Balon Membro na Mananguley ya Ulop

NEN Mierkoles na kabuasan, Enero 24, 2018, malikeliket so pamilyan Bethel ed United States tan Canada nen arengel da iyan espisyal ya anunsio: Si Brother Kenneth Cook, Jr. et aturon balon membro na Mananguley ya Ulop na Saray Tasi nen Jehova.

Si Brother Cook et niyanak tan binmaleg ed Pennsylvania, U.S.A. Naaralan toy katuaan ed kaklase to antis iran man-graduate ed haiskul tan sikatoy abautismoan nen Hunyo 7, 1980. Sikatoy ginmapon nanlingkor ya sigpot-panaon bilang regular payunir nen Setyembre 1, 1982. Kayari ton nampayunir na duay taon, sikatoy naimbitaan ed Bethel, tan ginmapon nanlingkor ed Bethel diad Wallkill, New York, nen Oktubre 12, 1984.

Diad tinmumbok ya 25 taon, nanlingkor si Brother Cook ed nanduruman asainmin diad Printery tan Bethel Office. Nankasal ira nen Jamie nen 1996, tan akaiba ton nanlingkor ed Bethel diad Wallkill. Nen Disyembre 2009, si Brother tan Sister Cook et inyalis ed Watchtower Educational Center diad Patterson, New York, ya ditan et niyasain si Brother Cook ed Writing Correspondence Department. Nen Abril 2016, kayari na aganon impawil da ed Wallkill, si Brother tan Sister Cook et inyalis ed Brooklyn, New York. Kayari limaran bulan, inmalis ira ed world headquarters diad Warwick, New York. Nen Enero 2017, si Brother Cook et aturo bilang katulongan na Writing Committee na Mananguley ya Ulop.