TEPETEPET NA SARAY MANBABASA

Antoy basiyan na saray Judio nen inmunan siglo akin et ‘tatalaranan’ day Mesias?

Akin ya tatalaranan na saray Judio ed saman a panaon so isabi na Mesias? Walay pigaran rason.

Nen nianak si Jesus, nampanengneng so anghel nen Jehova ed saray pastol ya mamabantay ed saray karnero da diad kaumaan ya asingger ed Betlehem. ⁽¹⁾ Imbalita na anghel: “Nianak ed sikayo natan ed syudad nen David so sakey a Manangilaban, say Kristo a Katawan.” (Luc. 2:8-11) Kayari to, “akiulop ed anghel so dakerakel nin anghel, ya indaydayew da so Dios, a kuan da:a ‘Nigloria so Dios ed katawenan, tan diad dalin et niwala so deen ed saray totoon aabobonan to.’”—Luc. 2:13, 14.

Seguradon baleg so epekto na satan a balita ed saraman ya mapaabeban pastol. Linma ran tampol ed Betlehem insan nen nalmo day Jose tan Maria tan say ugaw nin Jesus, “impakabat da imay nibaga ed sikara nipaakar ed sayan ugaw.” Bilang resulta, “nikelkelawan so amin ya akadngel ed saray bengatlan imbaga na saray managpastol.” (Luc. 2:17, 18) Ipapanengneng na saramay salitan “amin ya akadngel” ya wala ni arum ya angibagaan na saray pastol likud ed si Jose tan Maria. Insan nen pasempet la ra, “inggloria tan indaydayew da so Dios lapud amin a bengatlan nadngel tan anengneng da, unong a nibaga ed sikara.” (Luc. 2:20) On, ag-insekreto na saraman a pastol iray maong a bengatlan nadngelan da nipaakar ed Kristo!

Nen inyakar di Maria so panguloan ya anak dad Jerusalem pian ipresentad si Jehova bilang panangunor ed Mosaikon Ganggan, wadman si propetesan Ana, tan “akisalamat ed Dios tan intongtong to so ugaw ed amin na saramay manatalaran ed kiliktar na Jerusalem.” ⁽²⁾ (Luc. 2:36-38; Exo. 13:12) Kanian nantultuloy ya kinmayat so balita nipaakar ed Mesias.

Kayari to, “wala ray astrologo a nanlapu ed bukig a linma ed Jerusalem, ya inkuan da: ‘Iner so kawalaan na samay nianak ya ari na saray Judio? Ta anengneng mi so bitewen to sanen wala kami ed bukig, kanian linma kami dia pian sikatoy igalang mi.’” (Mat. 2:1, 2) Nen nadngel itan nen Arin Herodes, “sikatoy agonigon ontan met na amin a kaiba to ed Jerusalem; tan sanen tinipon to so amin a manunan saserdote tan eskriba na saray totoo, tinepetan to ra no iner so pangiyanakan ed Kristo.” ⁽³⁾ (Mat. 2:3, 4) Dakel sirin so akabalitan sinmabi la imay insipan a Mesias!b

Base ed Lucas 3:15, iisipen na arum a Judio ya si Juan a Managbautismo so Kristo. Balet pinatunda nen Juan itan ya espikulasyon nen imbaga ton: “Samay onsabin katumbokan ko et mas mabiskeg nen siak, ya agak anggan makanepegan a mangekal ed sandalyas to. Sikato so manbautismo ed sikayo ed masanton espiritu tan ed apoy.” (Mat. 3:11) Lapud satan ya imbaga nen Juan, segurado ya lalon tinalaranan na saray Judio so Mesias.

Kasin kinuenta na saray Judio nen inmunan siglo so panaon na isabi na Mesias base ed samay propesiya nipaakar ed 70 simba ya nabasad Daniel 9:24-27? Posible, balet agtayo segurado. Diad tua, nen panaon nen Jesus et dakel so mankokontraan ya interpretasyon nipaakar ed 70 simba, tan arawdawi iratan ed pakatalos tayo natan.c

Saray Essenes, Judion sekta ya say panagbilay da et singa saray monghe, et manisian duaran Mesias so onsabi anggad manampot so 490 taon, balet agtayo segurado no imbase da itan ed propesiya nen Daniel. Anggano ontan bilang so ginawa ra, imposiblin panisiaan na karaklan a Judio so kalkulasyon na ontan ya sekta.

Wala ray Judio nen komaduan siglo C.E. ya manisian samay 70 simba et manlapud impakaderal na inmunan templo nen 607 B.C.E. anggad impakaderal na komaduan templo nen 70 C.E. Papanisiaan balet na arum ya asumpal itan a propesiya nen panaon na saray Maccabeo nen komaduan siglo B.C.E. Kanian agtalaga malinew ed sikara no panon ya kuentaen so 70 simba.

No dugay pakatalos na saray Judio nen inmunan siglo C.E. ed samay 70 simba, inusar komon itan na saray apostol tan arum nin Kristiano nen inmunan siglo bilang prueba ya dugaruga so insabi na Mesias diad panaon nen Jesu-Kristo. Balet anggapoy ebidensya ya ginawa da itan.

Wala ni sakey ya punton marakep ya ikonsidera. Mabetbet ya idadanet na saray angisulat ed Ebanghelyo ya wala ray espisipikon propesiya ed Hebreon Kasulatan ya asumpal ed si Jesu-Kristo. (Mat. 1:22, 23; 2:13-15; 4:13-16) Balet anggapon balot ed sikara so angisulat ya say impanbilay nen Jesus diad dalin et walay koneksion tod samay propesiya nipaakar ed 70 simba.

Bilang sumaryo: Agtayo segurado ya diad panaon nen Jesus et dugay pakatalos na saray totoo ed samay propesiya nipaakar ed 70 simba. Balet nabasad Ebanghelyo so arum ya makatunongan iran rason no akin ya ‘tatalaranan’ na saray totoo so Mesias.