Panon Mon Nipanengneng so Tuan Inkamapaabeba?

SAY tuan inkamapaabeba so walaan na baleg a kablian ed imaton na Dios. Insulat nen Santiago: “Say Dios sumpaen to so atagey a linawa, bangbalet mangiter na grasya ed mauyamo.” (Santiago 4:6) Dia et nayarin tutukoyen nen Santiago so pigaran kanonotan a nibalikas diad Hebreon Kasulatan. “Anggan si Jehova et atagey wala so panangimano to ed makabos a too: bangbalet say mankinon kabat to ya anggan wala ed arawi.” “Saray malangas a kanenengneng na too napaabeba, tan say karangalan na totoo nipadakmomo, et si Jehova lambengat sikato naani napaatagey.” “Petepeteg a sikato [Dios] ludlureyen to so saray managludlurey; balet mangiter na palabo ed mapaabeba.”​—Salmo 138:6; Isaias 2:11; Uliran 3:34.

Impaseseg met nen apostol Pedro so inkamapaabeba. Insulat to: “Amin yo balkesan yoy inkasikayo na panagpaabeba, a manlilingkoran so sinansakey: ta say Dios kaingli’to so saray atatagey a linawa, et itdan to na grasya so saray mapaabeba.”​—1 Pedro 5:5.

Alimbawa nen Kristo ed Inkamapaabeba

Nayarin itepet mo, Antoy birtud odino gungguna ed inkamapaabeba? Parad toon manggugunaet a magmaliw a tuan Kristiano, say ebat so makana​—say pagmaliw a mapaabeba et pagmaliw a singa si Kristo. Impanengneng nen Jesus so inkamapaabeba to diad impangawat toy nikadkaduman asainmin ya onla’d dalin manlapud mangatatawen ya ayaman tan magmaliw a too, ya abebbeba nen saray anghel. (Hebreos 2:7) Anggaman Anak na Dios, sinungdoan toray panagpabanday ya imbunton ed sikato na saray relihyoson kakabusol to. Nansiansian kalmado legay kabibista to, anggaman sarag to komoy patulongan ed saray armada na angheles.​—Mateo 26:53.

Kaunoran, imbitin si Jesus ed makapabanday a panamairapan a kiew, ingen nansiansian matoor ed si Ama to. Kanian, nayarian nen Pablo ya isulat nipaakar ed sikato. “Yatol yo so sayan kalakal ed sikayo, a wala met nensaman ed Kristo Jesus; a bangta sikatoy wala ed ereng na Dios, agto imbilang a say inkaparpara to ed Dios sakey a bengatlan bebembenan to nensaman. Noag ingen nilukpos to so inkasikato, ya inala to so ereng na sakey ya aripen, ya agawan kaulibay na saray totoo; tan bangta aromog a singa nengneng na sakey a too, nanpaabeba a nagmaliw a matulok ya anggad say ipapatey, on, say ipapatey ed krus [“panamairapan a kiew,” NW].”​—Filipos 2:5-8.

Panon tayo sirin a nipatnag so tuan inkamapaabeba? Diad praktikal iran situasyon, panon itayon onkiwas a mapaabeba imbes a mankinon?

No Panoy Ikiwas na Mapaabeban Too

Konsideraen tayo pay inkamapaabeba diad eksenay trabaho, balanglan diad pantratrabahoan odino diad Kristianon serbisyo. Ta pian nagawaan a matalona so kimey, ompan nakaukolan iray manangasikaso, manedyer, tan superbaysor. Sakey a kaukolan a mandesisyon. Panoy ikiwas mo? Kasin ikatunongan mo, “Antoy debir ton mangimanday gawaen ko? Mas abayag ak la’d sayan trabaho nen say sikato.” On, no mapaatagey ka, onsyodot ka’d panpasakop. Diad biek a dapag, say mapaabeban too et panggunaetan ton ‘anggapon balot so gawaen a lapud kasusumpa o panpasirayew, noag dia ed kaabebaan na kalakal balang sinansakey ibilang to so arum a magmaong.’​—Filipos 2:3.

Panoy ikiwas mo sano angisuheri so mas ugaw ni nen say sika odino sakey a bii? No mapaabeba ka, anggan panon et ikonsideram itan. No mapaatagey ka, panimbelan mo itan odino ipulisay mon tampol. Kasin lablabayen moy pairayrayew tan palaroglarogan a mansumpal ed kaderal mo odino say makapaalagey a konseho parad kapabiskeg mo?​—Uliran 27:9; 29:5.

Kasin makapantepel ka? Say inkamapaabeba so mamasarag ed sikan arapen iray mairap a sirkumstansia tan anosan, a singa ginawa nen Job. No mankinon ka, nadismaya ka tan nayarin manrebeldi diad mairap iran sirkumstansia tan ipapasen iran makaopendi.​—Job 1:22; 2:10; 27:2-5.

Maaro tan Manamerdona so Inkamapaabeba

Arum a totoo so mairap a mangibagay, “Pasensia la. Alingo ak. Duga ka.” Akin? Lapud masyadon kinon! Ingen, mabetbet lan say masimoon ya ikerew na despensa et mamatundan tampol ed balingaay sanasawa.

Kasin mabulos kan mamerdona sano naopendi ka na sakey? Odino, lapud kinon mo et eem-eman moy barong, anganko et diad loob la na pigaran agew odino bulan, ya agmo labay so mitongtong ed ipapasen mon angopendi? Kasin panggunaetan moy ombales pian makabawi? Dakel lan totoo so inaatey lapud ibabales. Diad arum, say panagpauges so sakey a metodo. Diad kasunian, maaro tan manamerdona so mapaabeban too. Akin? Lapud say aro so agmanisip na mauges. Mabulos si Jehova a mamerdona ed saray Israelita no ontunda ra’d inkakinon da. Say mapaabeban patumbok nen Jesus so mabulos a mamerdona, anggan paulit-ulit!​—Joel 2:12-14; Mateo 18:21, 22; 1 Corinto 13:5.

Say mapaabeban too ‘[idaulo toy] pangipanengneng na pampapagalangan.’ (Roma 12:10) Onia so nabasa ed New International Version: “Manpapagalangan kayo a nagkalalo nen say sikayo.” Kasin irarayew moy arum tan aapresiaen iray abilidad tan dunong da? Odino lawas kan manaanap na depekto pian deralen so reputasyon da? On, kasin sarag moy masimoon a pangirayew ed arum a totoo? No naiirapan ka ed sayan pamaakaran, anganko et say agmo inkakompiyansa tan kinon so problemam.

Say mankinon a too so agmakankaanos. Say mapaabeban too so maanos tan walaay andukey a panagtepel. Komusta ka balet? Kasin ipasen mon abaingan ka ed antokaman ya atebek mon agmaabig a tratamento? Say ontan a reaksion so kasunian na pagmaliw ya andukey a panagtepel. No mapaabeba ka, aliwan atagtagey so pangipasen mo’d inkasika. Nonoten pay agawa sanen masyadoy impangipasen na saray babangatan nen Jesus ed inkasikara​—nansisiblangan da no siopay sankaimportantian. Alingwanan dan sikaran amin et ‘ariripen ya andi-kakanaan’!​—Lucas 17:10; 22:24; Marcos 10:35-37, 41.

Deneskribe nen Pranses a managsulat a si Voltaire so inkamapaabeba bilang “kapaabebaan . . . say remedyo ed kinon.” On, say inkamapaabeba et kaabebaan na nonot. Say mapaabeban too et walaay kapaabebaan ed espiritu, agmankinon. Sikatoy marespeton tuloy tan magalang.

Kanian akin a panggunaetan so pagmaliw a mapaabeba? Lapud say inkamapaabeba so aabobonan na Dios tan ontutulong ed sikatayon nagamoran so madibinon panangigiya. Lapud inkamapaabeba nen Daniel, impasen nen Jehova so propeta a sakey a ‘kalkaliktan’ tan angibaki na anghel ed sikato diad sakey a pasingawey! (Daniel 9:23; 10:11, 19) Mangitarok na dakel a tumang so inkamapaabeba. Mangitarok itan na tuan kakaaro a mangaro ed sika. Mas importanti, mangitarok na bendision nen Jehova. “Say tumang na kauyamoan tan say takot ed Jehova sikato so saray kayamanan, tan dayew, tan bilay.”​—Uliran 22:4.

[Litrato ed pahina 7]

Say mapaabeban ikerew na despensa et palemewen toy bilay