Kasin Mansasagpot Ka Pian Naalig Moy Inkatatken nen Kristo?

1, 2. Anton klase na inkatatken so nepeg ya dampoten na kada Kristiano? Iyilustra.

NO MANPIPILI na prutas ed tindaan so eksperiensyadon nanay, aliwan lanang ya saramay angkabaleg odino mamurmura so pilien to. Imbes, say pilien to et iramay aluto la. Ontan met, say labay ton prutas et amay malamis, ambalingit, tan masustansia. On, say pilien to et amay prutas ya matatken la.

² No say sakey et indedika toy bilay tod si Jehova tan nampabautismo, tuloytuloy nin onaligwas. Labay toy ontatken bilang Kristiano. Say tutukoyen tayo dia ya itatatken et aliwan pisikal noagta espiritual. Diad samay sulat nen apostol Pablo ed saray Kristiano ed Efeso, imbaga ton nepeg ya ontatken irad espiritual. Pinaseseg to ran ‘dampoten so pankakasakey ed pananisia tan suston pikakabat ed Anak na Dios, ya anggad magmaliw iran baleg lan too, a nasabi day suston kaatagey (odino inkatatken) ya asabi nen Kristo.’​—Efe. 4:13.

3. Antoy situasyon ed kongregasyon diad Efeso nensaman ya mipara ed saray lingkor nen Jehova natan?

³ Nen insulat itan nen Pablo, abayag lan niletneg so kongregasyon ed Efeso. Dakel ya disipulo ditan so tinmatken la ed espiritual. Balet wala ray arum ya kaukolan da ni manpatatken. Ontan met iray Tasi nen Jehova natan. Dakel ya agagi so abayag lan manlilingkor ed Dios tan tinmatken la rad espiritual. Balet siempre, aliwan amin et ontan. Singa bilang, nilibo so nababautismoan kada taon, kanian say arum et kaukolan da ni manpatatken ed espiritual. Sika ey?​—Col. 2:6, 7.

PANON YA ONTATKEN SO SAKEY A KRISTIANO?

4, 5. Akin ya nibagan aliwan parepareho iray Kristianon matatken ed espiritual, balet antoy pakabidbiran ya matatken irad espiritual? (Nengnengen so litratod gapo na artikulo.)

⁴ No nengnengen mo ray aluto lan prutas diad tindaan, aliwa ran parepareho. Balet wala ray pakabidbiran ya aluto la ra. Ontan met ed saray Kristianon matatken ed espiritual. Aliwan parepareho so bansa, kipapasen, kondisyon na laman, edad, tan saray eksperiensya da. Nanduruma ni ingen so personalidad tan kultura da. Balet, amin da et walaan na saray kualidad ya pakabidbiran ya matatken irad espiritual. Anto iratan ya kualidad?

⁵ Say matatken ya Kristiano et aaligen toy alimbawa nen Jesus, tan tutumboken ton “maapit iray bakat to.” (1 Ped. 2:21) Imbaga nen Jesus ya say sankaimportantian a gawaen na sakey a too et aroen toy Jehova ed interon puso, kamarerwa, tan nonot, tan aroen toy kapara ton too a singa ed panangaro tod sarili to. (Mat. 22:37-39) Pansasagpotan na Kristianon matatken ed espiritual ya iyaplika itan ya simbawa. Napatnagan ed kabibilay to ya sankaimportantian ed sikato so relasyon tod si Jehova tan ipapanengneng toy masakripisyon aro ed arum.

6, 7. (a) Anto ray pigaran kualidad ya pakabidbiran a say sakey a Kristiano et matatken ed espiritual? (b) Antoy nepeg ya itepet tayod sarili tayo?

⁶ Balet amta tayo ya say aro et sakey labat ed saray aspekto na bunga na espiritu ya ipapanengneng na sakey a Kristianon matatken ed espiritual. (Gal. 5:22, 23) Importante met iray arum ya aspekto, ya singa say inkaulimek, panangontrol ed dili, tan panag-anos. Ontulong iratan pian anggano mairap so situasyon to et ag-onsyodot tan anggano onkakapuy so liknaan to et agnaekalay ilalo. Diad personal ya panagaral to et tuloytuloy ya manaanap na saray Makasulatan ya prinsipyo ya ontulong ed sikaton nibiig so duga ed aliwa. Kanian nanengneng ed saray desisyon to ya sikatoy matatken ed espiritual. Singa bilang, uusaren toy konsiensia ton nipasal ed Biblia. Say maespiritual ya Kristiano et ipapanengneng toy kapaabebaan kanian bibidbiren to ya mas maabig iray paraan tan estandarte nen Jehova nen say sarili ton paraan tan panlabayan.a Maseseg ton ipupulong so maong a balita tan mitutulongan pian niwalay pankakasakey ed kongregasyon.

⁷ Anggano abayag tayo lan manlilingkor ed si Jehova, tepetan tayoy sarili tayo, ‘Kasin wala ni ray kaukolan kon paaligwasen pian mas natumbok koy Jesus, diad ontan et tuloytuloy ak ya ontatken ed espiritual?’

“SAY ANAWET A NAAKAN ET PARAD SARAY MATATKEN LA”

8. Antoy nibaga tayod kakabatan tan pakatalos nen Jesus ed Kasulatan?

⁸ Kabisadon maong nen Jesu-Kristo so Salita na Dios. Anggano 12 años to ni labat et nipaliwawa to lay Kasulatan ed saray katongtong ton managbangat diad templo. “Amin ya ondedengel ed sikato et mankelkelaw ed pakatalos to tan ed saray ebat to.” (Luc. 2:46, 47) Kalabas na pigaran taon, legan na ministeryo to, ag-akasel iray mamubusol ed sikato diad impangusar toy Salita na Dios nen akikatunongan ed sikara.​—Mat. 22:41-46.

9. (a) Anto ran eskedyul na panagaral na Biblia so ontulong ed Kristiano ya labay toy ontatken ed espiritual? (b) Antoy gagala na panagaral na Biblia?

⁹ No say sakey et labay toy ontatken ed espiritual, nepeg ton aligey Jesus tan aglabat mankontento ed saray amta ton manunan bangat na Biblia. Regular ton aralen iray aralem ya katuaan, ta amta ton “say anawet a naakan et parad saray matatken la.” (Heb. 5:14) On, labay na Kristianon matatken ed espiritual so nawalaan na “suston pikakabat ed Anak na Dios.” (Efe. 4:13) Kasin walay eskedyul mo parad inagew-agew ya pambasay Biblia? Kasin mangigagana kay panaon parad personal ya panagaral tan panagdayew na pamilya kada simba? Legan mon aaralen so Biblia, imanom iray Makasulatan ya prinsipyo ya ontulong ed sikan mas natalosan so panagnonot tan liknaan nen Jehova. Insan usar mo iratan ya prinsipyo sano mandedesisyon ka. No ontan so gawaen mo, lalo kan onapit ed si Jehova.

10. Antoy nalilikna na Kristianon matatken ed espiritual ed saray simbawa tan prinsipyo na Dios?

¹⁰ Amta na Kristianon matatken ed espiritual ya aliwan magenap so basta panaral labat na Biblia. Imbes, kaukolan ton aroen iray simbawa tan prinsipyo na Dios. Nagawaan to itan no iprayuridad tod bilay to so panggawad linawa nen Jehova imbes ya say sarilin panlabayan to. Sakey ni, kaukolan ton pansagpotan ya “lakseben” iray datin kagagawa tan ugali to. Insan to isulong so balon personalidad, ‘ya apalsa unong ed linawa na Dios tan mitunosan ed tuan inkatunong tan katooran.’ (Basaen so Efeso 4:22-24.) Tandaan ya inusar na Dios so masanton espiritu to pian igiya iray nansulat na Biblia. Kanian no say sakey a Kristiano et papaaralemen toy kakabatan tan panangaro tod saray estandarte na Biblia, singa to lulukasan so puso tan nonot to pian awaten so panangigiya na masanton espiritu. Ontulong itan ed itatken tod espiritual.

MITULONGAN PIAN NIWALAY PANKAKASAKEY

11. Antoy naeksperiensya nen Jesus diad impilimog tod saray kapamilyaan tan disipulo to?

¹¹ Nen nambilay si Jesus diad dalin bilang perpekton too, saray kalimog to et aliwan perpekto. Aliwan perpekto iray atateng ya amabaleg ed sikato, tan pati saray agagi to ya kaamong to na pigaran taon. Anggan saray patumbok to ya maapit ed sikato et naimpluensyaan na maambisyon tan mapaatagey ya ugali. Singa bilang, diad samay labi antis ya pateyen si Jesus, ‘walay agawan ampetang a sangsangan ed sikara no siopa so manunaan.’ (Luc. 22:24) Balet matalek si Jesus ya anggano aliwan perpekto iray patumbok to, sarag day ontatken ed espiritual tan mantulongan bilang nankakasakey a kongregasyon. Diad saman met lanlamang a labi, impikasi nen Jesus ya mankakasakey komon iray apostol to, ya oniay kinerew tod Ama to ed tawen: “[Komon ta] amin da et magmaliw a saksakey, a singa sika, Ama, ya akikasakey ed siak tan akikasakey ak ed sika, ta pian mikasakey met ira ed sikata, . . . pian magmaliw iran saksakey a singa sikata et saksakey.”​—Juan 17:20-22.

12, 13. (a) Panon ya idadanet na Efeso 4:15, 16 ya importante so pitulongan pian niwalay pankakasakey ed kongregasyon? (b) Panon ya alabanan na sakey a brother so kakapuyan to ya lapud satan et naaralan toy mitulongan pian niwalay pankakasakey ed kongregasyon?

¹² Say Kristianon matatken ed espiritual et mitutulongan pian niwalay pankakasakey ed kongregasyon. (Basaen so Efeso 4:1-6, 15, 16.) Labay tayo ya amin tayon lingkor na Dios et “mantutunosan” tan mantutulongan. Unong ed Salita na Dios, pian mankakasakey tayo, kaukolan ya mapaabeba tayo. Say Kristianon matatken ed espiritual et mapaabeban mitulongan pian niwalay pankakasakey, anggano nanenengneng toy kakapuyan na arum. Antoy reaksion mo no walay nanengneng mon kakapuyan na sakey ya agi? Odino panon to no sikan mismo so asakitan na kakongregasyon mo? Kasin agmo la katongtongen? Odino manggawa kay paraan pian naayos so problema? Say Kristianon matatken ed espiritual et ayosen toy problema, imbes ya sikato so panlapuay problema.

¹³ Imanoen pay alimbawa nen Uwe. Dati et main-inomay toy onsyodot ed kakapuyan na agagi. Balet panamegley na Biblia tan Insight on the Scriptures, inaral toy bilay nen David. Akin ya say bilay nen David so pinili ton aralen? Imbaga nen Uwe: “Anengneng a mismo nen David so aliwliwan ugali na saray kapara ton mandadayew ed Dios. Singa bilang, sikatoy labay ya pateyen nen Arin Saul, aminsan et wala ray Israelita ya malabay ya manupak ed sikato, tan sikatoy minelmelag na mismon asawa to. (1 Sam. 19:9-11; 30:1-6; 2 Sam. 6:14-22) Balet anggano ontay ginawa na arum ed si David, ag-abawasay panangaro tod si Jehova. Ontan met, mapangasi si David, tan amtak ya kaukolan ko met itan ya ipanengneng. Lapud sarayan naaralan ko, anguman so panmoriak ed saray kakapuyan na agagi. Agko la tatandaan iray agawaan dan lingo. Imbes, gagawaen koy anggaay nayarian kon mitulongan pian niwalay pankakasakey ed kongregasyon.” Kasin ontan met so labay mon gawaen?

MIKAARO ED SARAY MANGGAGAWAY LINAWA NA DIOS

14. Siopa ray pinili nen Jesus ya maapit a kakaaro to?

¹⁴ Makaaro si Jesus ed amin. Sikatoy labalabay na amin a klase na totoo—lalaki, bibii, kalangweran, matatken, anggan saray ugugaw. Balet pinilin maong nen Jesus iray maapit a kaaro to. Imbaga tod saray matoor ya apostol to: “Kakaaro ta kayo no gagawaen yo so igaganggan ko ed sikayo.” (Juan 15:14) Sikara so pinili ton maapit ya kaaro to ta matoor iran tinmumbok ed sikato tan interon puso iran nanlingkor ed si Jehova. Kasin saray pipilien mo met ya maapit a kaarom et saramay manlilingkor ed si Jehova diad interon puso? Akin et importante itan?

15. Panon ya nagunggonaan iray kalangweran no miulop irad saray Kristianon matatken ed espiritual?

¹⁵ Dakel ya prutas so balibali inkaluto ra no napepetangan na agew. Ontan tayo met. Say ampetang a panangaro na agagi et ontulong pian ontatken tayo ed espiritual. Kasin sakey kan kalangweran ya maniisip no antoy gawaen mod bilay mo? Maabig no miulop kad saray agagi ya abayag lan manlilingkor ed si Jehova tan mitutulongan ira ed pankakasakey na kongregasyon. Diad inlalabas na taon, nayarin wala ray dinadalan dan problema ed bilay odino subok diad panlilingkor dad Dios. Natulongan da ka pian napilim so sankaabigan ya pangusaran moy bilay mo. Say maaro tan makapaseseg ya piulop mod sikara et ontulong ed sika pian makapandesisyon ka na duga tan ontatken kad espiritual.​—Basaen so Hebreos 5:14.

16. Panon ya say sakey a kalangweran a sister et tinulongan na saray kakongregasyon ton matatken ed espiritual?

¹⁶ Imanoen tayo pay alimbawa nen Helga. Nen magano lan man-graduate ed haiskul, pantotongtongan na saray kaklase to no antoy gawaen dad bilay da. Dakel ed sikara so malabay ya manaral ed unibersidad ta atan kuno so paraan pian nawalaan iray maabig a trabaho. Intongtong nen Helga so situasyon to ed saray maespiritual ya kaaro to ed kongregasyon. “Dakel ed sikara et matatken nen say siak,” so kuan to, “tan baleg so nitulong dad siak. Pinaseseg da ak ya onloob ed sigpot panaon a ministeryo. Kanian limaran taon ak ya akapanlingkor bilang payunir. Natan, malikeliket ak ta nampokus ak ed panaglingkor ed si Jehova nen kalangweran ak ni. Agko itan pagbabawian.”

17, 18. Panon ya makatulong so inkatatken ed espiritual pian niiter tayoy sankaabigan tayod si Jehova?

¹⁷ No gawaen tayoy anggaay nayarian tayon aligey Jesus, ontatken tayod espiritual. Lalo itayon onapit ed si Jehova, tan mas pilaleken tayon lingkoran diad sankaabigan a paraan. Niiter na sakey a Kristiano so sankaabigan to ed si Jehova no asabi to lay nagnap ya inkatatken ed espiritual. Pinaseseg nen Jesus iray patumbok to: “Pasindag yo . . . so liwawa yo ed saray totoo, pian nanengneng da so maabig iran gawa yo tan igloria ra so Ama yon walad tawen.”​—Mat. 5:16.

¹⁸ On, baleg so nitulong na saray Kristianon matatken ed espiritual diad kongregasyon. Say sakey ya pakapatnagan na inkatatken ed espiritual et no panon ya uusaren na Kristiano so konsiensia to. Panon itayon natulongan na konsiensia tayo pian duga iray desisyon tayo? Tan panon tayon nipanengneng ya rerespetoen tayoy konsiensia na arum ya agagi? Aralen tayo irayan punto diad onsublay ya artikulo.