Nepeg Tayo Kasin Manpikasid Saray Santo?

SIOPA ed sikayo so agto ni asali nanproblema tan kinmerew na tulong? Dependid klase na problema, nayarin manpili tayo na kaaro ya natatalosan to tayo tan akaeksperiensya lad dadalanen tayo. No say sakey et masimpatya tan dakel lay eksperiensya to, seguradon sikatoy labay tayon kaaro.

Nayarin ontan met so nalilikna na arum diad panagpikasi. Imbes ya asinggeran day Dios—ya parad sikara et atagtagey ya maong tan makapataktakot—mas labay da nin asinggeran iray santo. Say rason da et asali la kuno na saray santo iray subok tan kairapan ya dadalanen na totoo, kanian mas natalosan da itayo. Singa bilang, saramay akabalang na gamit ya importantid sikara et onaasingger ed “Saint” Anthony of Padua—say santo na saray abalang odino tinakew iran bengatla. No ipikasi day mansasakit ya ayep, nayarin pilien day “Saint” Francis of Assisi odino no talagan naeermenan ira et asinggeran day “Saint” Jude Thaddeus.

Balet panon tayon makaseguro a say pampikasid saray santo et base ed Biblia? Say pikakasi et pitotongtong ed Dios, kanian seguradon labay tayon naamtaan: Kasin dedengelen na Dios iray pikakasi tayo? Tan anto kasi nalilikna to no manpipikasi tayod saray santo?

NO ANTOY IBABAGA NA BIBLIA ED PANAGPIKASID SARAY SANTO

Say panagpikasid saray santo et base ed bangat na Katolikon Simbaan ya saray santo et manamegley. Say labay ton ibaga, “pampikasi na sakey ya para ed Dios et walay kanepegan to, pian onkerew na panangasi parad mankaukolan,” unong ed New Catholic Encyclopedia. Kanian say manpipikasid saray santo et maniilalo ya naebatan so kerew to panamegley da, lapud walad sikaray bendisyon na Dios.

Ontan kasi ibabangat na Biblia? Wala ray mangibabagan si Pablo so angibangat na pampikasid saray santo. Singa bilang, oniay insulat tod saray Kristiano ed Roma: “Natan et kerewen ko ed sikayo, agagi, diad panamegley nen Katawan tayon Jesu-Kristo tan diad panamegley na aro a manlalapud espiritu, a manseet kayo komon a mangipikasi ed siak diad Dios.” (Roma 15:30) Kasin kekerewen nen Pablo a mikasi iray kapara ton Kristiano ed Dios parad sikato? Andi. Si Pablo ingen komon so kerewen dan mikasid Dios parad sikara ta sikatoy apostol na Kristo. Ipapanengneng nen Pablo ya sarag tayon kerewen ed kapananisiaan tayon ipikasi to itayo. Balet baleg so pidumaan na satan ed pampikasid sakey ya papanisiaan a wala lad tawen pian ipaamta tod Dios iray kerew tayo. Akin?

Diad Ebanghelyo nen apostol Juan, oniay inkuan nen Jesus: “Siak so dalan tan say katuaan tan say bilay. Anggapo so makasabi ed Ama no aliwan diad panamegley ko.” (Juan 14:6) Inyarum to ni: “Iter na Ama so amin a bengatlan kerewen yod ngaran ko.” (Juan 15:16, Maung a Balita) Ag-imbaga nen Jesus ya sikatoy pampikasian tayo, insan sikatoy mitongtong ed Dios parad sikatayo. Imbes, pian dengelen na Dios iray pikakasi tayo, sikaton mismoy pampikasian tayo diad panamegley labat nen Jesus, anggapo lay arum.

Nen nampaibangat iray papatumbok nen Jesus ed sikato no panon so pampikasi, oniay inkuan to: “Sano manpikasi kayo, ibaga yo, ‘Ama, napasanto komon so ngaran mo.’” (Lucas 11:2) Kanian “sano” manpikasi tayo, nepeg a diad Dios labat, aliwan diad si Jesus odino ed anggan siopa. Diad sarayan malinlinew ya bangat nen Jesus, agta duga labat ya ibagan say Dios so nepeg a pampikasian tayo panamegley nen Jesus, aliwan anggan siopan manamegley odino “saray santo”?

Say pikakasi et talagan importantid panagdayew tayo, tan say pandayew ed anggan siopa likud ed Dios et agmitukoyan ed ibabangat na Biblia. (Juan 4:23, 24; Apocalipsis 19:9, 10) Kanian diad Dios tayo labat manpikasi.

KASIN NATATAKOT KAN MANPIKASID DIOS?

Diad Sermon nen Jesus ed Palandey, walay imbaga ton ilustrasyon nipaakar ed ugaw ya onkekerew na naakan ed ama to. Ikdan kasi na ama so anak to na bato imbes ya tinapay? Odino maditan uleg imbes ya sira? (Mateo 7:9, 10) Seguradon ag-itan gawaen na maaron Ama!

Natan, nonot mo pa itan ya ilustrasyon ed panmoria na ateng. Imadyin mon walay labalabay na anak mon kerewen ed sika. Balibali ulopan yo tan mainomay to kan naasinggeran. Balet lapud natatakot ta ompan manpasnok ka, impaibaga tod arum imay kerew to imbes ya sikaton mismoy mangibagad sika. Antoy naliknam? Panon to no kagagawa to la itan tan singa agla manguman? Naliketan ka kasi? Siempre andi! Labay na saray maaron atateng ya onasingger ed sikara iray ananak da tan ag-ira natatakot ya ibagay kaukolan da.

Nen ipapaliwawa nen Jesus so ilustrasyon na ugaw ya onkekerew na naakan, imbaga tod saray wadman: “Sirin, no sikayo et amta yoy mangiter na maong iran regalo ed saray anak yo anggano mauges kayo, say Ama yon walad tawen et mas lalon mangiter na maong iran bengatla ed saramay onkekerew ed sikato!” (Mateo 7:11) Seguradon labalabay na ateng so mangiter na maabig iran bengatla ed anak to. Balet mas labalabay na Ama tayon walad tawen a dengelen tan ebatan iray pikakasi tayo.

Labay na Dios ya sikatoy asinggeran tayo diad pampikasi anggano naiirapan tayo lapud saray kakapuyan tayo. Sikatoy agmangigaganggan na arum ya ondengel ed saray pikakasi tayo. Oniay ipapaseseg ed sikatayo na Biblia a gawaen: “Paawit mo ed Jehova so awit mo, et sikato bembenan to ka.” (Salmo 55:22) Imbes ya mandependid tulong na saray santo odino anggan siopa, nepeg a nawalaan itayo na maabig a panmoria ed si Jehova a Dios.

Aasikasoen na Ama tayon walad tawen so balang sakey ed sikatayo. Labay to tayon tulongan ed saray problema tayo tan iimbitaan to tayon onapit ed sikato. (Santiago 4:8) Malikeliket tayo ta walay pribilehyo tayon onasingger ed Ama tan Dios tayo, a ‘Dumerengel na pikakasi’!—Salmo 65:2.