“Satan et Unong ed Panlabayan Mo”

1. Antoy rason no akin ya si Jesus et “aliketan a maong ed masanton espiritu”? (Nengnengen so litratod sayan pahina.)

ANTO kasi itsura nen Jesu-Kristo nen sikatoy “aliketan a maong ed masanton espiritu”? Anganko et naimadyin mon anggad layag so imis to tan saray mata to et makakaimis met. Akin ya aliketay Jesus? Kakkapangibaki tod 70 disipulo to pian ipulong so maong a balita na Panarian na Dios. Interesadon maong no panon dan nagawaan itan. Dakel so maimpluensian totoo ya onkokontrad maong a balita, singa saray eskriba tan Fariseo ya atagey so aral da. Lapud impluensya ra, say pakanengneng na dakel a totoo ed si Jesus et sakey labat a karpentero tan saray disipulo to et “abebay-aral tan ordinaryo.” (Gawa 4:13; Mar. 6:3) Anggaman ontan, malikeliket ya pinmawil iray disipulo to. Akapanpulong ira anggano susumpaen ira na totoo tan na saray demonyo! Akin ya maliket tan makpel ira?​—Basaen so Lucas 10:1, 17-21.

2. (a) Akin ya saray disipulo nen Jesus et singa ugugaw? (b) Panon ya atalosan na saray patumbok nen Kristo so importante iran katuaan?

² Imanoen so imbaga nen Jesus ed si Jehova: “Idayew ta ka ed arap na totoo, Ama, a Katawan na tawen tan dalin, lapud inyamot mo irayan bengatla ed saray marunong tan mautek balet imparungtal mo iraya ed saray ugugaw. On, Ama, ta say panggawa ed satan et unong ed panlabayan mo.” (Mat. 11:25, 26) Siempre, aglabay ya ibaga nen Jesus a saray disipulo to et literal ya ugugaw. Imbes, amta to ya singa ra ugugaw no ikomparad saray mautek tan de-aral ed bansa ra, ya say pakanengneng dad sarili da et marundunong ira. Sakey ni, imbangat nen Jesus ed saray patumbok to ya magmaliw iran singa ugaw, ya mansiansia ran mapaabeba tan mabulos ya paibangat. (Mat. 18:1-4) Antoy maabig ya resulta na inkamapaabeba ra? Inusar nen Jehova so masanton espiritu to pian natalosan day importante iran espiritual a katuaan, balet saramay marunong tan mautek ya mamabalaw ed sikara et abulag nen Satanas tan na mismon inkamapaatagey da.

3. Antoy pantongtongan tayod sayan artikulo?

³ Kampegan malikeliket si Jesus! Anengneng to no panon ya imbangat nen Jehova so aralem iran espiritual a katuaan ed mapaabeban totoo, antokaman so edukasyon odino abilidad da. Aliketan si Jesus lapud labay nen Ama to so simpli tan malinew ya panagbangat. Kasin anguman si Jehova? Tan antoy paneknek ya ontan nin siansiay labay ton paraan na panagbangat? Legan tayon aaralen so ebat, seguradon naliketan tayo a singa si Jesus.

SARAY ARALEM A KATUAAN YA NATALOSAN NA AMIN

4. Akin et nibaga tayon regalo so pinasimplin edisyon na The Watchtower?

⁴ Diad apalabas iran taon, say espiritual ya instruksion ya iiter na organisasyon nen Jehova et mangidadanet ed mas simpli tan malinew ya panagbangat. Nengnengen tayoy taloran alimbawa. Unona, niwalay pinasimplin edisyon na The Watchtower.a Sayan edisyon et nibagan regalo ed saramay nanairapan ya manbasa odino nanairapan ed lenguahen uusaren da ed panagaral na sayan magasin. Naimano na saray ulo na pamilya ya mas mibibiang la natan iray anak da ed panaaral dad sayan magasin, ya manunan uusaren na matoor ya aripen pian napakan itayod espiritual. Dakel so angibalikas na impapuson apresasyon ed satan. Insulat na sakey a sister ya dati et sikatoy manaalangan ya mankomento diad Panagaral na Panag-bantayan lapud mabaing. Balet natan et andi la! Nen say uusaren to la et pinasimplin edisyon, insulat to: “Maminpiga ak la natan ya makakapankomento, tan agak la natatakot! Misalsalamat ak ed si Jehova tan ed sikayo.”

5. Antoy nibaga tayod revised edition na New World Translation of the Holy Scriptures?

⁵ Komadua, in-release so revised edition na New World Translation of the Holy Scriptures ed English diad annual meeting nen Oktubre 5, 2013.b Dakel ya teksto so tinmikey, balet ag-anguman so kabaliksan na saratan, odino mas malinew ni ingen. Singa bilang, dati et 27 ya salita so Job 10:1, natan et 19 labat la; dati et 20 ya salita so Uliran 8:6, natan et 13 labat la. Mas malinew iratan ya teksto diad balon edisyon. Diad tua, oniay imbaga na sakey ya alanaan ya brother ya pigaran dekada lan matoor ya manlilingkor: “Kakkayarik ya abasa so libron Job diad balon edisyon, tan pakaliknak et singa natan ko labat atalosan!” Ontan met so komento na dakel.

6. Antoy naliliknam ed balon pakatalos tayod Mateo 24:45-47?

⁶ Komatlo, wala ray balon pananguman ed pakatalos tayo. Singa bilang, talagan aliketan tayo nen malinew tayon atalosan so nipaakar ed “matoor tan makabat ya aripen,” diad Hulyo 15, 2013 ya isyu na Panag-bantayan. (Mat. 24:45-47) Impaliwawa ditan a say matoor ya aripen et say Mananguley ya Ulop, tan “saray lingkor na sankaabungan” et amin ya papakanen ed espiritual, balanglan alanaan odino kabiangan na ‘arum a karnero.’ (Juan 10:16) Makapaliket ya aralen iratan tan ibangat ed saray balo ni ed katuaan! Anto ni ray paneknek ya labay nen Jehova so simpli tan malinew ya panagbangat?

MAS SIMPLI TAN MAS MALINEW YA EKSPLINASYON NA SARAY SALAYSAY ED BIBLIA

7, 8. Anto ray pigaran alimbawa na pinuyanan iran mapropetikon simbolo diad Biblia?

⁷ No pigaran dekada ka lan manlilingkor ed si Jehova, nayarin naimanom ya kalkalnan anguman so paraan na panangipaliwawa na saray literatura tayo ed dakel ya salaysay diad Biblia. Panon? Nensaman, maslak et nabasa tayod saray literatura tayo so tipiko tan antitipiko sano nipapaliwawa iray salaysay ed Kasulatan. Samay salaysay so tipiko, tan say mapropetikon kasumpalan na satan so antitipiko. Wala kasi Makasulatan ya basiyan na satan? Wala. Singa bilang, binitla nen Jesus so “tanda nen Jonas a propeta.” (Basaen so Mateo 12:39, 40.) Impaliwawa nen Jesus ya say impansiansia nen Jonas ed eges na sira​—ya ditan la komon so nagmaliw ya lubok to no ag-inliktar nen Jehova—​et angisimbolo ed kabayag na pansiansia nen Jesus ed lubok.

⁸ Wala ni arum a pinuyanan ya mapropetikon simbolo diad Biblia. Insulat nen apostol Pablo so pigara ed saratan. Singa bilang, say relasyon nen Abraham ed si Hagar tan Sara et mangisisimbolo ed relasyon nen Jehova ed literal ya Israel tan ed kabiangan na organisasyon na Dios ya walad tawen. (Gal. 4:22-26) Ontan met, say tabernakulo tan templo, Agew na Pananakbong, say atagey ya saserdote, tan arum nin aspekto na Mosaikon Ganggan et “mangiyaanino ed saray maabig ya onsabi.” (Heb. 9:23-25; 10:1) Makapalikliket tan makapabiskeg na pananisia so panaral ed saratan ya simbolo. Balet, kasin amin ya karakter, ebento, tan bengatla ya adeskribe ed Biblia et walay iyaanino odino irerepresenta to?

9. Panon ya impaliwawa nensaman so salaysay na Biblia nipaakar ed si Nabot?

⁹ Nensaman, mabetbet ya ontan so paraan na panangipaliwawa ed saray salaysay ed Biblia. Laen tayo pan alimbawa so salaysay nipaakar ed si Nabot, ya impapatey na mauges ya reynan si Jezebel pian nasamsam na asawa ton si Ahab so kaubasan nen Nabot. (1 Ara. 21:1-16) Nen 1932, impaliwawa iyan salaysay bilang mapropetikon drama. Imbagan isisimbolo nen Ahab tan Jezebel si Satanas tan say organisasyon to; irerepresenta nen Nabot si Jesus; tan say impamatey ed si Nabot et angiyaninod impamatey ed si Jesus. Kalabas balet na pigaran dekada, diad libron “Let Your Name Be Sanctified” ya im-publish nen 1961, nabasan ililitrato nen Nabot iray alanaan, tan si Jezebel et say Kakristianoan. Kanian, say impamairap nen Jezebel ed si Nabot et mangirerepresentad impamairap ed saray alanaan legay kaunoran iran agew. Diad dakel a taon, sayan eksplinasyon et amabiskeg ed pananisia na saray lingkor na Dios. Akin balet ya anguman so paraan na panangipaliwawad saray salaysay ed Biblia?

10. (a) Panon ya mas maalwar la so panangipaliwawad pigaran salaysay na Biblia? (b) Anto lay mas akapokusan na saray literatura tayo natan?

¹⁰ Diad inlalabas na taon, amta tayon tutulongan nen Jehova so “matoor tan makabat ya aripen” ya magmaliw a mas makabat. Lapud satan, nagmaliw ya mas maalwar so aripen antis ton ibaga a say sakey a salaysay ed Biblia et mapropetiko, puera labat no walay malinew a basiyan ed Kasulatan ya talagan mapropetiko itan. Sakey ni, anengneng ya say arum ya eksplinasyon nensaman nipaakar ed tipiko tan antitipiko et mair-irap ya talosan. Saray detalye na ontan ya eksplinasyon—say simbolo tan no siopay isisimbolo to tan akin—et nayarin aliwan malinew, agmainomay ya tandaan, tan mairap ya iyaplika. Manuna ed amin, no say iimanoen tayo et saray posiblin mapropetikon kasumpalan na saray salaysay ed Biblia, nayarin nibaliwala tayo la ray moral tan praktikal a leksion ya naaralan ed saratan. Kanian diad saray literatura tayo natan, nabasa tayo lay mas simpli tan praktikal iran leksion nipaakar ed pananisia, panagsungdo, debosyon ed Dios, tan arum nin importantin kualidad ya naaralan tayod saray salaysay ed Biblia.c

11. (a) Panon tayon talosan natan so salaysay nipaakar ed si Nabot, tan akin ya amin tayo et makaaral ed alimbawa to? (b) Akin ya diad apalabas iran taon et matalag tayo lan makabasa nipaakar ed tipiko tan antitipiko ed saray publikasyon tayo? (Nengnengen ed sayan isyu so “Tepetepet na Saray Manbabasa.”)

¹¹ Panon tayo sirin ya talosan natan so salaysay nipaakar ed si Nabot? Diad mas malinew tan simplin paraan. Inatey itan ya matunong a too lapud nansiansian matoor, aliwan lapud isisimbolo to si Jesus odino saray alanaan. Inunor toy ganggan nen Jehova anggano amta ton say nakalaban to et mauges ya ari. (Num. 36:7; 1 Ara. 21:3) Makaaral tayod alimbawa to, ta anggan siopa ed sikatayo et nayarin napasegsegang lapud panguunor tayod si Jehova. (Basaen so 2 Timoteo 3:12.) Satan ya leksion ya makapabiskeg na pananisia et mainomay ya tandaan, talosan, tan iyaplika na amin ya Kristiano.

12. (a) Antoy agtayo nepeg ya isipen nipaakar ed saray salaysay ed Biblia? (b) Akin ya malinew so panangipaliwawa tayod anggan saray aralem iran bengatla? (Nengnengen so footnote.)

¹² Balet, kasin isipen tayon saray salaysay ed Biblia et walaan labat na praktikal a leksion tan anggapo lay arum ya kabaliksan na saratan? Andi. Natan et mas mabetbet ya ibabangat na saray publikasyon tayo ya say sakey ya salaysay et mangipanonot ed situasyon ya nayarin mipara ed satan. Balet aliwa lan diad panamegley na tipiko tan antitipiko. Singa bilang, say impanmatoor nen Nabot anggano sikatoy apasegsegang tan nipeligroy bilay to et mangipanonot ed impanmatoor nen Kristo tan saray alanaan. Balet ipanonot met na satan so panmamatoor na ‘arum a karnero’ na Katawan. Say ontan ya malinew tan simplin panangikompara so panagbangat ya labay na Dios.d

MAS SIMPLIN EKSPLINASYON ED SARAY ILUSTRASYON NEN JESUS

13. Anto ran alimbawa so mangipapanengneng ya natan et mas simpli tan malinew so impangipaliwawa na literatura tayo ed saray ilustrasyon nen Jesus?

¹³ Si Jesu-Kristo so sankamaongan ya Managbangat a nambilay ed dalin. Sakey ed saray paborito ton paraan na panagbangat et say pangusar na saray ilustrasyon. (Mat. 13:34) Saray malinew ya deskripsion ed ilustrasyon et pan-imadyinen toy nonot tan sabien toy puso. Kasin diad apalabas iran taon et nagmaliw ya mas simpli tan malinew so impangipaliwawa na literatura tayod saray ilustrasyon nen Jesus? On! Seguradon malikeliket tayo nen linminew so pakatalos tayod saray ilustrasyon nen Jesus nipaakar ed lebadura, bukel na mustasa, tan iket ya inaral tayod Hulyo 15, 2008 ya Panag-bantayan. Anengneng tayo ya sarayan ilustrasyon et ontutukoy ed Panarian na Dios tan ed makapakelkelaw ya idarakel na tuan papatumbok nen Kristo ed sayan mauges a mundo.

14. (a) Panon tayon impaliwawa nensaman so parabolo nen Jesus nipaakar ed maong ya Samaritano? (b) Antoy pakatalos tayo la natan ed satan ya parabolo nen Jesus?

¹⁴ Panon to balet iramay mas detalyadon istorya, odino parabolo nen Jesus? Siempre say arum ed saratan et simboliko tan mapropetiko; say arum et pakaaralan na praktikal iran leksion. Balet panon tayon nibaga? Diad inlalabas na taon, kalkalnan nagmaliw ya malinew so ebat. Singa bilang, nengnengen tayo pa no panon ya impaliwawa nensaman so parabolo nen Jesus nipaakar ed maong ya Samaritano. (Luc. 10:30-37) Nen 1924, imbaga na The Watch Tower ya say Samaritano et isisimbolo toy Jesus; say palusor ya dalan manlapud Jerusalem paonlad Jerico et mangisisimbolo ed inloor na kaugsan manlapud impanrebelde ed Eden; saramay matakew ed dalan et mangililitratod saray angkabaleg ya korporasyon tan negosyante; tan samay saserdote tan Levita et mangirerepresentad saray sistema na relihyon. Balet natan, satan ya ilustrasyon et uusaren ed literatura tayo pian ipanonot ed amin ya Kristiano ya anggapoy nepeg ya lalabien tayo diad itulong tayod saray mankaukolan, lalo lad espiritual ya paraan. Agta maliket tayo ya lalon palilinewen nen Jehova iray bangat to?

15. Antoy aralen tayod ontumbok ya artikulo?

¹⁵ Diad ontumbok ya artikulo, aralen tayo so sakey nin parabolo nen Jesus—say nipaakar ed samploran mamarikit. (Mat. 25:1-13) Bilang patumbok nen Jesus ed sarayan kaunoran ya agew, panon so nepeg ya pantalos tayo ed satan ya ilustrasyon? Kasin bilang mapropetikon simbolo ya walay ililitrato ton persona, bengatla, tan ebento? Odino kasin labay nen Jesus ya usaren itan na saray patumbok to bilang praktikal ya leksion ya mangigiya ed sikara ed sarayan kaunoran ya agew? Nengnengen tayo.