MANUNAN ARTIKULO | ANTOY NABASA ED BIBLIA?
“Aromog Mi Lay Mesias”!
Manga 700 taon kayarin insulat so libron Miqueas, tinmua imay nabasan propesiya ditan nipaakar ed Mesias: Inyanak si Jesus ed Betlehem. Kayari manga 30 taon, nen 29 C.E., tinmua so unonan parte na propesiya nen Daniel nipaakar ed isabi na Mesias—abautismoan si Jesus tan sikatoy nilanaan na Dios panamegley na masanton espiritu. On, diad eksakton taon sinmabi so abayag lan tatalaranan ya Mesias, say “ilalak”!
Inggapon tampol nen Jesus so ministeryo to, ya “inyaabawag to so maong a balita na panarian na Dios.” (Lucas 8:1) Singa nipropesiya la, si Jesus et mapangasi, maomaong, tan manonot ed pankaabigan na arum. Praktikal tan maar-aro so panagbangat to, tan pinaabig to so “amin a klase na sakit,” a prueban sikatoy susuportaan na Dios. (Mateo 4:23) Sikatoy inasinggeran na totoo, ugaw man o matatken, tan nibaga ran: “Aromog mi lay Mesias”!—Juan 1:41.
Impasakbay nen Jesus ya antis ya uleyan na Panarian to so dalin, wala ni ray nagawan guerra, yegyeg, tan arum ni ran problema diad interon mundo. Binilin to so amin ya ‘mantultuloy a manbantay.’—Marcos 13:37.
Si Jesus et perpekton too ya nansiansian maunor ed Dios, balet sikatoy impapatey na saray mamubusol ed sikato. Say impatey to so perpekton bagat pian niwalad sikatayo imay abalang di Adan tan Eva—say agmanampot ya bilay ed Paraiso.
Tinmua so propesiyan ompatey si Jesus, tan tinmua met so propesiyan sikatoy bilayen na Dios bilang makapanyarin espiritu kayari taloran agew. Insan sikatoy nampanengneng ed masulok ya 500 a disipulo to. Antis ya pinmawil si Jesus ed tawen, ingganggan to ray papatumbok to ya ipulong dad “totoo ed amin a nasyones” so maong ya balita nipaakar ed sikato tan ed Panarian. (Mateo 28:19) Agawaan da kasi iyan kimey?