Panamatik ed Babatiken a Tekep na Panagsungdo
“Ombatik tayo komon tekep na panagsungdo ed babatiken a niiyan ed arap tayo.”—HEBREOS 12:1.
1. (a) Anto so niiyan ed arap tayo sanen intalaga tayo so inkasikatayo ed si Jehova a Dios? (b) Anton nengneng na babatiken so nepeg ya akaparaanan na sakey a Kristiano?
SANEN intalaga tayo so inkasikatayo ed si Jehova ed panamegley nen Jesu-Kristo, inyan na Dios ed arap tayo, diad piguratibon panagsalita, so sakey a babatiken. Diad sampot na babatiken et niiter so sakey a premyo ed amin na saraman so sitatalonan makasumpal. Anton premyo? Andi-anggaan a bilay! Pian manalo ed sayan makapakelaw a premyo, nakaukolan a say Kristianon bumabatik so akaparaan, aliwa lambengat ed antikey, maples a batik, noag ingen ed mayatyat a babatiken. Kanian nakaukolan to so panagsungdo. Nakaukolan ton sungdoan so andukey ya irap ed babatiken a mismo tan saray onlesan babeng legan na batik.
2, 3. (a) Anto so ontulong ed sikatayon batiken so Kristianon babatiken ya anggad kasampotan? (b) Panon a say gayaga so akatulong ed si Jesus ya ombatik ed babatiken a tekep na panagsungdo?
2 Anto so ontulong ed sikatayon ombatik ed ontan a babatiken ya anggad sampot? Bueno, anto so akatulong ed si Jesus a nansungdo sanen sikato so too diad dalin? Sikato so angisekar na akindalem a biskeg manlapud kalidad a gayaga. Nabasa ed Hebreos 12:1-3: “Kanian, sirin, lapud wala ed liberliber tayo so sakey a sankabalgan a lurem na saray tasi, ikaindan tayo met so amin a pakabelatan tan say kasalanan ya akaliktob a sankainomayan ed sikatayo, tan batiken tayo a tekep na panagsungdo so babatiken a niiyan ed arap tayo, legan ya onnengneng itayo ed Manunan Ahente tan Manamayadyari na pananisia tayo, si Jesus. A lapud gayaga a niiyan ed arap to et sinungdoan to so panamairapan a kiew, ya inbantak to so baing tan yinmurong ed kawanan na trono na Dios. Peteg, motektek yon maapit so samay nansungdo ed ontanlan insumlang na saray managkasalanan ed interes dan dili, pian agkayo komon nakesawan ya onkapuy kayo tan onsaew ed saray kamarerwa yo.”
3 Diad interon mapublikon ministeryo to, si Jesus so akapantultuloy a binmatik ed babatiken lapud gayaga nen Jehova. (Ipareng so Nehemias 8:10.) Tinmulong ed sikato so gayaga to a sungdoan so anggan makapabaing ya ipapatey ed panamairapan a kiew, a kayari to et akasagmak na agnibalikas a gayaga ed inkioli manlapud patey tan tinmokotok ed nikawanan a lima nen Ama to, a diman nanengneng to so kasumpal na kimey na Dios. Diad impansungdo to a bilang too ed dapag na Dios, binenbenan to so kanepegan to ed andi-anggaan a bilay. On, a singa ikuan na Lucas 21:19: “Dia ed panagsungdo yo natalima yo naani so kamarerwa yo.”
4. Anton nengneng na ehemplo so inletneg nen Jesus ed saray kapara ton bumabatik, tan anto so nepeg tayon pansiansiaen ed kaisipan tayo?
4 Inletneg nen Jesus so sankaabigan iran ehemplo parad kapara ton bumabatik, tan say ehemplo to so mamaseguro a sikatayo met so magmaliw a mananalo. (1 Pedro 2:21) No anto so kinerew nen Jesus ed sikatayon gawaen, nagawaan tayo. Unong a sikato so akapansungdo, kanian nagawaan tayo met. Tan legan a bembenan tayo so agnagiing a panangalig ed sikato, nepeg tayon sinononot ed saray rason ed pagmaliw a magayaga. (Juan 15:11, 20, 21) Say gayaga so mamabiskeg ed sikatayon mantultuloy ya ombatik ed babatiken ed serbisyo nen Jehova ya anggad pakagamor na maglorian premyo ya andi-anggaan a bilay.—Colosas 1:10, 11.
5. Panon tayon makapangayaga tan napabiskeg ed babatiken ed arap tayo?
5 Pian natulongan itayon mantultuloy ed babatiken, itarok nen Jehova so pakayari ed labas na nayarian tayo. Sano sikatayo so napasegsegang, satan a pakayari tan say pikakabat ed no akin a sikatayo so apribilehyoan a makasagmak na panamasegsegang so mamabiskeg ed sikatayo. (2 Corinto 4:7-9) Antokaman ya asagmak nisesengeg ed panamagalang ed ngaran na Dios tan panamabenben ed inkasoberano to so sakey a rason parad gayaga ya anggapo so makala ed satan ed sikatayo. (Juan 16:22) Isalaysay na saya no akin a saray apostoles, a kayari inkapekpek nisengeg ed ganggan na Judion Sanhedrin lapud impantasi ed makapakelaw iran bengatlan ginawa nen Jehova a Dios nipaakar ed si Jesus, so nangayaga “lapud nikuenta iran makana a napabaing ed biang na ngaran to.” (Gawa 5:41, 42) Say gayaga da so agnanlapu ed mismon panamasegsegang noagta nanlapud akindalem ya inkapnek ed pakaamta a sikaray mamapaliket ed si Jehova tan si Jesus.
6, 7. Akin a say Kristianon bumabatik et makapanliket anggan sikato so walad saray kairapan, tan ed anton pansumpalan?
6 Sananey a makatulong a pakayari ed saray bilay tayo et say ilalo ya inyan na Dios ed arap tayo. Unong ya insulat nen Pablo: “Pangayagaan tayo komon so kareenan ed Dios diad panamegley na Katawan tayo a Jesu-Kristo, lapud sikato met et agamoran tayo so iyaasingger ed pananisia ed sayan agkanepegan a panangasin kawalaan tayo natan; tan manliket itayo, a nibased ilalo ed gloria na Dios. Tan aliwan satan lambengat, noag ingen manliket itayo anggaman walad kairapan, ta amta tayo a satan a kairapan et manbunga na panagsungdo; tan diad panagsungdo et sakey a naabobonan a kipapasen; say naabobonan a kipapasen et mamawala na ilalo, tan say ilalo et agmangipaarap ed pakadismaya.”—Roma 5:1-5.
7 Say mismon kairapan so agmamagayaga, ingen say mareen iran bunga a pawalaen to ed saginonor so mamagayaga. Sarayan bunga et say sungdo, sakey a naabobonan a kipapasen, ilalo, tan say kasumpalan na satan ya ilalo. Say panagsungdo tayo so mangitonton ed pakaawat tayo na madibinon panangabobon. Sano walaan itayo na panangabobon na Dios, matalek itayon manilalo ed kasumpalan na saray sipan a ginawa to. Saya so ilalon mamasiansia ed sikatayo ed dugan kurso tan mamaseseg ed sikatayo ed leksab na kairapan ya anggad pakasumpal na ilalo.—2 Corinto 4:16-18.
Maliket Iramay Mansungdo!
8. Akin a sayan panaalagar et aliwan panagdarak na panaon parad sikatayo?
8 Manwarin manaalagar ed madibinon inggeter a panaon parad kibunog na saray premyo ed saray bumabatik, walara so panguman a naeksperiensia tayo. Saraya so espiritual ya iyaaligwas ed sikatayo a resulta manlapud sitatalonan impangabet ed saray subok, tan apagamoran itayo na baleg a panangabobon ed Dios. Saratan so mamaneknek no siopa itayo tan mangiter ed sikatayo na pankanawnawan mangagamil na parehon maabig a kalidades na saray matoor ed inmunan panaon, nagkalautla ed impanengneng na Uliran tayo, si Jesu-Kristo. Ikuan nen babangatan a Santiago: “Ibilang yo ya amin a liket, agagik, sano napelag kayo ed nanduruman subok, a kabat yo a diad sayan asubok a kalidad na pananisia yo et gawaen to so panagsungdo. Balet abuloyan yon kompletoen na panagsungdo so kimey to, pian sikayo so nayadyari tan napenek ed amin a pamaakaran, ya andi kulang ed antokaman.” (Santiago 1:2-4) On, nailaloan tayon nawalaan na nanduruman subok, balet saraya so manserbin mamasiansia ed sikatayon mamayubo na duga iran kalidad. Kanian idemostra tayo so pansiansia tayo ed sayan babatiken ya anggad nagamoran so premyo, anggaman anton babeng so naabet tayo.
9, 10. (a) Akin a saramay akapansungdo ed saray subok et maliket, tan panon tayon arapen iray subok? (b) Siopa iray maliket nensaman, tan panon tayon nibilang ed sikara?
9 Sirin, agpankelawan ya inkuan nen Santiago: “Mapalar so too a mantultuloy a mansungdo ed subok, lapud diad pagmaliw a naabobonan sikato so makaawat na balanget na bilay, ya insipan nen Jehova ed saramay mantultuloy a mangaro ed sikato”! (Santiago 1:12) Manpakpel tayo komon ya onarap ed saray subok, a naayuraan na maridios a kalidades a mamabiskeg ed sikatayo pian saratan so natalonaan.—2 Pedro 1:5-8.
10 Nonoten a say dalan na pidedeneng na Dios ed sikatayo so aliwan balo. Say matoor “a lurem na tastasi” ed inmunan panaon so akidenengan ed parehon dalan unong a pinaneknekan da so katooran da ed Dios. (Hebreos 12:1) Say panangabobon na Dios ed sikara so nikurit ed Salita to, tan ibilang tayoran amin a maliket lapud sikaray agsinmuko ed leksab na subok. Ikuan nen Santiago: “Agagi, panuliranan yo so inpantepel ed kaugsan tan say impangagamil na anos na saray propetas, a nansalita ra ed ngaran nen Jehova. Nia! Ibilang tayon mapalar iray nansungdo. Nadngelan yo so impansungdo nen Job, tan anengneng yo so anggaan ya inter nen Jehova, a si Jehova so matamoy ed panangabagey tan mapangasi.” (Santiago 5:10, 11) Nipasakbay a legan na sarayan maatap a kaunoran iran agew, arum so ompatnag ed mundo a manlingkor ed si Jehova a tekep na katooran, a singa saramay propetas ed kadaanan iran siglo. Agtayo ta maliket a sikatayo so manggagawa ed satan?—Daniel 12:3; Apocalipsis 7:9.
Pangawat na Tulong Manlapud Makapaseseg a Salita nen Jehova
11. Panon a say Salita na Dios so ontulong ed sikatayon mansungdo, tan akin a sikatayo so agnepeg a singa saray mabaton paspasen ed parabolo nen Jesus?
11 Indanet nen Pablo so sananey a tulong ed panagsungdo sanen inkuanto a “diad panamegley na maanos a panagsungdo, tan ed panamegley na panamaseseg a naawat ed Kasulatan, nabembenan tayon malet so ilalo tayo.” (Roma 15:4, The Twentieth Century New Testament) Say katuaan, a Salita na Dios, so nepeg a nilamot a maong ed sikatayo pian mamawala ed sikatayo na manepeg ya ikiwas ed amin a panaon. Agtayo nagunggunaan ed pagmaliw a singa samay mabaton dalin ya adeskribe ed parabolo nen Jesus ed managtanem: “Saraya so nitanem ed mabaton paspasen: a bektan nadngel da so salita, inawat dan tampol itan a magaygayaga. Ingen anggapoy lamot da ed inkasikara, balet nambilay iran agano; insan nen linmesa so kairapan odino panamasegsegang lapud salita, sikaray atiror.” (Marcos 4:16, 17) Say katuaan manlapud Salita na Dios so agnilamot a maong ed saratan; kanian, diad panaon na kairapan, sikaray agmakaasingger ed satan a bilang say tuan lapuan na biskeg tan ilalo.
12. Nepeg ya agtayo napalikdo ed anto sano awaten so maong a balita?
12 Siopaman a mangawat na maong a balita na Panarian so nepeg ya agmamalikdo ed inkasikato nipaakar ed no anto so ontumbok. Sikato so mangaala na kurso na bilay a managmak na kairapan tan pasegsegang. (2 Timoteo 3:12) Balet nepeg ton ibilang ya “amin a liket” so nawalaan na pribilehyon makasagmak ed nanduruman subok ed pamenben a malet ed Salita na Dios tan salitaen itan ed arum.—Santiago 1:2, 3.
13. Panon tan akin a nanliket si Pablo ed saray Kristianos ed Tesalonica?
13 Nen inmunan siglo, saray sumusumpa ed Tesalonica so nanggulo lapud panagpulong nen Pablo. Sanen linma si Pablo ed Berea, sarayan managpasegsegang so tinmumbok diman ed sikato ta pian managyat na lalon gutgutan. Insulat na apasegsegang ya apostol ed saramay matoor ya atilak ed Tesalonica: “Naobliga itayon misalamat ed Dios ya andi ebas nipaakar ed sikayo, agagi, unong a matukotukoy, lapud say pananisia yo so ontotobo a mapalalo tan say aro na balang sakey tan ed amin yo so ondaraak ed sakey tan sakey. Kanian sikamin dili so mangikinon ed sikayo ed limog na saray kongregasyon na Dios lapud panagsungdo tan pananisia yo ed amin a panamasegsegang tan diad saray kairapan ya itetepel yo. Saya so pamatnagan na matunong a panangukom na Dios, a mangitonton ed kibilang yon makana ed panarian na Dios, a lapud sikato et peteg a manlilikna kayo na panamairap.” (2 Tesalonica 1:3-5) Anggaman ed saray kairapan da ed saray lima na kabusol, saray Kristianos a taga-Tesalonica so binmaleg ed inka-Kristo tan ed bilang. Panon a posible itan? Lapud sikara so angagwat na biskeg manlapud makapaseseg a Salita nen Jehova. Tinulok daray ganggan na Katawan tan binatik da so babatiken a tekep na panagsungdo.—2 Tesalonica 2:13-17.
Parad Kilalaban na Arum
14. (a) Diad anto iran rason a sigagayaga tayon mansiansia ed ministeryo anggaman ed saray panamairap? (b) Anto so ipikasi tayo, tan akin?
14 Manuna nisesengeg ed kialongan na Dios, a sikatayo so sitotoor tan agmareklamon mansungdo ed saray kairapan tan panamasegsegang. Balet wala so sananey ya andi-siblet a rason no akin a manpasakup itayo ed saratan a bengatla: ta pian nipanabang tayo ed arum iray balita na Panarian pian dakel nin manangipalapag parad Panarian na Dios so napawala a manggawa na “inkalapagan a panangiyabawag na kilalaban.” (Roma 10:10) Saramay mankimey ed serbisyo na Dios so nepeg a manpikasi a bendisyonan na Katawan na panagani so kimey da diad pangitarok na nagkalalon manangipalapag na Panarian. (Mateo 9:38) Nansulat si Pablo ed si Timoteo: “Saray bengatlan nadngel mo ed siak a tinasian na dakerakel, sarayan bengatla so imatalek mo ed saray totoon matoor, a sikara so manepeg a mangibangat met ed saray arum. Bilang maabig a sundalo nen Kristo Jesus mibiang ka ed pantepel ed mauges.”—2 Timoteo 2:2, 3.
15. Akin a nepeg tayon ikiwas so inkasikatayo a singa saray sundalo tan mananalo “ed saray galaw”?
15 Say sakey a sundalo et ibiig to so inkasikato ed agtanton asebelan a panagbilay na sibilyan. Ontan met, sikatayo so nepeg ya agmibabali ed saray gawa na saramay anggapo ed armada na Katawan, salanti, walad onsusumpan dapag. Kanian, inyarum ya insulat nen Pablo ed si Timoteo: “Anggapo so manlingkor a sundalo a manpaligotgot ed saray pananapan na bilay, pian nagamoran to so panangabobon na saman so angilista ed sikato a sundalo. Nagkalalo ni, siopaman a mibakal ed panpapalaboan so agnabalangetan ya anggad sikato so akibakal unong ed totontonen.” (2 Timoteo 2:4, 5) Diad pambanikel ed pananalo ed babatiken parad “balanget na bilay,” saray bumabatik so nepeg a mangagamil na dangka tan paliisan da so andikanan pabelat tan samben. Diad sayan dalan iyaapasakey da so pangitarok na maong a balita na kilalaban ed saray arum.—Santiago 1:12; ipareng so 1 Corinto 9:24, 25.
16. Anto so agnibalor, tan parad siopa kagunggunaan a mansungdo itayo?
16 Lapud inaro tayo so Dios tan saray malakarneron manaanap ed sikato, sigagayaga tayon mansungdon maong ta pian nipasabi ed saray arum so maong a balita na kilalaban. Nayarin ibalor itayo na kakabusol lapud panagpulong na Salita na Dios. Balet say Salita na Dios so agnibalor, tan say pansalita ed satan parad kilalaban na arum so agnigulonggulong. Deneskribe nen Pablo ed si Timoteo no akin a sikato so mabulos ya onarap ed subok: “Nognonot mo a si Jesu-Kristo so inmoli ed bilay manlapud inaatey tan ed bini nen David, unong ed maong a balitan impulong ko; a nisengeg ed satan manaako ak na irirap a singa managgawa na mauges anggad inkabalor ko ed pangawan. Anggaman kuan, say salita na Dios so ag abalor. Kanian susungdoan kon amin lapu ed saray apili, pian nagamoran da met so kilalaban a wala ed Kristo Jesus diad gloria ya andi-anggaan.” (2 Timoteo 2:8-10) Natan sinononot itayo aliwa lambengat ed melag a nakdaan na saramay milinya parad mangatatawen a Panarian noagta ontan met ed baleg ya ulop na arum a karnero na Maabig a Managpastol, si Jesu-Kristo, say baleg ya ulop a makagamor na mangaraldalin a Paraiso ed silong na Panarian nen Kristo.—Apocalipsis 7:9-17.
17. Akin ya agtayo ontunda ed babatiken, tan anto iran pansumpalan no sikatayo so mantultuloy ed babatiken ya anggad kasampotan?
17 No sikatayo so onsuko, agtayo natulongan so inkasikatayo o siopaman parad kilalaban. Diad panamegley na pansungdo ed Kristianon babatiken, anggaman ed dakel a babeng a naabet et sikatayo so lawas makapansiansia ed linya na premyo tan direktan natulongan tayoray arum ed kilalaban, a bilang masekder ya ehemplo na biskeg ed saray arum. Antokaman so ilalo tayo, mangatatawen odino mangaraldalin, say awawey nen Pablo ed “pangegemtan ed kalat a parad premyo” so sakey a maabig ya aligen.—Filipos 3:14, 15.
Sitotoor a Pantultuloy ed Babatiken
18. Say panalo ed premyo so mandependi ed anto, balet pian makapansiansia anggad kasampotan, anto so nepeg a paliisan tayo?
18 Say mabiktoryan pananumpal ed Kristianon kurso tayo ed kialangon nen Jehova tan panalo ed premyon imparaan to parad sikatayo so mandepende ed matoor a pantultuloy tayo ed interon dukey na babatiken. Sirin, agtayo makasabi ed anggaan no pabelatan tayo so inkasikatayo ed saray bengatlan agmanserbi parad inkatunong. Anggan naekal iray ontan a bengatla, siansian nakaukolan so sigpot a pamawala na panagtepel. Kanian, insimbawa nen Pablo: “Ikaindan tayo sirin so amin a pakabelatan tan say kasalanan ya akaliktob a sankainomayan ed sikatayo tan batiken tayo a siaanos komon so babatiken a niiyan ed arap tayo.” (Hebreos 12:1) Singa si Jesus nepeg ya agtayo tanton idadanet iray nasagmak a kairapan noagta ibilang iratan a melag lambengat no ikumpara ed magayagan premyo.—Ipareng so Roma 8:18.
19. (a) Anton talek so imbalikas nen Pablo ed kasampotan na bilay to? (b) Legan a manasingger itayo ed anggaan na babatiken na panagsungdo, anton talek so nepeg a wala ed sikatayo nipaakar ed nisipan a tumang?
19 Diad kasampotan na bilay to, ayarian nen Pablo ya ibaga: “Akibakal ak ed maabig a pibabakal, asumpal ko so binatik ko, inonor ko so pananisia. Manlapu ed natan angga ed arapen et niparaan ed siak so balanget na kaptekan.” (2 Timoteo 4:7, 8) Wala tayo ed sayan babatiken na panagsungdo pian gamoran so premyon maandon bilay. No say panagsungdo tayo so ontayer lapud say babatiken so ompatnag ya andukey nen say ilaloan tayo sanen inggapo tayo itan, onsaew itayo anta asingger itayo la ed pakagamor na nisipan a tumang. Makapanseguro kayo. Anggapo so suppiat a say tumang et wadtan.
20. Anto so nepeg a determinasyon tayo anggad say anggaan na babatiken et nasabi?
20 Kanian agkomon naalipanes iray mata tayo ed panbantay ed igapo na baleg a kairapan, ya ununan mangitarok na kadederal ed Babilonia a Baleg tan insan ed interon organisasyon na Diablo. (2 Pedro 3:3, 11, 12) Nisesengeg ed amin a mabiskeg iran tanda ed liber tayo, onnengneng tayo komon ed arapen tekep na pananisia. Balkesan tayo komon iray banel na pakayari na panagsungdo tayo, tan mantultuloy tayo komon a sibabayani ed babatiken ya inyan nen Jehova ed arap tayo, ya anggad pakasabi tayo ed anggaan tan nagamoran so sigagayagan premyo, diad kialangon nen Jehova diad panamegley nen Jesu-Kristo.
Panon so Pangebat Yo?
◻ Anton nengneng na babatiken so nepeg ya akaparaanan na sakey a Kristiano?
◻ Akin ya ontanlan importanti so gayaga ed ibatik ed babatiken?
◻ Diad anton manuna iran rason a mansiansia itayo ed ministeryo anggaman ed saray panamairap?
◻ Akin ya agtayo ontunda ed babatiken ya inyan na Dios ed arap tayo?