‘Anggapo so Kigapolan’ Parad Saramay Mangaaro ed si Jehova

1. Panon ya iyiilustra na sakey ya bumabatik so determinasyon tayon ag-onsuko?

TINEDYER ni labat si Mary Decker, sikatoy kabkabat lan maples a bumabatik. Nen 1984 Summer Olympics, sikato so iilaloan ya manalo na gold medal ed 3,000-meter final. Balet, sikatoy ag-akasabid finish line. Sikatoy apatir na kalumba to tan nipasubsob. Manak-akis dan inalsa tan adismayan maong. Ingen, agsinmuko si Mary. Anggapo ni sakey taon, akilumba lamet ed 1.6 kilometer race tan akagaway balon world record nen 1985.

2. Akin ya nibagan milulumba iray tuan Kristiano, tan antoy kaukolan ya gagala tayo?

² Bilang Kristiano, milulumba itayo ed simbolikon paraan. Kaukolan a say gagala tayo et manalo. Balet aliwa iyan papelesan odino pataypatay ya kababatik. Imbes, singa iya marathon ya kaukolay anos pian manalo. Inusar nen apostol Pablo so alimbawa na sakey ya milulumba sanen sinulat to ray Kristiano ed Corinto, syudad ya kabkabat ed kompetisyon na saray atleta. Oniay insulat to: “Agyo ta amta a saray milulumba ed batik et ombabatik iran amin, balet saksakey so makaawat na premyo? Ombatik kayo ta pian naawat yo itan.”—1 Cor. 9:24.

3. Akin ya amin a milad lumba et nayarin makaawat na bilay ya andi-angga?

³ Ibabaga na Biblia ya mila itayo ed sayan simbolikon lumba. (Basaen so 1 Corinto 9:25-27.) Say premyo et bilay ya andi-angga diad tawen parad saray alanaan ya Kristiano tan diad dalin parad saray arum ya kaibad lumba. Aliwan singa ed maslak ya kompetisyon na saray atleta, makaawat na premyo so amin ya mila tan mansungdo anggad anggaan. (Mat. 24:13) Natalo labat iray kaibad lumba no agda unorey totontonen odino ag-ira makasabid finish line. Sakey ni, saya labat ya lumba so mangiiter na premyon bilay ya andi-angga.

4. Akin ya aliwan mainomay so milumba parad bilay ya andi-angga?

⁴ Aliwan mainomay so makasabid finish line. Kaukolay disiplina tan determinasyon. Saksakey labat so toon akasabid finish line ya agbalot nigapol, si Jesu-Kristo. Balet insulat na disipulo ton si Santiago ya saray papatumbok nen Kristo et naynay a “napatir odino natumba.” (Sant. 3:2, ftn.) On, aliwa itayon perpekto kanian no maminsan et napatir, ontantan, odino onkapuy itayo. Ompan natumba tayo ni ingen; balet onaalagey itayo tan itutuloy tayoy babatiken tayo. Wala ray grabe impakatumba da tan kaukolan day tulong pian makabangon tan nituloy day milumba anggad finish line. Posible sirin ya nigapol odino natumba itayo, sagpaminsan o maminpiga ni ingen.—1 Ara. 8:46.

NO NATUMBA KA, AGKA ONSUSUKO

5, 6. (a) Akin ya ‘anggapon balot so kigapolan’ parad sakey a Kristiano, tan antoy makatulong pian ‘makabangon’? (b) Akin ya wala ray aglan balot akabangon?

⁵ Nayarin inusar mo lay salitan “natumba” tan “niparukol” pian deskribien so espiritualidad na sakey. Sarayan salita ed Biblia et nayarin usaren ya parehoy kabaliksan, balet aliwan naynay ya ontan. Singa bilang, imanoen iray salitan inusar ed sakey ya bersikulod Biblia: “Say matunong et maminpiton natumba, tan seguradon ombangon; balet saray mauges et niparukol diad kairapan.”—Pro. 24:16, NW.

⁶ Ag-iyabuloy nen Jehova a saramay manmamatalek ed sikato et natumba odino niparukol lapud problema odino kasalanan, ya anggad agla ran balot makabangon. Seguradon tulongan itayo nen Jehova ya “ombangon,” lapud amta ton sikatoy inaro tayo. Duma balet iray mauges. Agda labay so patulongan ed masanton espiritu na Dios tan ed saray lingkor to. Diad saraman balet so ‘mangaaro ed ganggan nen Jehova,’ anggapon balot so kigapolan ya permanentin makapatunda ed sikara diad lumba parad bilay.—Basaen so Salmo 119:165.

7, 8. Antoy nepeg a gawaen na sakey pian anggan “natumba” et siansian abobonan na Dios?

⁷ Wala ray akagawa na angkelag iran kasalanan, aminpiga ni ingen lapud saray kakapuyan da. Balet matunong ni ran siansian ed arap nen Jehova no “ombangon” ira panamegley na impapuson pagbabawi tan panggawa na duga. Napaneknekan tayo itan ed samay impideneng na Dios ed Israel nensaman. (Isa. 41:9, 10) Diad Proverbio 24:16, aliwan say ‘pakatumba’ so indanet, noagta say ‘ibangon’ diad tulong na mapangasin Dios tayo. (Basaen so Isaias 55:7.) Maaro itayon papasesegen nen Jehova a Dios tan nen Jesu-Kristo ya “ombangon.”—Sal. 86:5; Juan 5:19.

⁸ Anggano natumba odino niparukol so sakey ya kaibad marathon, sarag toy ombangon a tampol tan ontuloy anggad finish line. Diad pilulumba tayo parad bilay ya andi-angga, agtayo amta so “agew tan oras” na pakasumpal na satan. (Mat. 24:36) Balet, no agtayo main-inomay a natumba, napansiansia tayoy peles tayo, makapantultuloy itayo, tan makasabi tayod finish line. Antoy gawaen tayo sirin pian agnatumba?

PAKAGAPOLAN YA MANGAMPER ED IYAALIGWAS

9. Anto ran pakagapolan so pantongtongan tayo?

⁹ Pantongtongan tayo so limaran pakagapolan—saray personal a kakapuyan, saray pilalek na laman, ag-inkahustisya ya ginawa na kaagian, kairapan odino panamasegsegang, tan ag-inkaperpekto na arum. Balet tandaan ya anggano nigapol itayo, maan-anos si Jehova. Agto itayo bastabasta ipasen ya agmatoor.

10, 11. Antoy kakapuyan nen David?

¹⁰ Saray personal a kakapuyan et niyaliling ed saray baton atakatak ed pambabatikan. No nengnengen tayoy istoryay bilay nen Arin David tan apostol Pedro, walay duaran sankaimanon kakapuyan da—say agpakakontrol ed sarili tan takot ed too.

¹¹ Nairapan si David ya mangontrol ed sarili to, singa diad samay ginawa tod si Bat-sheba. Tan sanen ininsulto nen Nabal, bengatbengat lawarin kinmiwas. Agto akontrol so sarili to, balet agbalot sinmuko pian napaliket toy Jehova. Diad tulong na arum, apapawil toy relasyon tod si Jehova.—1 Sam. 25:5-13, 32, 33; 2 Sam. 12:1-13.

12. Panon ya akapansiansia ed lumba si Pedro anggano nigapol?

¹² Tinmakot ed too si Pedro kanian aminpigan nigapol, balet nansiansian matoor ed si Jehova tan Jesus. Alimbawa, imburi toy Katawan to, aliwa labat ya aminsan noagta amitlo. (Luc. 22:54-62) Insan nen kien, aliway impantrato tod saray agagin Gentil lapud impasen to ran mas abeba nen saray asegat ya Judion Kristiano. Balet dumay panmoria nen Pablo—nepeg ya anggapoy panangidumaduma ed kongregasyon. Sakbay ya naimpluensyaan nen Pedro iray agagi, arap-arapan ya sinimbawa nen Pablo si Pedro. (Gal. 2:11-14) Kasin asakitan si Pedro tan tinmunda la? Andi. Inawat toy simbawa nen Pablo, inyaplika to, tan nansiansia ed lumba parad bilay.

13. Panon a pakapuyen na problemad bunigas so espiritualidad na sakey?

¹³ No maminsan, say sengegan na personal a kakapuyan et say problemad bunigas. Posiblin mangamper iyad iyaaligwas ed espiritual na sakey ya anggad onkapuy la. Singa bilang, awalaan na graben sakit so sakey ya sister ed Japan 17 taon kayari impanbautismo to. Insentro toy imano tod pampatambal ya anggad kinmapuy ed espiritual tan nagmaliw ya inaktibo. Sikatoy binisita na duaran elder. Lapud apaseseg ed maaron impitongtong da, akiaral lamet. Inkuan to: “Akaakis ak sanen maar-aro da ak ya kinomusta.” Natan et sikato lay aktibo ed lumba parad bilay.

14, 15. Antoy nepeg ya gawaen no walay onlesan mauges ya pilalek? Mangiter na alimbawa.

¹⁴ Saray pilalek na laman so akagapolan na dakel. No nasasagyat tayo ed saratan, kaukolan ya determinado itayon onkiwas a mansiansian malinis ed mental, moral, tan espiritual. Agtayo lilingwanan imay simbawa nen Jesus ya piguratibon “ibantak” so antokaman ya sengegay pankasalanan tayo, anggan say mata o lima tayo. Agta kaibad satan iray imoral ya kanonotan tan kiwas ya amatunda ed arum diad lumba parad bilay?—Basaen so Mateo 5:29, 30.

¹⁵ Insulat na sakey a brother ya binmaleg a Kristiano ya agaylay irap ton nilabanay homoseksual ya tendensia to. Inkuan to: “Agko natatalosay sarilik. Singa agko antay lugaran ko.” Nen 20 años to, sikatoy nan-regular payunir tan aturon ministeryal a lingkor ed kongregasyon. Balet akapankasalanan tan adisiplina, ingen inawat toy tulong na saray elder. Panamegley na pikakasi, impanaral ed Salita na Dios, tan impangisentro toy imano tod itulong ed arum, sikatoy akabangon tan inmaligwas lamet ed espiritual. Kalabas na pigaran taon, inamin to: “Pawilpawil nin siansia man ya liknaan, balet ta lalabanan ko. Naaralan kon ag-iyabuloy nen Jehova ya nipaarap ak ed tukson agko nasarag. Antak ya walay talek Ton nalabanan ko iya.” Oniay konklusyon to: “Amin ya sagpot ko et nabendisyonan diad balon mundo. Satan so pitalaran ko! Kanian, agak onsuko.” Sikatoy determinadon mansiansia ed lumba parad bilay.

16, 17. (a) Antoy akatulong ed sakey ya brother a say amta to et abiktima na ag-inkahustisya? (b) Pian agnigapol, antoy nepeg ya akasentroay imano tayo?

¹⁶ Say ag-inkahustisya ya ginawa na kaagian so sakey nin pakagapolan. Diad France, inisip na sakey ya datin elder ya sikatoy biktima na ag-inkahustisya kanian binmarong. Tinmunda lan akiaral tan nagmaliw ya inaktibo. Sikatoy binisita na duaran elder tan dinengel dan amin so imbaga to, ag-iran balot sinmalet legan ton ibebesngaw so liknaan to. Pinaseseg dan ipasakbat tod si Jehova iray kapagaan to, tan indanet dan say sankaimportantian et say pamaliket ed Dios. Dinengel toy simbawa ra tan ag-abayag et pinmawil ed lumba parad bilay. Sikatoy aktibo lamet ed kongregasyon.

¹⁷ Nepeg ya isentro na amin ya Kristiano so imano ra ed Ulo na kongregasyon, si Jesu-Kristo, aliwan diad agperpekton totoo. Lapud saray mata nen Jesus et “singa mandarlang ya apoy,” asimbang so panmoria tod amin a bengatla, aliwan singa sikatayo. (Apo. 1:13-16) Alimbawa, nibiig to no duga odino aliway panmoria tayod saray ipapasen tayon ag-inkahustisya. Seguradon asikasoen nen Jesus iray pankaukolan na kongregasyon diad dugan panaon. Kanian, agtayo komon aabuloyan so ginawa o desisyon na saray kaagian tayo ya mangigapol ed sikatayo.

18. Panon tayon nasungdoan iray subok odino mairap ya kipapasen?

¹⁸ Say duara nin pakagapolan et say kairapan odino panamasegsegang, tan say ag-inkaperpekto na arum ed kongregasyon. Diad samay parabolo nen Jesus nipaakar ed managtanem, imbaga ton say “kairapan odino panamasegsegang” et pakagapolan na arum. Antokaman so sengegan na panamasegsegang—pamilya, kakaabay, odino gobierno—maininomay ya nigapol so sakey ya “aglinmamut” so katuaan ed puso to. (Mat. 13:21) Balet, no pansiansiaen tayon duga so motibo na puso tayo, tulongan itayo na mensahe na Panarian pian ombiskeg so pananisia tayo. Sano nasusubok, impapuson dalepdepen iray “bengatlan makapadinayew.” (Basaen so Filipos 4:6-9.) Diad tulong nen Jehova, nasungdoan tayo ray subok tan ag-itayo nigapol na mairap iran kipapasen.

19. No walay akaopendid sikatayo, antoy gawaen tayo pian ag-itayo nigapol?

¹⁹ Makapaermen, diad apalabas iran taon et wala ray tinmundad lumba lapud ag-inkaperpekto na arum. Nigapol ira lapud agnaawat na konsiensia ra so gagawaen na arum. (1 Cor. 8:12, 13) No walay akaopendi ed sikatayo, kasin pabalegen tayo itan? Bibilinen na Biblia iray Kristiano ya mamerdona, agmanguukom, tan paliisay pangipilit ed personal ya panlabayan. (Luc. 6:37) No nipaarap kad ontan ya situasyon, tepetan moy sarilim: ‘Kasin uukomen koy arum base ed sarilin panmoriak? Anggano antak lan agperpekto iray agagi, kasin abuloyan ko itan ya mamatundad siak diad lumba parad bilay?’ Say panangaro ed si Jehova so ontulong ed sikatayon makasabid finish line, antokaman so gawaen na arum ya makapangigapol ed sikatayo.

ANOSAY OMBATIK—PALIISAY PAKAGAPOLAN

20, 21. Antoy determinasyon mod pilulumbam parad bilay?

²⁰ Kasin determinadom a ‘sumpalen so pambabatik’ mo? (2 Tim. 4:7, 8) Sirin, importante so personal a panagaral. Usar moy Biblia tan saray publikasyon tayo diad pan-research, pandalepdep, tan pangibiig ed saray posiblin pakagapolan. Kerew moy tulong na masanton espiritu pian ombiskeg so espiritualidad mo. Tandaan ya anggano natumba odino niparukol itayo, sarag tayoy ombangon tan ituloy so pilulumba tayo. Nayarin makaaral tayo ni ingen ed saray situasyon ya akagapolan tan akasubokay pananisia tayo.

²¹ Unong ed Biblia, say pilumba parad bilay ya andi-angga et tuloytuloy, aliwan tunda-tunda. Aliwa iyan singa ilugan ed bus pian makasabid finish line. Kaukolan tayoy ombatik a mismo. No gawaen tayo itan, say “abalbaleg a kareenan” ya iiter nen Jehova so ontulong ed sikatayo. (Sal. 119:165) Makapanmatalek itayod tulong to natan, tan naawat tayoy agmanganggan panamendisyon to no makasabi tayod finish line.—Sant. 1:12.