng mo ed ilustrasyon ya inter nen Jesus nipaakar ed Pariseo tan ed managsingil na buis a parehon manpipikasi. Say mapaabeban managsingil na buis so apaneknekan a lalon matunong.—Lucas 18:9-14.
9. Anto so nitulong na inkamapaabeba diad panaon na kairapan?
9 Say inkamapaabeba so kurang na kakabatan ta lapud panagpaabeba et mas mainomay para’d sikatayo a tumboken so simbawan walad Santiago 4:7: “Ontolok kayo sirin ed Dios.” No sikatayo so mapaabeba, agtayo manrebelde sano aabuloyan nen Jehova a managmak tayo na kairapan. Say inkamapaabeba so ontulong ed sikatayo a magmaliw a kontento ed saray kipapasen tayo tan mansungdo. Say sakey a toon mapaatagey so agkontento, naynay a mankaliktan na nagkalalo ni, tan manrebelde ed mairap iran kipapasen. Diad biek a dapag, say toon mapaabeba so mansusungdo ed saray kairapan tan subsubok, a singa ginawa nen Job. Asagmak nen Job so inkaandian na amin a kayarian tan adapoan na sakey a makapaot-ot a sakit, ta pati say asawa to so nansimbawa ed sikato a manakar ed kurang na panagpaatagey, a kuanto: “Ikaindan mo so Dios, tan ompatey ka!” Panon so inyebat to? Ibabaga ed sikatayo na rekord na Biblia: “Inkuan to ed sikato, Mansalita ka a singa sakey ed saray maatiw a bibii a mansalita. Anto, awaten tayo ta so maong ed lima na Dios, tan ag tayo awaten so mauges? Dia ed saya ya amin ag nangawa si Job na kasalanan ed saray bibil to.” (Job 2:9, 10) Lapud ta si Job so mapaabeba, agto nanrebelde noagta sikakabat a nanpasakup ed antokaman ya inyabuloy nen Jehova a nagawa ed sikato. Tan diad kaunoran, sikato so akaawat na daakan a tumang.—Job 42:10-16; Santiago 5:11.
Say Inkamapaabeba so Ontutulong Pian Nawalaan na Maong a Siglaotan ed Arum
10. Panon a say inkamapaabeba so ontulong ed sikatayon mamaaligwas na siglaotan tayo ed kaparan Kristianos?
10 Say inkamapaabeba so kurang na kakabatan lapud ontutulong iya pian nawalaan tayo na maong a siglaotan ed kapara tayon Kristianos. Maabig so simbawa ed sikatayo nen apostol Pablo: “Angapo’n balot komon so gawaen yo a lapud kasusumpa o panpasirayew, noag dia ed kaabebaan na kalakal balang sinansakey ibilang to so arum a magmaong nen say sikato’n dili. Ag nengnengen na balang sakey ed sikayo so kayarian to’n dili, no ag balang sakey ed sikayo nengnengen to met so saray bengatla’n kayarian na saray arum.” (Filipos 2:3, 4) Say inkamapaabeba so sikakabat ya ontulong ed sikatayo pian agmilaslasan ed arum odino panggunaetan a palumbasan iray arum. Saratan ya awawey ed kanonotan so mamapawala na problema para’d sikatayo tan ed kapara tayon Kristianos.
11. Akin a natulongan itayo na inkamapaabeba pian napaliisan so kalilingo?
11 Dakel a pankanawnawa, a say inkamapaabeba so ontulong ed sikatayo a napaliisan iray kalilingo. Panon ya ontan? Lapud say inkamapaabeba so ontulong ed sikatayo pian agmagmaliw ya alablabas a matalek ed sarili tayo. Imbes, apresyaen tayo so simbawa nen Pablo ed 1 Corinto 10:12: “Kanian say mangisip a manalalagey, imanoen to komon ompan napelag.” Say toon mapaatagey so matalek a tuloy ed inkasikato, kanian sikatoy seguradon nalingo nisesengeg ed saray bengatlan a makaiimpluensya odino lapud dili iran kakapuyan to.
12. Pakiwasen itayo na inkamapaabeba pian nasumpal so anton Makasulatan ya obligasyon?
12 Say inkamapaabeba so ontulong ed sikatayo ya ontumbok ed kakaukolanen ed pagmaliw a manpasakup. Diad Efeso 5:21, sikatayoy nasisimbawa: “Mantotolokan so sakey tan sakey ed sikayo dia ed katatakot ed Cristo.” Tua, agta amin tayo so nakakaukolan a magmaliw a mapasakup? Saray anak so kaukolan a manpasakup ed saray ateng da, saray asawan bibii ed kaasawaan da, tan saray lalaki ed si Kristo. (1 Corinto 11:3; Efeso 5:22; 6:1) Insan, diad antokaman a Kristianon kongregasyon, amin, pati saray ministeryal ya aripen, so kaukolan a manpasakup ed saray mamatatken. Agta tua met a saray mamatatken so manpapasakup ed say matoor ya aripen a klase, nagkalautla ed ilalaman na manangasikaso na sirkito? Insan say manangasikaso na sirkito met so kaukolan a manpasakup ed manangasikaso na distrito, tan say manangasikaso na distrito ed Branch Committee na bansa a ditan so panlilingkoran to. Komusta met iray membro na Branch Committee? Sikaray kaukolan a “mantotolokan [ed] sakey tan sakey” tan ontan met ed Mananguley ya Ulop, a mangilalaman ed matoor tan makabat ya aripen a klase, a sikara met so walaay eebatan ed si Jesus, say nitronon Ari. (Mateo 24:45-47) A singa ed antokaman ya ulop na mamatatken, saray membro na Mananguley ya Ulop so kaukolan a manrespeto ed saray punto-de-bista na arum. Alimbawa, ompan isipen na sakey a sikatoy walaan na maabig ya ideya. Balet nilikud ed magenap a bilang na arum a membron miabobon ed suhestion to, kaukolan a sikatoy agla mapaga nipaakar ed saman a pamaakaran. Peteg, amin tayo so kaukolan a manpaabeba, ta amin tayo so manpasakup.
13, 14. (a) Diad anton nikadkaduman kipapasen a tulongan itayo na inkamapaabeba? (b) Anton alimbawa so impanengneng nen Pedro no nipaakar ed panangawat na simbawa?
13 Nagkalautlan nanengneng a say inkamapaabeba so kurang na kakabatan lapud say inkamapaabeba so mamainomay para’d sikatayon mangawat ed simbawa tan disiplina. Balang sakey ed sikatayo so mankakaukolan na disiplina ed tunggal paminsan, tan nepeg tayon tumboken so simbawa ed Uliran 19:20: “Denglen mo so simbawa, tan awaten mo so panangibangat, pian onkabat ka, ed kaunaran a kasampotan mo.” Singa ed impangibalikas, saray mapaabeba so agnasasakitan odino naermenan sano nadidisiplina. Sakey ni, si apostol Pablo, diad Hebreos 12:4-11, so manisimbawa ed sikatayo nipaakar ed kakabatan na mapaabeban panagpasakup ed disiplina. Diad saya lambengat a paraan a makapanilalo tayo a say kurang tayo ed arapen so walaan na kakabatan tan nagamoran so langkap a bilay ya andi-anggaan. Agaylan makapaliket a pansumpalan itan!
14 Nipaakar ed saya, nayarin saglawien tayo so alimbawa nen apostol Pedro. Sikatoy angawat na seryoson simbawa manlapud si apostol Pablo a singa naamtaan tayo manlapud salaysay na Galacia 2:14: “Balet sanen anengneng ko ya ag ira manaakar a maptek onong ed katuaan na evangelio, inkuan to ed Cefas [Pedro] ed arap da a lapag, No sika, anta Judio ka, manbibilay ka’n singa saray Gentiles, tan aliwa’n singa saray Judio, akin a papasooten mo so saray Gentiles a manjudio.” Kasin naopendi si apostol Pedro? No bilbilang ta naopendi, satan so agnambayag, unong ta natalosan tayo ed impanukoy to ed bandad unor ya “inararo ya agi tayo a Pablo” ed 2 Pedro 3:15, 16.
15. Anto so siglaotan na pagmaliw tayo a mapaabeba tan say pagmaliw tayo a maliket?
15 Wadtan met so pamaakaran na pagmaliw a dilin-supisiente, kontento. Talagan agtayo makapanliket nilikud no sikatayoy kontento ed bilay tayo, ed saray pribilihyo tayo, ed saray bendisyon tayo. Saray mapaabeban Kristiano so walaan na onian awawey: “No satan so iyabuloy na Dios, nayarian ko itan,” a satan so talagan ibabaga nen apostol Pablo, a singa nabasa tayo ed 1 Corinto 10:13: “Ag kayo asabian na bengatla’n katotokso no ag samay nitepel na ami to-o: bangbalet say Dios matoor, ta ag to kayo paulian a natokso na onlabas ed nayarian yo; no ag ingen pati tokso, mangawa met na dalan a paliisan, ta pian nayarian yo ya itepel.” Kanian nanengneng tayo lamet no panon a say inkamapaabeba et kurang na kakabatan, lapud tutulongan to itayo a magmaliw a maliket ed antokaman a kipapasen tayo.
Say Aro so Ontulong ed Sikatayo a Magmaliw a Mapaabeba
16, 17. (a) Anton alimbawa ed Kasulatan so mangipapabitar ed sankabalegan a kalidad ya ontulong ed sikatayo pian magmaliw a mapaabeba? (b) Anton sekular ya alimbawa so mangiyilustra met ed sayan punto?
16 Nagkalalo nen antokaman, say agsinisiblet ya aro, say a·gaʹpe, so ontulong ed sikatayo a magmaliw a mapaabeba. Akin ya ayarian nen Jesus a sinungdoan a walaay inkamapaabeba so asagmak to ed panamairapan a kiew ya ireretrato nen Pablo ed saray taga Filipos? (Filipos 2:5-8) Akin ya agto inisip so pagmaliw a kapara na Dios? Lapud, singa inkuanton mismo: “Inarok so Ama.” (Juan 14:31) Sikato no akin a diad amin a pankanawnawa et impaarap to so gloria tan galang ed si Jehova, say mangatatawen ya Ama to. Kanian, diad sakey nin pankanawnawa et indanet to a say mangatatawen lambengat ya Ama to so maong.—Lucas 18:18, 19.
17 Mangiyilustra ed sayan punto so sakey ya agawa ed bilay na sakey ed asakbay iran manag-anlong na Amerika, si John Greenleaf Whittier. Sayan laki so walaan na inaro sanen sikatoy katayatdang ni, tan aminsan diad sakey a laslasan ed ispeling, duga so impanispel to (say marikit) ed sakey a salita, balet aliwa so impanispel to (nen Whittier) ed saman. Masyadoy sakit na linawa na marikit nipaakar ed satan. Akin? Unong a nanonotan ni na manag-anlong, inkuanto (na marikit): “Kaermenan kon duga so impanispel ko’d saman a salita. Agko labay a napalumbasan ta ka . . . Lapud amtam, inararo taka.” On, no inaro tayo so sakey, labay tayon satan a sakey et mas atagey nen sikatayo, lapud say aro et mapaabeba.
18. Say inkamapaabeba so ontutulong ed sikatayo a tumboken so anton simbawa na Kasulatan?
18 Saya so maabig a leksion para’d amin a Kristiano, lalo la ed agagin lalaki. Sano nipaakar ed sakey a nikadkaduman pribilihyo ed panaglingkor, pangayagaan tayo ta no say agi tayo so akaawat ed satan imbes a sikatayo, odino sikatayo ta’y manlikna na samet a pangimon tan panibeg? No talagan inaro tayo so agi tayo, pangayagaan tayo a naala to iman a nikadkaduman asainmin odino rekognisyon odino pribilihyo ed panaglingkor. On, say inkamapaabeba so mamainomay ed panumbok na simbawan: “Dia ed galang manpapalabian kayo.” (Roma 12:10) Diad sakey nin patalos et nabasa tayo: “Manpapagalangan ed balang sinansakey a nagkalalo nen say inkasikayo.” (New International Version) Tan lamet, sikatayoy sisimbawaen nen apostol Pablo: “Lapu ed aro magmaliw kayo ya ariripey sakey tan sakey.” (Galacia 5:13) On, no walaan itayoy aro, sikatayo so maliket a manlingkor ed agagi tayo, manpaaripen ed sikara, ya iyuna iray interes da tan pankaabigan da nen say sikatayo, a mankakaukolan na inkamapaabeba. Say inkamapaabeba so ontulong met ed sikatayo pian agmanpasirayew tan diad ontan et naarawian so panagyat ed arum na espirituy pangimon odino panibeg. Insulat nen Pablo a say aro “ag to ipasirayew so inkasikato, aliwa’n mapangta.” Akin ya andi? Lapud say motibo ed beneg na panagpasirayew tan pampangta et inkasiblet, makasarili, bangta say aro so mismon segek na agkasibletan.—1 Corinto 13:4.
19. Antoran alimbawa ed Biblia so mangipapanengneng a say inkamapaabeba tan panangaro so mantekep, no panon a mantekep so panagpaatagey tan siblet?
19 Say siglaotan nen David ed si Arin Saul tan ed anak to a si Jonatan so sakey a matalongaring ya alimbawa no panon a mantekep so panangaro tan inkamapaabeba tan no panon a mantekep met so panagpaatagey tan siblet. Lapud saray intalona nen David ed bakal, saray bibiin Israelita so nankanta: “Si Saul pinatey to so saray libolibo to, tan si David so saray samplo a libolibo to.” (1 Samuel 18:7) Lapud aliwan mapaabeba, noagta, alabas a mapaatagey, nanlapulad saman et ingagaem nen Saul a pateyen si David. Duman tuloy iya ed espiritu na ilalak ton si Jonatan! Nabasa tayon inaro nen Jonatan si David a singa ed dilin kamarerwa to. (1 Samuel 18:1) Kanian panon so inkiwas nen Jonatan sanen, diad kasumpalan na saray ebento et nipalinew a bebendisyonan nen Jehova si David tan sikato, aliwan si Jonatan, so onsublay ed si Saul bilang ari na Israel. Kasin nanimon odino inmibeg si Jonatan? Andin balot! Lapud baleg a panangaro to ed si David, nayarian to ni ingen ya ibaga, unong a nabasa tayo ed 1 Samuel 23:17: “Agka antakot; ta say lima nen Saul ya amak agto ka naromog; et sika so man-ari ed Israel, tan siak so saginonor ed sika; et natan met si Saul ya amak amta to.” Say baleg a panangaro nen Jonatan ed si David so anagdag ed sikaton mapaabeban awaten so atalosan ton linawa na Dios no nipaakar ed no siopa so onsublay ed ama to bilang ari na Israel.
20. Panon ya impanengneng nen Jesus so maapit a siglaotan na panangaro tan inkamapaabeba?
20 Say sakey nin mangidadanet ed siglaotan na panangaro tan panagpaabeba et samay agawa ed kaunoran a labi nen Jesu-Kristo a kaiba iray apostol to sakbay na impatey to. Diad Juan 13:1, nabasa tayo a si Jesus, “bangta inaro to so saray totoo to ya wala ed mundo, inaro to ra anga ed kasampotan.” Kayari na satan, nabasa tayo ya inurasan nen Jesus so sali na apostoles to, a kinmiwas bilang sakey a pakaskasin igaganggan. Agaylan mabiskeg a leksion ed inkamapaabeba!—Juan 13:1-11.
21. Bilang sumarya, akin a sikatayo so nepeg a magmaliw a mapaabeba?
21 On, walaray dakel a rason pian sikatayoy magmaliw a mapaabeba. Satan so maptek, matuan bengatla ed pagmaliw a mapaabeba. Saya so kurang na pananisia. Ontutulong iya pian nawalaan na maong a siglaotan ed Jehova a Dios tan ed saray kapananisiaan tayo. Satan so kurang na kakabatan. Manuna ed amin, saya so kurang na panangaro tan mangitatarok na tuan liket.
Panon so Pangebat Mo?
◻ Diad antoran paraan a sakey a baleg a tulong so inkamatua ed pagmaliw a mapaabeba?
◻ Akin a say pananisia ed si Jehova so makatulong ed sikatayon magmaliw a mapaabeba?
◻ Anto so mangipapanengneng a say pagmaliw a mapaabeba so kurang na kakabatan?
◻ Akin a say panangaro so nagkalalon makatulong ed sikatayo ed pagmaliw a mapaabeba?
[Litrato ed pahina 21]
Sipapaabeban nanpasakup si Job ed si Jehova. Agto ‘inayew so Dios tan inatey’
[Litrato ed pahina 23]
Sipapaabeban nampasakup si Pedro sanen sikatoy sinimbawa nen Pablo diad imaton na lapag