Pangagamil na Puron Relihyon Parad Kililiktar
“Say relihyon a puro tan dalisay ed arap na Dios Ama so mangipanengneng ed inkasikato na ontan iran bengatla a bilang . . . pansiansia na sakey ya agamantsaan na mundo.”—SANTIAGO 1:27, Phillips.
1. Panon a naukeran so relihyon, tan siopa ed lohiko so walaan na kanepegan a manetermina ed pandumaan na palso tan tuan relihyon?
SAY relihyon so naukeran a bilang “say balikas na pananisia na too tan panangigalang ed sakey a makapanyari nen say too a bibidbiren a bilang say amalsa tan manuley na talba.” Siopa, sirin, diad lohiko so walaan na kanepegan a manetermina ed pandumaan na tuan relihyon tan palson relihyon? Maseguron saman so Sakey a sinisia tan ingalang, say Amalsa. Malinlinew ya indatak nen Jehova ed Salita to so talindeg to nipaakar ed tuan relihyon tan palso.
Say Salitan “Relihyon” ed Biblia
2. Panon so pangisalaysay na saray diksyunaryo ed orihinal a Griegon salitan nipatalos a “porma na panagdayew” odino “relihyon,” tan anto iran nengneng na panagdayew so kiusaran to?
2 Say Griegon salitan nipatalos ed “porma na panagdayew,” odino “relihyon,” so thre·skeiʹa. Inukeran na A Greek-English Lexicon of the New Testament iyan salita a bilang “say panagdayew ed Dios, relihyon, nagkalautla no ibabalikas to so inkasikato ed relihyoson serbisyo odino kulto.” Itarok na Theological Dictionary of the New Testament so kaaruman a detalye, ya angikuan: “Say awaran na salita (etymology) so asuppiat; . . . abobonan na moderno iran eskolar so siglaotan ed therap- (‘manlingkor’). . . . Say pandumaan ed kabaliksan so naimano met. Say maabig a pantalos so ‘relihyoson seseg’ . . . , ‘panagdayew ed Dios,’ ‘relihyon.’ . . . Balet wala met so mauges a pantalos, salanti, ‘relihyoson inkalablabas,’ ‘lingon panagdayew.’” Sirin, say thre·skeiʹa so nipatalos balanglan “relihyon” odino “porma na panagdayew,” a maong o mauges.
3. Panon so impangusar nen apostol Pablo ed salitan nipatalos a “porma na panagdayew,” tan anton makapasagyat a komento so agawa ed patalos na Colosas 2:18?
3 Pinmatnag iyan salita ya amipat a danay lambengat ed Kristianon Griegon Kasulatan. Inusar itan ya amiduan danay nen apostol Pablo pian ituro so palson relihyon. Diad Gawa 26:5, sikato so nikurit ya analambit a sakbay a nagmaliw a Kristiano, “unong ed sankaestriktoan a sekta na porma na panagdayew mi [“relihyon,” Phillips] et nambilay ak a sakey a Pariseo.” Diad sulat to ed saray taga-Colosas, impasakbay to: “Anggapo komon so toon manakew ed sikayo na tumang a mangayaga ed manmudmoran kaumildian tan sakey a porma na panagdayew ed saray angheles.” (Colosas 2:18) Say ontan a panagdayew ed anghel so mapatpatnag a kasmak ed Phrygia ed saraman ya agew, balet satan so porma na palson relihyon.a Makapasagyat, anggaman arum a patalos na Biblia so angipatalos ed thre·skeiʹa a “relihyon,” ed Colosas 2:18 maslak so angusar ed salitan “panagdayew.” Say New World Translation so mabetbet ya angipatalos ed thre·skeiʹa a “porma na panagdayew,” sakey a paimanod-leksab na Reference Bible so analambit ed kada danay a say nampilian a patalos a “relihyon” so nausar ed saray bersyon na Latin.
“Malinis tan Andi-tilol” Manlapud Punto de Bista na Dios
4, 5. (a) Unong ed Santiago, siopa talindeg nipaakar ed relihyon so sankaimportantian? (b) Anto so manggawa ed porma na panagdayew na sakey a too ya andi kakanaan, tan anto so kabaliksan na salitan nipatalos ya “andi kakanaan”?
4 Say arum a duaran inkiusar na salitan thre·skeiʹa so walad sulat ya insulat nen babangatan a Santiago, sakey a membro na mananguley ya ulop ed Kristianon kongregasyon nen inmunan siglo. Insulat to: “No ipasen na siopaman a too so inkasikaton pormal a managdayew [“magmaliw a ‘relihyoso,’” Phillips] tan ingen agto pokpokan so dila to, noag ingen palpalikdoen to so dilin puso to, sayan porma na panagdayew na too [“relihyon,” Phillips] so andi kakanaan. Say porma na panagdayew [“relihyon,” Phillips] a malinis tan andi-tilol ed punto de bista na Dios tayo tan Ama so saya: pangasikaso ed saray ulila tan babalon bibii ed kairapan da, tan pansiansian andi mantsa ed mundo.”—Santiago 1:26, 27.
5 On, say itulok ed talindeg nen Jehova ed relihyon so importanti no labay tayon nawalaan na panangabobon to tan makaliktar ed balon mundon insipan to. (2 Pedro 3:13) Ipanengneng nen Santiago ya ompatnag ed sakey a too a sikaton mismo so peteg a relihyoso ingen ta say porma na panagdayew to so andi kakanaan. Say Griegon salita dia a nipatalos ya “andi kakanaan” et kabaliksan to met so “andian na balor, anggapoy iyan, andian na bunga, maapa, andian na pakayari, kulang na katuaan.” Onia so kipapasen no siopaman a mangibabagan Kristiano et agto pokpokan so dila to tan usaren itan ed pangidayew ed Dios tan pabiskegen iray kapara ton Kristianos. Sikato so “mamapalikdo ed dilin puso to” tan agmangaagamil na “relihyon a puro tan dalisay ed arap na Dios.” (Phillips) Say punto de bista nen Jehova so importanti.
6. (a) Anto so tema na sulat nen Santiago? (b) Anton kakaukolanen ed puron panagdayew so indanet nen Santiago, tan anto so imbalikas na modernon-agew a Mananguley ya Ulop nipaakar ed saya?
6 Ag-indalatdat nen Santiago ya amin iray bengatlan kakaukolanen nen Jehova a misiglaot ed puron panagdayew. Mitunosan ed inheneral a tema na sulat to, salanti pananisian apaneknekan na saray gawa tan say pankaukolan ya iyarawi manlapud pikakaaro ed mundo nen Satanas, ipabitar to lambengat iray duaran kakaukolanen. Say sakey so “pangasikaso ed saray ulila tan babalon bibii ed kairapan da.” Lalanoren na saya so Kristianon panangaro. Lawas impanengneng nen Jehova so maaron panangasikaso ed saray ulila tan babalon bibii. (Deuteronomio 10:17, 18; Malaquias 3:5) Sakey ed saray inmunan kiwas na inmunan-siglon mananguley ya ulop na Kristianon kongregasyon so diad biang na saray Kristianon babalo. (Gawa 6:1-6) Inter nen apostol Pablo so detalyadon bilibilin diad pangitarya na maaron panangasikaso parad dukan matatken lan babalo a pinaneknekan da so inkasikaran matoor ed dakel iran taon tan andian na pamilyan ontulong ed sikara. (1 Timoteo 5:3-16) Say modernon-agew a Mananguley ya Ulop na saray Tasi nen Jehova so mipadparan angipaakseb na pihon bilibilin nipaakar ed “Panangasikaso parad Duka,” a mangikuan: “Lalanoren na tuan panagdayew so pangasikaso ed saray matua tan matoor a nayarin mankaukolan na materyal a tulong.” (Nengnengen so libron Organized to Accomplish Our Ministry, pahinas 122-3.) Saray ulop na mamatatken odino indibidual iran Kristianos ya ipanengneng da so inkasikaran mapaulyan ed sayan pamaakaran so agmangiimano ed sakey ya importantin nengneng na porma na panagdayew a malinis tan andi tilol manlapud punto de bista na Dios tan Ama tayo.
“Andi-mantsa ed Mundo”
7, 8. (a) Anton komaduan kakaukolanen ed tuan relihyon so binitla nen Santiago? (b) Kasin say klero tan papari so makakapet ed sayan kakaukolanen? (c) Anto so nibaga nipaakar ed saray Tasi nen Jehova?
7 Say komaduan kakaukolanen parad tuan relihyon a binitla nen Santiago so “pansiansian andi-mantsa ed mundo.” Sinalita nen Jesus a: “Say panarian ko so agkabiangan na sayan mundo”; mitunosan, a saray tuan patumbok to so “agkabiangan na mundo.” (Juan 15:19; 18:36) Kasin nibaga iya ed say klero tan saray papari na dinanman iran relihyon na sayan mundo? Iyaalibansa ra so Nasyones Unidos. Dakel ed saray papangulo ra so angawat ed imbitasyon na papa a mitipon ed Assisi, Italya, nen Oktubre 1986 pian pankakasakeyen iray pikakasi ra ed italona na imparungtal na NU ya “Internasyonal a Taon na Kareenan.” Anggaman ontan, saray sagpot da so andi kana, isipen iray nilaksan pinatey ed bakabakal ed saman a taon tan ed saray ontumbok a taon. Mabetbet a mitongtong so klero ed manuuley a pulitikon partido, bangta mapalikdon migagawaan na maamot a siglaotan ed oposisyon ta pian siopaman a manuley et ikuenta ra a bilang “kakaaro.”—Santiago 4:4.
8 Akapanggawa iray Tasi nen Jehova na maabig a pakatongtongan ed inkasikara bilang Kristianos a mansiansian neutral ed saray makapulitikon gawagawa tan gutgutan na sayan mundo. Pansiasiansiaen da iyan talindeg ed amin a kontinente tan ed amin a nasyones, unong a paneknekan na saray report tan modernon maawaran iran rekord ed amin a parte na mundo. Sikara so petepeteg ya “andi-mantsa ed mundo.” Kayarian da so “relihyon a puro tan dalisay ed arap na Dios.”—Santiago 1:27, Phillips.
Arum Iran Tanda na Tuan Relihyon
9. Anto so komatlon kakaukolanen ed tuan relihyon, tan akin?
9 No say relihyon so “panangigalang parad makapanyari nen say too a bibidbiren bilang amalsa tan manuley na talba,” maseguron ipaarap na tuan relihyon so dayew to ed alenleneg a tuan Dios, si Jehova. Sikato so nepeg ya agmamaburagas ed pakatalos na totoo ed Dios diad pangibangat na paganon bangabangat a say taloran dios ya inabang na Ama so inkabiskeg, gloria, tan inkamaando to dingan na duaran arum a persona ed sakey a misteryoson Trinidad. (Deuteronomio 6:4; 1 Corinto 8:6) Nepeg met a mangipakabat ed agnaparaan a ngaran na Dios, a Jehova, tan mangigalang ed satan a ngaran, a peteg a mamenben itan ed ngaran na Dios bilang sakey ya organisadon totoo. (Salmo 83:18; Gawa 15:14) Diad saya saray manangagamil to so nepeg ya ontumbok ed ehemplo nen Kristo Jesus. (Juan 17:6) Siopan totoo natan so makakapet ed sayan kakaukolanen nilikud ed Kristianon Tastasi nen Jehova?
10. Parad relihyon a mangiyopresi na kililiktar ed balon mundo na Dios, anto so nepeg ton gawaen, tan akin?
10 Inkuan nen apostol Pedro: “Nagkalalo ni, anggapo so arum a kilabanan, ta anggapo so arum a ngaran [Jesu-Kristo] ed leksab na tawen a niiter ed saray totoo a kilabanan tayo.” (Gawa 4:8-12) Sirin, say puron relihyon a mangiyopresi na kililiktar ed balon mundo na Dios so nepeg a mangisagyat na pananisia ed Kristo tan ed kablian na dondon bagat. (Juan 3:16, 36; 17:3; Efeso 1:7) Niarum ni, satan so nepeg ya ontulong ed saray tuan managdayew a manpasakup ed Kristo a bilang say manuuley ya Ari nen Jehova tan alanaan ya Atagey a Saserdote.—Salmo 2:6-8; Filipos 2:9-11; Hebreos 4:14, 15.
11. Diad anto so nepeg a kibasiyan na tuan relihyon, tan anto so talindeg na saray Tasi nen Jehova ed sayan pamaakaran?
11 Nepeg a nibase so tuan relihyon ed niparungtal a linawa na sakey a tuan Dios tan aliwan diad ginawa-na-toon tradisyon tan pilosopiya. No aliwan lapud say Biblia, agtayo komon akabatan si Jehova tan saray makapakelaw a gagala to, nisay si Jesus tan ed dondon bagat. Ipapasepsep na saray Tasi nen Jehova ed totoo so agnagiing a talek ed Biblia. Papaneknekan da met ed inagew-agew a panagbilay da a mipakna ira ed balikas nen apostol Pablo ya: “Amin a Kasulatan ya impuyan na Dios so maabig a pakaaralan, pakasumalan, pakasimbawaan, . . . pian say too na Dios et anggapo komon so pankulangan to, a nabangatan a maong ed amin a gawan maabig.”—2 Timoteo 3:16, 17.
Say Tuan Relihyon—Sakey a Dalan na Panagbilay
12. Niarum ed pananisia, anto so nakaukolan pian say panagdayew so tua, tan diad anto iran pamaakaran a say tuan relihyon so dalan na panagbilay?
12 Inyabawag nen Jesus: “Say Dios so espiritu, tan saramay mandayew ed sikato so nepeg a mandayew ed sikato ed espiritu tan katuaan.” (Juan 4:24) Sirin, say tuan relihyon, odino porma na panagdayew, so aliwan seremonyal, ritualistiko, mapalaway a pangipanengneng na inkamaridios. Say puron panagdayew so espiritual, nibased pananisia. (Hebreos 11:6) Anggaman ontan, satan a pananisia so nepeg a tekepan na saray gawa. (Santiago 2:17) Ipulisay na tuan relihyon iray kabkabat a kalarerker. Tumboken na satan iray estandarte na Biblia ed moralidad tan malinis a panagsalita. (1 Corinto 6:9, 10; Efeso 5:3-5) Saray mangaagamil to so sisimoon a manbabanikel a mamawala na bunga na espiritu na Dios ed bilay na pamilya ra, diad sekular a trabaho ra, diad eskuelaan, tan anggan diad panligliwaan da. (Galacia 5:22, 23) Agbalot lingwanan na saray Tasi nen Jehova so konseho nen apostol Pablo: “Sirin, anggan mangan kayo odino oninum odino antokaman a gawaen yo, gawa yon amin ed gloria na Dios.” (1 Corinto 10:31) Say relihyon da so aliwan basta pormalidad; satan so dalan na panagbilay.
13. Anto so lalanoren na tuan panagdayew, tan akin a nibaga a saray Tasi nen Jehova so peteg a relihyoson totoo?
13 Siempre, lalanoren na tuan relihyon iray espiritual a kimey. Ilaktip na saraya so personal tan pamilyan pikakasi, ontulong so regular a panagaral na Salita na Dios tan panagaral na Biblia, tan iyaatendi ed saray miting na tuan Kristianon kongregasyon. A saratan et lulukasan tan sasaraan na saray kanta na panagdayew ed si Jehova tan ed saray pikakasi. (Mateo 26:30; Efeso 5:19) Saray makapaalagey ya espiritual a tema so nausisa diad panamegley na saray diskurso tan tepet-tan-ebat iran diskusyon ed niimprintan materyal a niwala parad amin. Say ontan iran miting so gendat a nagagawa ed malinis balet aliwan maartin Kingdom Halls, a nausar a nikabkabiig parad relihyoson gagala: regular iran miting, saray kasal, saray serbisyo ed memoryal. Rerespetoen na saray Tasi nen Jehova iray Kingdom Hall tan babaleg ya Assembly Hall da bilang paspasen a nidedika ed pandayew ed si Jehova. Aliwan singa dakel iran iglesia na Kakristianoan, saray Kingdom Hall so aliwan pasen para ed sosyal.
14. Anto so kabaliksan na panagdayew ed mansasalita-na-Hebreon totoo, tan anton kimey so mangibiig ed saray Tasi nen Jehova natan?
14 Anengneng tayo ed inmuna ya insiglaot na saray eskolar so Griegon salitan nipatalos a “porma na panagdayew” odino “relihyon” ed berbon “manlingkor.” Makapasagyat, a say kapetekan ed Hebreo ya ‛avo·dhahʹ, so nipatalos a “lingkor” odino “panagdayew.” (Ipareng iray paimanod leksab na Exodo 3:12 tan 10:26.) Parad saray Hebreos, say panagdayew et kabaliksan to so lingkor. Tan onia so kabaliksan to ed saray tuan managdayew natan. Sakey a sankaimportantian, a manangibiig a tanda na tuan relihyon et say pibiang na amin a manangagamil ed satan diad maridios a lingkor diad pangipulong na “sayan maong a balita na panarian . . . ed amin a panaayaman a dalin ya onkanan pantasi ed amin a nasyones.” (Mateo 24:14; Gawa 1:8; 5:42) Anton relihyon so kabkabat ed sankamundoan ed mapublikon panagtasi to ed Panarian na Dios a bilang mogmon ilalo na totoo?
Sakey a Positibo, Manamasakey a Puersa
15. Anto so matalonggaring a walewaleng na tuan relihyon?
15 Mangaapag-apag so palson relihyon. Sikato so sengegan, tan siansian sengegan, na panamusol tan panagpatedter na dala. Diad kasuniyan, say tuan relihyon so manamasakey. Inkuan nen Jesus: “Diad saya nakabatan da a sikayoray babangatan ko, no wala so aro ed limog yo.” (Juan 13:35) Say aro a manamasakey ed saray Tasi nen Jehova et palumbasan to so nasyonal, sosyal, ekonomiko, tan rasyal iran ketegan a mangaapag ed interon katooan. Saray Tasi so “mabiskeg ya akatalindeg ed sakey ya espiritu, ed sakey a kamarerwa a manseet nipaakar ed pananisia na maong a balita.”—Filipos 1:27.
16. (a) Anton “maong a balita” so ipupulong na saray Tasi nen Jehova? (b) Anto iran propesiya so nasusumpal ed saray totoo nen Jehova tan anto iran bendisyon so tinmunbok?
16 Say agnauman a gagala na Dios a “maong a balita” ya ipupulong da so asingger lan nasumpal. Nagawa so linawa to, “unong ed tawen, ontan met ed dalin.” (Mateo 6:10) Nialangon so maglorian ngaran nen Jehova, tan say dalin so magmaliw a paraiso, a ditan et makapambilay ed ando lan ando iray tuan managdayew. (Salmo 37:29) Literal a nilaksalaksan totoo ed amin a daldalin so mililimog ed saray Tasi nen Jehova, a mangibabaga, ed kasumpalan na propesiya na Biblia: “Mila kami ed sikayon totoo, ta nadngelan mi a say Dios so wala ed sikayon totoo.” (Zacarias 8:23) Bebendisyonan nen Jehova iray totoo to. “Say melag” so peteg a nagmaliw a “mabiskeg a nasyon,” sakey a sankamundoan a kongregasyon a sigpot a nankakasakey ed amin a pamaakaran—diad kanonotan, diad kimey, diad panagdayew. (Isaias 60:22) Saya so bengatlan agbalot nagawaan na palson relihyon.
Say Pananalo na Puron Relihyon
17. Anto so nitalaga parad Babilonia a Baleg, tan panon a saya et nitarok?
17 Impasakbay na Salita na Dios so kadederal na sankamundoan ya imperyo na palson relihyon, simbolikon atawag a “Babilonia a Baleg.” Ireretrato met na Biblia so “arari,” odino pulitikal iran manuley, ed dalin diad simbolo na saray saklor na atap ya ayep. Ibabaga to ed sikatayo a say Dios et iyan to ed kapusoan na sarayan manuley so gagalan ipuliktar tan sigpot a paneral ed singa-balangkantis a muyongan nen Satanas a Diablo.—Nengnengen so Apocalipsis 17:1, 2, 5, 6, 12, 13, 15-18.b
18. Anton importantin rason so inter na Biblia parad kaderal na Babilonia a Baleg, tan kapigan ginmapo so palson relihyon ed sayan makapataktakot a kurso?
18 Akin a say Babilonia a Baleg so manepeg ed kadederal? Onebat so Biblia: “Diad sikato et aromog so dala na propetas tan ed sasantos tan ed amin na saramay pinatey ed dalin.” (Apocalipsis 18:24) Ipanengneng na saya a say kasalanan ed dala so agawa la sakbay ni na inkiletneg na Babilonia, kinondena nen Jesus iray relihyoson papangulo na Judaismo, a pinmeket ed Babilonia a Baleg, sanen inkuanto: “Sikayoran uleg, poli na saray tadioko, panon so ibatik yo manlapud panangukom na Gehena? . . . Onsabi ed sikayo so amin a matunong a dala a niibung ed dalin, manlapud dala nen matunong ya Abel.” (Mateo 23:33-35) On, say palson relihyon, a ginmapo ed dalin ed panaon na rebelyon ed Eden, so nepeg ya onebat ed makapataktakot ya impankasalanan ed dala.
19, 20. (a) Anto so gawaen na saray tuan managdayew kayari kidapo na panangukom ed Babilonia a Baleg? (b) Anto so ontumbok a nagawa, tan anton ilalo so nilukas ed arap na amin a tuan managdayew?
19 Kayari kaderal na Babilonia a Baleg, saray tuan managdayew ed dalin so mibansag ed saray boses da dingan na mangatatawen a kuro a mankakanta: “Idayew si Jah, sikayon totoo! . . . Lapud indapo to so panangukom ed baleg a balangkantis . . . tan sikato so angibales ed dala na ariripen to ed lima to. . . . Tan say asewek a nanlapud sikato so amaatagey ed ando lan ando.”—Apocalipsis 19:1-3.
20 Insan saray arum a kabiangan na nanengneng ya organisasyon nen Satanas so naderal. (Apocalipsis 19:17-21) Kayari na saya, si Satanas, say angiletneg na amin a palson relihyon, tan dedemonyos to so nikalinsurong. Aglara bulos a mamasegsegang ed tuan managdayew nen Jehova. (Apocalipsis 20:1-3) Talonaan na puron relihyon so palson relihyon. Saray matoor a lalaki tan bibii a tinmulok ed madibinon pasakbay ya ontaynan la natan manlapud Babilonia a Baleg so walaan na pankanawnawan makaliktar tan makaloob ed balon mundo na Dios. Diman, sikaray makaagamil na tuan relihyon tan sigpot a mandayew ed si Jehova ed ando lan ando.
[Saray paimano ed leksab]
a Parad salaysay na panagdayew ed anghel ya abitla diad Colosas 2:18, nengnengen so The Watchtower, Hulyo 15, 1985, pahina 12-13.
b Parad malaknab a salaysay na sayan propesiya, nengnengen so libron Revelation—Its Grand Climax At Hand! inpalapag na Watchtower Bible and Tract Society of New York, Inc. kapitulo 33-6.
Suboken Yo so Kanonotan Yo
◻ Siopa talindeg ed relihyon so sankaimportantian, tan akin?
◻ Anton duaran kakaukolanen parad tuan relihyon so indanet nen Santiago?
◻ Anto so arum a kakaukolanen parad tuan panagdayew?
◻ Anton “maong a balita” so ipupulong na saray Tasi nen Jehova?
◻ Panon a say tuan relihyon so ontalona ed palson relihyon?
[Litrato ed pahina 17]
Saray relihyoson papangulo so nantitipon ed Assisi, Italya, nen Oktubre 1986
[Litrato ed pahina 19]
Lalanoren na tuan relihyon so pantitipon a nankakasakey parad panagdayew