EBAT ED SARAY TEPET ED BIBLIA
Panon kan magmaliw a maong ya ateng?
Kasin ibabangat mo ray anak mo ya aroey dios?
Say sankaabigan ya balegan na ananak et diad ayaman ya manaaroan tan manrerespetoan iray atateng. (Colosas 3:14, 19) Aaroen na maaron atateng iray anak da tan ibabaga dad sikaray panangapresya ra, singa met ed impangapresya nen Jehova ya Dios ed Anak to.—Basaen so Mateo 3:17.
Dedengelen na Ama tayod tawen iray lingkor to, tan iimanoen to ray nalilikna ra. Nepeg ya sikatoy aligen na atateng tan dengelen day ibaga na ananak da. (Santiago 1:19) Kaukolan ya agda ibabaliwala so naliliknay ananak da, anggan saray negatibon ibabaga ra.—Basaen so Numeros 11:11, 15.
Panon mon napabaleg ya responsable iray anak mo?
Bilang ateng, walay kanepegan mon manggaway totontonen. (Efeso 6:1) Makaaral kad alimbawa na Dios. Ipapanengneng toy panangarod ananak to diad saray malinew ya ganggan to tan ibabaga to no antoy nagawa no agda itan unoren. (Genesis 3:3) Balet agto pue-puersaen iray totoo ya onunor, noagta ibabangat to ra no panon iran minabang no gawaen day duga.—Basaen so Isaias 48:18, 19.
Panseetan mon tulongan iray ananak mo ya naaro so Dios. Diad ontan et marunong so ikiwas da anggano agmo ra kaiba. Singa say Dios ya manbabangat panamegley na alimbawa ton mismo, ibangat mo ray ananak mo panamegley na alimbawam.—Basaen so Deuteronomio 6:5-7; Efeso 4:32; 5:1.