EBAT ED SARAY TEPET ED BIBLIA

Panon ya naaralan na ananak ya aroen so Dios?

Ateng ya uusaren to ray pinalsa pian bangatan so anak to — Usaren iray pinalsa pian nakabat tan naaro na anak mo so Dios

Naaralan labat na ananak mo ya aroen so Dios no kombinsido iran walan talagay Dios tan inaro to ra. Kaukolan dan nakabat so Dios pian naaro da. (1 Juan 4:8) Singa bilang, nepeg dan naamtaan: Akin ya pinalsa na Dios so too? Akin ya aabuloyan na Dios so paniirap? Antoy gawaen na Dios parad saray totoo diad arapen?—Basaen so Filipos 1:9.

Pian natulongan moy ananak mo ya aroen so Dios, ipanengneng mon sikan mismo et inarom so Dios. No nanengneng da itan ed sika, aligen da ka.—Basaen so Deuteronomio 6:5-7; Uliran 22:6.

Panon mon nasabi so puso na anak mo?

Say Salita na Dios et mabiskeg. (Hebreos 4:12) Kanian ibangat ed anak mo iray manunan bangat na Biblia. Pian nasabi puso na totoo, si Jesus et angusar na saray tepet, insan dinmengel, tan impaliwawa toy Kasulatan. Ontan met, pian nasabi puso na anak mo, alig moy paraan na panagbangat nen Jesus.—Basaen so Lucas 24:15-19, 27, 32.

Saray istorya ed Biblia no panon so impideneng na Dios ed saray totoo et makatulong met pian nakabat tan naaro na ugugaw so Dios. Wala ray nausar ya publikasyon ya available ed www.jw.org/pag.—Basaen so 2 Timoteo 3:16.

Parad kaaruman ya impormasyon, nengnengen so kapitulo 14 na sayan libro, Anto so Peteg ya Ibabangat na Biblia?, ya im-publish na Saray Tasi nen Jehova

Available ed www.jw.org/pag o man-request na libren kopya ed address ya walad pahina 2