Sikayo Ran Kabataan​—Panon Kayon Makapanparaan Parad Bautismo?

1, 2. (a) Akin et seryoson desisyon so pampabautismo? (b) Anto so nepeg a seguroen na sakey a kabataan antis ya manpabautismo, tan akin?

KASIN sakey kan kabataan a manplaplanon manpabautismo? Tandaan a say pagmaliw a bautismado et sankabalegan a pribilehyo a niwala ed siopaman a too. Balet, singa nidanet la ed inmunan artikulo, say pampabautismo et sakey a seryoson desisyon. Isisimbolo na satan so dedikasyon mo​—say impapuson sipan mo ed si Jehova ya unaen mod bilay mo so panlingkor ed sikato. On, nayari ka lan manpabautismo no sarag mo lay mandesisyon a bukor, agka napipilitan, tan natatalosan moy labay ya ibaga na dedikasyon.

² Panon to no agka segurado no kasin akaparaan ka lan manpabautismo? Odino panon to no labay mo lay manpabautismo balet ta iisipen na atateng mo ya kaukolan mo ni manpatatken ed espiritual? Antokaman so situasyon mo, agka nadidismaya. Imbes, usar mo itan ya pankanawnawa ya onaligwas pian agmanbayag et nayari ka lan manpabautismo. Legan mon nononoten so pampabautismom, isip mon maong no anto ray nepeg mon gawaen pian onaligwas ka ed (1) saray papanisiaan mo, (2) kakikiwas mo, tan (3) apresasyon mo.

SARAY PAPANISIAAN MO

3, 4. Antoy naaralan na saray kabataan ed alimbawa nen Timoteo?

³ Isipen pa no antoy ebat mod sarayan tepet: Akin et manisia ak ya walay Dios? Antoy akakombinse ed siak a say Biblia et Salita na Dios? Akin et kombinsido ak ya mas maong so pambilay unong ed saray moral ya estandarte na Dios nen say pangalig ed kabibilay na saray totoo ed mundo? Ag-iraya intepet pian panduaruwaen ka. Imbes, makatulong iratan ed sika pian naunor moy bilin nen apostol Pablo: ‘Paneknekan yo ed inkasikayo so maong tan makapaliket tan ayadyarin linawa na Dios.’ (Roma 12:2) Balet akin et kaukolan a paneknekan ni na saray Kristiano ed Roma so bengatlan inawat da la?

⁴ Nonot mo pay sakey ya alimbawa ed Biblia. Kabkabisado nen Timoteo so Kasulatan. “Manlapud inkaugaw” to et imbangat la na ina tan bai to. Balet, pinaseseg nen Pablo si Timoteo: “Mantultuloy ka ed sarayan bengatla a naaralan mo tan akatangguyor ed sikan manisia.” (2 Tim. 3:14, 15) Base ed sakey a reperensya, say labay ya ibaga na salitan “akatangguyor” diad orihinal a lenguahe et “kombinsido tan segurado ed katuaan na sakey a bengatla.” Impapuso nen Timoteo so katuaan. Inawat to itan, aliwan lapud ingganggan na ina tan bai to, noagta pinaneknekan to itan ed sarili to tan atangguyor o akombinse a manisia.​—Basaen so Roma 12:1.

5, 6. Akin et importantin amtam ya usaren so ‘pakayarim a mankatunongan’ anggano ugaw ka ni?

⁵ Sika balet ey? Nayarin abayag mo lan amta iray katuaan ed Biblia. No ontan, akin no gawaen mon kalat ya usisaen nin maong iray rason na papanisiaan mo? Ombiskeg so pananisiam tan ontulong itan ed sika ya ompaliis ed pananesdes na saray kaulop mo, saray opresi na mundo, odino anggan say mismon liknaan mo.

⁶ No amtam ya usaren so ‘pakayarim a mankatunongan’ anggano ugaw ka ni, akaparaan kan mangiter na epektibo iran ebat ed saray kaulop mo no itepet dad sika iraya: ‘Panon mon amta ya talagan walay Dios? Akin ya iyaabuloy na maaron Dios so kaugsan? Panon mon ipaliwawa ya anggapoy nanggawa ed Dios?’ No akaparaan ka, agpakapuyen na saratan a tepet so pananisiam, noagta pasesegen ka na saratan ya mas mankuli ed personal a panagaral mo.

7-9. Panon ya makatulong ed sika so serye na giya ed panagaral ya “Anto so Peteg ya Ibabangat na Biblia?” pian mas lalon kombinsido ka ed saray papanisiaan mo?

⁷ No makuli ka ed personal a panagaral mo, natulongan ka ya ebatan iray tepet, naekal so anggan anton panduaruwam, tan magmaliw kan mas kombinsido ed saray papanisiaan mo. (Gawa 17:11) Walay pigaran uusaren a nitarya ed sikatayo pian nagawaan mo itan. Akatulong ed dakel so impangusar ed brosyur ya The Origin of Life—Five Questions Worth Asking tan say libron Is There a Creator Who Cares About You? Niarum ni, dakel a kabataan so naliliketan tan nagugunggonaan ed sakey ya seksion na website tayo ya “Anto so Peteg ya Ibabangat na Biblia?” Sayan serye na giya ed panagaral et nanengneng ed jw.org/pag. Nengnengen ed BANGAT NA BIBLIA. Kada sakey ed saratan a giya ed panagaral so imparaan pian magmaliw kan mas kombinsido ed papanisiaan mo nipaakar ed sakey a tema na Biblia.

⁸ Kabisadom lay Biblia kanian mainomay mon ebatan so arum ed saray tepet a walad saraman a giya ed panagaral. Balet akin et segurado ka ed saray ebat mo? Pasesegen ka na saratan a giya ed panagaral pian manrason base ed pigaran teksto na Biblia insan isulat mo iray nononoten mo ed satan. Makatulong iratan ed sika pian makapanparaan ka no panon mon ipaliwawa ed arum so papanisiaan mo ya nibase ed Biblia. Say seksion ed website tayo ya “Anto so Ibabangat na Biblia?” et makakatulong ed dakel a kabataan pian magmaliw iran mas kombinsido ed saray papanisiaan da. No makapan-Internet ka, sarag mon usaren itan a serye bilang kabiangan na personal a panagaral mo.

⁹ No mas kombinsido ka la ed saray papanisiaan mo, agawaan mo la so sakey ya importantin kakaukolanen parad bautismo. Inkuan na sakey a tinedyer a sister: “Antis ak a mandesisyon ya manpabautismo, inaral koy Biblia tan akombinse ak ya saya so tuan relihyon. Tan diad ilalabas na kada agew et mas lalon nakokombinse ak ed saray papanisiaan ko.”

SAY KAKIKIWAS MO

10. Akin et nepeg labat ya napatnagan ed kakikiwas na bautismadon Kristiano so pananisia to?

¹⁰ Ibabaga na Biblia: “Say pananisia et inatey no andian na saray gawa.” (Sant. 2:17) No talagan walay pananisiam, napatnagan itan ed kakikiwas mo. Panon? Binitla na Biblia a “nepeg kayon manbilay a masanto tan saray gawa yo et pakapatnagan na debosyon ed Dios.”​—Basaen so 2 Pedro 3:11.

11. Antoy labay ya ibaga na ‘pambilay a masanto’?

¹¹ Pian nipatnag mon ‘manbibilay ka a masanto,’ nepeg ya malinis ka ed moral. Kumusta lay nagagawaan mod satan? Singa bilang, nonot mo pay apalabas ya anem bulan. Panon mon impanengneng a say ‘pakayarim a mantalos’ et nipasal lan mangibiig ed duga tan aliwa? (Heb. 5:14) Wala tay nanonotan mon agawa ya alabanan moy tukso odino panedesdes na saray kalimog mo? Kasin diad eskuelaan et marakep so ibabaga ra nipaakar ed pananisiam lapud maong ya ugalim? Kasin idedepensam so pananisiam imbes ya aligen iray kaklasem pian napaliisan mo labat so panagbalaw? (1 Ped. 4:3, 4) Siempre, anggapoy toon perpekto. No maminsan, anggan saray abayag lan lingkor nen Jehova et nababaingan met ya mangidepensa na pananisia ra ed arap na totoo. Balet, nepeg ya ipatnag na sakey a toon angidedikay bilay tod si Jehova ya sikatoy maliket a natawag ed ngaran na Dios, tan ipapanengneng to itan diad ugali to.

12. Anto so arum iran ‘gawa a pakapatnagan na debosyon ed Dios,’ tan panon tayon ipasen iratan?

¹² Anto met so labay ya ibaga na saray ‘gawa a pakapatnagan na debosyon ed Dios’? Kaiba ed saratan iray gagawaen ed kongregasyon, a singa say pipiaral tan pibibiang ed ministeryo. Kaiba met iray espiritual ya aktibidad ya agnanenengneng na arum, a singa say personal a panagpikasi tan panagaral mo. Say sakey a toon angidedika lay bilay tod si Jehova et agto ipasen irayan gawa bilang makapasawan kimey. Imbes, ipatnag to so liknaan nen Arin David, ya inkuan ton: “Say panggaway linawam, O Dios ko, so panliliketan ko, tan say ganggan mo et walad pusok.”​—Sal. 40:8.

13, 14. Anton probisyon so makatulong ed sika pian nagawaan mo iray ‘gawa a pakapatnagan na debosyon ed Dios,’ tan panon ya agunggonaan so arum a kabataan ed sayan probisyon?

¹³ Pian natulongan kan manggaway kalat mo, walay worksheet tayo ed pahina 308 tan 309 na libron Questions Young People Ask—Answers That Work, Volume 2. Pasesegen ka na sayan worksheet ya isulat iray ebat mo ed saray tepet a singa say, “Kasin espisipiko iray pikakasim, tan antoy ipapatnag na saray pikakasim nipaakar ed panangarom ed si Jehova?” “Anto ray aaralen mo diad personal a panagaral mo?” “Kasin mibibiang kad ministeryo anggano agmo kaiba iray atateng mo?” Wala met so napansulatan mo ditan na saray kalat ya labay mon gawaen nipaakar ed panagpikasim, personal a panagaral mo, tan ministeryom.

¹⁴ Dakel ya kabataan a manplaplanon manpabautismo so atulongan ed sayan worksheet. Inkuan na sakey a kabataan a sister ya si Tilda: “Inusar ko so worksheet pian manggaway kalat ko. Sansakey kon agawaan iratan a kalat, tan kayari na manga sakey taon et akaparaan ak lan manpabautismo.” Agunggonaan met ed satan so sakey a kabataan a brother ya si Patrick. Inkuan to: “Amtak la ray kalat ko, balet nen insulat ko iratan, mas apakiwas ak ya pankimeyan itan.”

15. Akin et nepeg a sikan mismo so mandesisyon no idedikam so bilay mo?

¹⁵ Sakey ed saray tepet diad worksheet ya talagan pannonoten to ka et say: “Kasin manlingkor ka nin siansia ed si Jehova anggano tinmunda lan manlingkor iray atateng tan kakaarom?” Tandaan, bilang dedikado tan bautismadon Kristiano, onarap kan bukor ed si Jehova. Ag-akadepende ed arum​—anggan ed saray ateng mo—​so panaglingkor mod si Jehova. Paneknekan na masanton panagbilay mo tan saray gawa a pakapatnagan na debosyon mod Dios ya impapusom lay katuaan tan akaparaan ka lan manpabautismo.

SAY APRESASYON MO

16, 17. (a) Anto so mamakiwas ed sakey a too pian magmaliw a Kristiano? (b) Panon ya niyalimbawa so apresasyon ed dondon?

¹⁶ Oniay intepet ed si Jesus na sakey a toon kabkabisado toy Mosaikon Ganggan: “Dinan so sankaimportantian ed Ganggan?” Inmebat si Jesus: “Arom si Jehova a Dios mo ed interon pusom tan ed interon kamarerwam tan ed interon nonot mo.” (Mat. 22:35-37) Impaamta ed saya nen Jesus a say nepeg a motibo na sakey a Kristiano ed anggan anton gawaen to, kaiba lay pampabautismo et say interon puso ya panangaro to ed si Jehova. Sakey ed saray sankaabigan ya paraan pian onaralem so panangarom ed si Jehova et say pandalepdep ed sankabalgan a regalo to—say dondon bagat na Anak to. (Basaen so 2 Corinto 5:14, 15; 1 Juan 4:9, 19.) No nonoten moy nipaakar ed dondon tan no antoy nagawaan na satan ed sika, seguradon napakiwas ka lapud naapresyam itan.

¹⁷ Nayarin niyalimbawa ed onian paraan so apresasyon mo ed dondon: Isipen pan nalelener ka la insan walay angisalba ed sika. Kasin basta ka labat onsempet, manpamaga, insan lingwanan mo lay ginawa ed sika? Siempre andi! Seguradon misalsalamat ka ed samay toon angisalba ed sika. Diad tua, utang moy bilay mo ed sikato! Mas baleg ni utang tayo ed si Jehova a Dios tan si Jesu-Kristo. No anggapoy dondon, singa itayo la nalelener ed kasalanan tan ipapatey. Balet lapud baleg a panangaro rad sikatayo, walay nikadkaduman ilalo tayo a manbilay ya anggapoy anggaan diad paraison dalin!

18, 19. (a) Akin et agmo nepeg a takotan so pagmaliw a kayarian nen Jehova? (b) Akin et magmaliw a mas maliket so bilay mo no manlingkor kad si Jehova?

¹⁸ Kasin aapresyaen mo so amin a ginawa nen Jehova parad sika? Duga labat sirin ya idedikam so bilay mod si Jehova tan manpabautismo ka. Agmo lilingwanan a say dedikasyon et sakey a seryoson sipan ed si Jehova a gawaen moy linawa to diad andi-anggaan, anggano antoy nagawa. Kasin natatakot kan misipanan ed si Jehova? Agnepeg ya ontan! Tandaan ya nononoten nen Jehova so pankaabigan mo, tan ‘tutumangan to iramay masimoon a manaanap ed sikato.’ (Heb. 11:6) Agmagmaliw a pakaskasi so bilay mo no idedikam itan ed si Jehova tan manpabautismo ka. Imbes, magmaliw kan mas maliket no manlingkor kad sikato. Oniay imbaga na sakey ya 24 años a brother ya abautismoan antis a mantinedyer: “Nayarin mas aralem so pakatalos ko no inalagar kon ontatken ak ni, balet lapud nandesisyon ak lan idedikay bilay kod si Jehova, aprotektaan ak ed saray opresi na mundo.”

¹⁹ Midumaan a maong si Jehova ed si Satanas a say interes to labat et parad sarili to! Anggapoy maabig a niiter nen Satanas ed saramay ondadapag ed sikato. Tan talagan anggapo ta sikaton mismo et anggapoy maong a balitan dadalepdepen to, anggapoy maabig ya ilalo to. Panon ton iter ed sika so bengatlan anggapo ed sikato? Anggapon balot so niyopresi ed sika nen Satanas noagta say makapaermen ya arapen, a singa magano lan nagawad sikato!​—Apo. 20:10.

20. Antoy nayarin gawaen na sakey a kabataan pian onkualipika ya mangidedikay bilay to tan manpabautismo? (Nengnengen met so kahon ya “Pian Natulongan Kan Onaligwas ed Espiritual.”)

²⁰ Malinew, dugan desisyon so pangidedikam na bilay mod si Jehova. Kasin akaparaan ka lan mangidedikay bilay mo? No akaparaan ka la, gawam itan ya tampol. Balet no kaukolan mo ni panaon, usar mo ray suhestion ed sayan artikulo pian tuloytuloy kan onaligwas. Insulat nen Pablo ed saray taga Filipos: “Antokaman so inaligwasan tayo la, mantultuloy itayo ni komon ya onaligwas a singa ed dati lan gagawaen tayo.” (Fil. 3:16) No tumboken mo itan a bilin, agmanbayag et labay mo lan idedikay bilay mo ed si Jehova tan manpabautismo.