Anto ray Paneknek ya Inar-aro Itayo nen Jehova?

1. Antoy impaseseg nen apostol Juan ya dalepdepen na saray Kristiano, tan akin?

BALIBALIN dalepdepen imay imbaga nen apostol Juan ya nabasad 1 Juan 3:1. Nen imbaga nen Juan ya “imano yo no panon kabaleg so panangaro na Ama ed sikatayo,” labay ton nonoten tayo so kabaleg na panangaro nen Jehova tan no panon Ton ipapanengneng itan ya panangaro. No dalepdepen tayo itan, seguradon onaralem so panangaro tayod si Jehova tan onelet so relasyon tayod sikato.

2. Akin ya wala ray agmanisia ya inaro ira na Dios?

² Balet, wala ray agmanisia ya inaro ira na Dios. Basta say amta ra et kaukolan dan takotan tan tuloken so Dios. Odino nayarin lapud palso iran bangat, say amta ra et maruksa so Dios kanian iisipen da ya agdan balot naaro. Wala met iray arum ya manisian anggan antoy gawaen da et inaro ni ran siansia na Dios. Nen inaral moy Biblia, naamtaan mo ya say aro so manunan kualidad nen Jehova tan satan so amakiwas ed sikaton iter so Anak to pian nadondon itayo. (Juan 3:16; 1 Juan 4:8) Anggaman ontan, ompan lapud saray naeksperiensyam ed bilay et siansia nin mairap mon talosan so kabaleg na panangaro na Dios ed sika.

3. Antoy makatulong pian natalosan tayo so panangaro na Dios ed sikatayo?

³ Anto ray paneknek ya inar-aro itayo nen Jehova? Pian naebatan itan ya tepet, kaukolan tayon talosan no antoy relasyon na too ed Dios. Si Jehova so Amalsa ed amin ya too. (Basaen so Salmo 100:3-5.) Atan so rason no akin ya imbaga na Biblia ya si Adan et “anak na Dios,” tan imbangat nen Jesus iray patumbok to ya tawagen da so Dios ya “Ama mi a walad tawen.” (Luc. 3:38; Mat. 6:9) Lapud si Jehova so angiter na bilay tayo, sikato so Ama tayo. Labay ton ibaga, inar-aro itayo nen Jehova no panon ya inar-aro na maong ya ama iray ananak to.

4. (a) Akin ya nibaga tayon anggapoy ama diad dalin ya miparad si Jehova? (b) Antoy aralen tayod sayan artikulo tan ed ontumbok?

⁴ Siempre, anggapoy ama diad dalin ya perpekto. Anggan antoy gawaen da, agdan balot naalig so panangaro nen Jehova. Diad tua, wala ray indibidual ya aliwliway impamabaleg ed sikara na kaamaan da kanian naapektoay emosyon tan nonot da. Ansakisakit tan makapaermen itan. Balet tandaan ya aliwan ontan ya klase na ama si Jehova. (Sal. 27:10) Seguradon mas onapit so liknaan tayod si Jehova no natatalosan tayo no panon ton ipapanengneng so panangaro tan panangasikaso tod sikatayo. (Sant. 4:8) Aralen tayo natan so apatiran paraan no panon ya ipapanengneng nen Jehova ya inar-aro to tayo. Tan diad ontumbok ya artikulo, aralen tayo so apatiran paraan no panon tayo met ya nipanengneng ya inar-aro tayoy Jehova.

SI JEHOVA SO MAARON MANANGITARYA TAYO

5. Antoy imbaga nen apostol Pablo ed saray taga Atenas nipaakar ed Dios?

⁵ Nen si apostol Pablo et walad Atenas diad Gresya, naimano to ya dakdakel so imahen na saray dirios ed satan ya syudad. Papanisiaan na saray totoo ditan ya saratan so angiter na bilay da tan amin ya pankaukolan da. Kanian imbaga nen Pablo: “Say Dios a nanggawa na mundo tan amin a bengatlan wadtan . . . so mangiiter na bilay tan linawa tan amin a bengatla diad amin a totoo. . . . Diad panamegley to et walay bilay tayo tan onggagalaw itayo tan wala itayo.” (Gawa 17:24, 25, 28) On, lapud inaro itayo nen Jehova, itatarya to so “amin a bengatla” ya kaukolan tayo pian mantultuloy itayon manbilay. Isipen pa so kabaliksan na satan ya imbaga nen Pablo.

6. Panon tayon nanengneng ed inkagawa na dalin ya inar-aro itayo na Dios? (Nengnengen so litratod gapo na artikulo.)

⁶ Isipen pa so dalin ya pinalsa nen Jehova, ya “inter to ed saray anak na totoo.” (Sal. 115:15, 16) Dakel lan kuarta so agastos lapud panaanap na saray sientista na arum ni ran planeta ya mipara ed dalin tayo. Balet adismaya ira ta anggano dakdakel lan planeta so adiskobre, anggapod saratan so napanayaman na too. On, mapatnag ya nikadkaduma so impamalsa na Dios ed dalin. Imadyin mo pa labat, diad amin ya planeta ed Milky Way tan ed arum nin galaxy, pinalsa nen Jehova so dalin aliwa labat a pian panayaman na too noagta ginawa to met itan ya komportable tan marakdakep pian na-enjoy tayoy bilay! (Isa. 45:18) Sakey itan ya paneknek ya inar-aro itayo nen Jehova.​—Basaen so Job 38:4, 7; Salmo 8:3-5.

7. Panon tayon nanengneng ed inkagawa na too ya inar-aro itayo na Dios?

⁷ Balibali so ayaman ya pinalsa nen Jehova parad sikatayo, balet amta to ya aliwa labat ya materyal so kaukolan tayo pian magmaliw itayon maliket tan kontento. Mas maliket so sakey ya ugaw no nalilikna toy panangaro na atateng to tan iikdan day atension. ‘Pinalsa nen Jehova so too ed indengan to,’ ya inikdan to itayo na abilidad ya nalikna so panangaro tan panangasikaso to tan sarag tayo met ya ipanengneng so panangaro ed sikato. (Gen. 1:27) Sakey ni, imbaga nen Jesus: “Maliket iramay manonot ed espiritual a pankaukolan da.” (Mat. 5:3) Lapud maaron Ama si Jehova, sikatoy ‘daakan a mangitatarya na amin a bengatlan panliketan tayo,’ diad materyal tan espiritual.​—1 Tim. 6:17; Sal. 145:16.

MAARON IBABANGAT NEN JEHOVA ED SIKATAYO SO KATUAAN

8. Akin ya segurado tayon inar-aro itayo na “Dios na katuaan”?

⁸ Inar-aro na kaamaan iray ananak da tan proprotektaan da ra pian ag-ira natilaan o naloko. Balet dakel ya atateng natan so agmanguunor ed saray estandarte na Biblia kanian agda naigiya so ananak da ed dugan dalan. Lapud satan, agmaliket so pamilya da tan agda amtay duga tan aliwa. (Uli. 14:12) Balet si Jehova so “Dios na katuaan.” (Sal. 31:5) Inar-aro to ray ananak to tan labalabay ton iter ed sikara so liwawa na katuaan pian naigiya to ra ed amin ya aspekto na panagbilay da, lalo lad panagdayew da. (Basaen so Salmo 43:3.) Anto ran katuaan so imbangat nen Jehova ed sikatayo, tan panon ya ipapanengneng na saratan ya inar-aro to itayo?

9, 10. Panon ya impanengneng nen Jehova ya inar-aro to tayo diad impangibangat toy katuaan (a) nipaakar ed sikato? (b) nipaakar ed sikatayo?

⁹ Manuna ed amin, impaamta nen Jehova so katuaan nipaakar ed sikato. Impaamta toy ngaran to, ya mas dakel ya beses ya nabasad Biblia nen say arum ya ngaran. Labay sirin nen Jehova so onapit ed sikatayo tan labay ton sikatoy nakabat tayo. (Sant. 4:8) Ipapaamta met nen Jehova iray kualidad to. Nanengneng tayod uniberso so pakayari tan karunongan to, tan panamegley na Kasulatan et ipapaamta to ya sikatoy mahustisya tan agmangangga so panangaro to. (Roma 1:20) Si Jehova et singa ama ya aliwa labat a mabiskeg tan marunong noagta patas tan maaro, kanian mainomay na saray ananak to so magmaliw a maapit ed sikato.

¹⁰ Impaamta met nen Jehova so katuaan nipaakar ed sikatayo ran totoo, tan no antoy betang tayo ed gagala to. Ontutulong itan pian niwalay deen tan uksoy ed interon pamilya to diad tawen tan dalin. Naaralan tayod Biblia ya agsarag na too ya uleyan so sarili to tan anggapoy kanepegan ton mandesisyon no antoy maong tan mauges. No sumlangen tayo itan ya katuaan, aliway pansumpalan tayo. (Jer. 10:23) Parad pankaabigan tayo itan. Magmaliw labat ya mareen tan maliket so bilay tayo no manpasakop tayod autoridad na Dios. Imbangat nen Jehova iyan importantin katuaan lapud inar-aro to itayo!

11. Antoy insipan nen Jehova ya paneknek ya inar-aro tan iyaansakit to itayo?

¹¹ Say maaron ama et sankanonot toy arapen na ananak to, ta labay ton magmaliw ya maliket so bilay da. Makapaermen balet ta dakel ya totoo so mapagpaga ed arapen da, odino mansasagpot ira parad saray bengatlan temporaryo labat. (Sal. 90:10) Misalsalamat itayo ta insipan nen Aman Jehova ya magmaliw ya marakep so arapen tayo. Lapud satan et makabaliksan tan walaan na gagala so bilay tayo.

SISIMBAWAEN TAN DIDISIPLINAEN NEN JEHOVA IRAY ANANAK TO

12. Panon ya impanengneng nen Jehova so panangaro tan panangiyansakit tod si Cain tan Baruc nen sinimbawa to ra?

¹² “Akin et onsasanok ka tan maer-ermen ka? No manggawa kay maong, agta abobonan ta ka? . . . Agmo kasi daegen [so kasalanan]?” (Gen. 4:6, 7, NW) Dugaruga itan ya simbawa. Pinasakbayan nen Jehova si Cain nen mapatpatnag ya aliwa lay gagawaen to. Balet, makapaermen ta ag-itan dinengel nen Cain kanian makapuy so nansumpalan to. (Gen. 4:11-13) Nen say sekretaryo nen Jeremias ya si Baruc et kinmesaw lad panaglingkor to tan adismaya, sikatoy sinimbawa nen Jehova pian nanengneng to no anton talagay problema to. Aliwan singa si Cain, inawat nen Baruc so simbawa nen Jehova, kanian nisalba so bilay to.​—Jer. 45:2-5.

13. Akin ya inabuloyan nen Jehova ya makaeksperiensya na subok iray matoor ya lingkor to?

¹³ “Say aaroen nen Jehova et didisiplinaen to; diad tua et leleweten to so balang sakey ya aawaten ton anak,” so insulat nen Pablo. (Heb. 12:6) Balet tandaan ya say disiplina et aglabat ontutukoy ed dusa. Didisiplinaen itayo nen Jehova ed nanduruman paraan. Diad Biblia, dakel so nabasa tayon matoor ya lingkor nen Jehova ya wala ray dinadalan dan subok ya akaaralan da tan lapud saratan et nipasal ira parad ambelat iran responsabilidad. Nonoten pay agawad si Jose, Moises, tan David. Say istorya na bilay da et sakey ed saray detalyado tan mabilabilay ya nisalaysay ed Biblia. No basaen tayo no panon iran tinulongan nen Jehova ed saray dinalan dan subok tan no panon to ran inusar pian nasumpal so gagala to, lalo tayon nalikna so panangaro tan panangiyansakit nen Jehova ed saray lingkor to.​—Basaen so Uliran 3:11, 12.

14. Akin ya nibaga tayon inaro itayo nen Jehova no didisiplinaen to tayo?

¹⁴ Anggano makakagawa tayoy aliwa, siansian ipapanengneng nen Jehova ya inar-aro to itayo. No awaten tayoy disiplina to tan magbabawi tayo, ‘daakan so panamerdona to.’ (Isa. 55:7) Antoy labay ya ibaga na satan? Marakdakep so impaneskribe nen David ed panamerdona nen Jehova: “Peperdonaen toy amin a lingom tan papaabigen toy amin a sakit mo; ililiktar toy bilay mo manlapud abot tan kokoronaan to ka na matoor a panangaro tan panangasi. No panoy kaarawi na bubutayan na agew manlapud seselekan to, ontan so impangiyarawi to ed sikatayo na saray kasalanan tayo.” (Sal. 103:3, 4, 12, NW) Komon ta lanang tayon malikas ed simbawa tan disiplina nen Jehova, tan awaten tayo itan ya tampol, lapud amta tayon paneknek itan na panangaro tod sikatayo.​—Sal. 30:5.

PROPROTEKTAAN ITAYO NEN JEHOVA

15. Antoy sakey ya paneknek ya mabmabli ed si Jehova iray lingkor to?

¹⁵ Sakey ed saray manunan gagawaen na maaron ama et proprotektaan toy pamilya to pian agniiyan ed peligroy bilay da. Ontan so gagawaen nen Aman Jehova. Oniay imbaga na salmista nipaakar ed sikato: “Sasalimbengan toy bilay na saray matoor ed sikato; ililiktar to ra ed lima na mauges.” (Sal. 97:10, NW) Nonot mo pa: Agta proprotektaan mo so matam ta importante itan a maong ed sika? Ontan so pamproprotekta nen Jehova ed saray lingkor to. (Basaen so Zacarias 2:8.) Talagan mabmabli itayod si Jehova!

16, 17. Diad anto ran paraan ya iiter nen Jehova so proteksion to ed saray lingkor to nensaman, ontan met natan?

¹⁶ Say sakey ya paraan ya proprotektaan nen Jehova iray totoo to et panamegley na saray anghel. (Sal. 91:11) Inliktar na sakey ya anghel so Jerusalem nen lusoben la itan na saray Asiryano, ya pinatey toy 185,000 ya sundalo diad sakey labat ya labi. (2 Ara. 19:35) Si apostol Pedro tan Pablo tan arum ni et imbulos na anghel diad prisoan. (Gawa 5:18-20; 12:6-11) Proprotektaan itayo met natan nen Jehova. Inreport na representative na headquarters ya binmisitad sakey ya branch office ed Africa ya magulogulo ed satan ya bansa lapud politika tan relihyon. Dakel so nagagawan panlalaban, panagtakew, rape, tan panagpatey kanian agaylay gulo tan dakel so rebelde. Dakel ed saray agagi tayo so naandiay kaykayarian tan anapan, balet anggapoy anggan sakey ed sikara so inatey. Nen kinumusta ira na samay representative na headquarters, oniay makakaimis ya imbaga ra: “Ayos kami labat dia, salamat ed si Jehova!” On, alikna day panangaro na Dios ed sikara.

¹⁷ No maminsan, ag-aamperen nen Jehova ya pateyen na saray kalaban iray matoor a lingkor to, ya singa agawad si Esteban. Balet, proprotektaan na Dios iray lingkor to bilang grupo, diad pangiiter toy pasakbay nipaakar ed saray masilib a pakana nen Satanas. (Efe. 6:10-12) Uusaren toy Salita to tan saray publikasyon ya base ed Biblia ya itatarya na organisasyon to pian tulongan itayon nanengneng so peligro na materyalismo, imoral tan bayolentin panagligliwaan, makapuy ya pangusar na Internet, tan arum ni. Talagan maar-aron Ama si Jehova ta proprotektaan to itayo.

BALEG A PRIBILEHYO

18. Antoy naliliknam ed panangaro nen Jehova ed sika?

¹⁸ Diad sayan impanaral tayod pigaran paneknek ya inar-aro itayo nen Jehova, seguradon nalilikna tayo imay alikna nen Moises nensaman. Nen dadalepdepen toy abayag ya impanlingkor tod si Jehova, imbaga to: “Penek mo kami pan kinabuasan na matoor a panangarom, pian oneyag kamid liket tan manggayaga kami legay bilay mi.” (Sal. 90:14, NW) Baleg ya pribilehyo tan bendisyon ya natatalosan tan nalilikna tayoy panangaro nen Jehova. Singa si apostol Juan, ibabaga tayo met ya, ‘Balbaleg so panangaro na Ama ed sikatayo’!​—1 Juan 3:1.