PINAGKATEMAN ARTIKULO: NO ANTOY NAARALAN TAYOD SI MOISES
Siopa si Moises?
Antoy tampol ya naiisip mo no narengel moy ngaran a Moises? Kasin naiisip moy . . .
sakey ya ugaw ya inlugan nen nanay tod sakey ya baskit diad Ilog Nilo?
sakey ya ugaw ya pinabaleg na mayaman ya anak a bii na Faraon—balet ta agto nilingwanan a sikatoy sakey ya Israelita?
lakin nambilay bilang pastol ed Midian diad loob na 40 taon?
toon akitongtong ed si Jehovaa diad arap na mandarlang ya kiew?
lakin makpel ya inmarap ed ari na Ehipto tan makpel ton kinerew a nibulos iray Israelita?
lakin ingganggan na Dios pian ipakabat so onsabin Samploran Salot ed Ehipto nen ag-inunor na ari da so tuan Dios?
lakin angidaulod saray Israelita ya ompaway ed Ehipto?
lakin inusar na Dios ya amaldua ed Ambalangan Dayat?
lakin angiter ed saray Israelita na Samploran Ganggan ya nanlapud Dios?
PIGARA labat iraya ed saray naeksperiensya nen Moises. Agla sirin pankelawan no akin ya sayan matoor a laki et rerespetoen a maong na saray Kristiano, anggan saray Judio tan Muslim!
Segurado tayon si Moises et sakey a propetan ‘akapanggawa na makapataktakot iran bengatla.’ (Deuteronomio 34:10-12, Maung a Balita) Inabuloyan ton sikatoy usaren na Dios a manggawa na makapanyari iran bengatla. Balet ta ordinaryon too labat si Moises. Singa si propetan Elias, si Moises et “walaan na liknaan a singa sikatayo.” (Santiago 5:17) Sikatoy walaan met na saray probleman singa ed sikatayo, balet ta asarag to iratan ya amin.
Labay mo ’tan naamtaan no panon ton agawaan itan? Pantongtongan tayo so talorad saray balibalin ugali nen Moises tan nengnengen tayo no antoy naaralan tayod alimbawa to.
a Ibabaga na Biblia a say ngaran na Dios et Jehova.