Balon Membro na Mananguley ya Ulop

Inyanunsio nen Mierkoles na kabuasan, Setyembre 5, 2012 ed pamilyan Bethel diad United States tan Canada ya walay balon membro na Mananguley ya Ulop na Saray Tasi nen Jehova. Manlapu nen Setyembre 1, 2012, si Mark Sanderson et ginmapo lan nanlingkor ed satan a pribilehyo.

Si Brother Sanderson et pinabaleg na saray Kristianon atateng to diad San Diego, California, U.S.A., tan abautismoan nen Pebrero 9, 1975. Sikatoy ginmapon nampayunir diad Saskatchewan, Canada, nen Setyembre 1, 1983. Nen Disyembre 1990, sikatoy nan-graduate ed komapiton klase na Ministerial Training School (a natan et tatawagen ya Bible School for Single Brothers) diad United States. Sikatoy nagmaliw ya espisyal payunir diad isla na Newfoundland, Canada nen Abril 1991. Kayari ton nanlingkor bilang substitute a manangasikaso na sirkito, sikatoy naimbitaan a magmaliw ya membro na pamilyan Bethel diad Canada nen Pebrero 1997. Insan sikatoy inyalis ed United States branch nen Nobyembre 2000 pian manlingkor ed Hospital Information Services tan agnambayag et diad Service Department.

Nen Setyembre 2008, si Brother Sanderson et inmatendid School for Branch Committee Members tan kayari to et aturo bilang membro na Branch Committee ed Pilipinas. Tan nen Setyembre 2010, sikatoy naimbitaan ya ompawil ed United States pian manlingkor bilang katulongan ed Service Committee na Mananguley ya Ulop.