MANUNAN ARTIKULO | TALAGA KASIN WALA RAY ANGHEL?

Say Tua Tungkol ed Saray Anghel

Kasin labay mon naamtaay tua tungkol ed saray anghel—no siopa ra, no iner so nanlapuan da, tan no antoy gagawaen da? Say sankaabigan ya pangalaan tayoy ebat et diad pinuyanan a Salita na Dios, say Biblia. (2 Timoteo 3:16) Antoy ibabaga na Biblia?

Say Dios et Espiritu, tan saray anghel et espiritu met ya agnanengneng tan “andian na laman tan pukepukel.” Walad tawen iray matoor ya anghel tan makakaasingger irad trono na Dios.—Lucas 24:39; Mateo 18:10; Juan 4:24.
Nensaman, wala ray anghel ya nampanengneng a singa too pian gawaen iray ipapagawa na Dios diad dalin. Insan nen agawaan da la iratan, pinmawil irad tawen bilang espiritu.—Ukom 6:11-23; 13:15-20.
Anggano laki so pangidedeskribe na Biblia ed saray anghel tan nampanengneng irad totoo bilang lalaki, diad tua et aliwa ran laki o bii. Ag-ira mangaasawa tan manaanak. Sakey ni, saray anghel et aliwa ran datin totoo—aliwa ran datin baby, ugugaw, odino baleg lan too—ya nen inatey ira et linma rad tawen bilang anghel. Saray anghel et ginawa nen Jehova; kanian ibabaga na Biblia ya sikaray “ananak na tuan Dios.”—Job 1:6; Salmo 148:2, 5.
Nabasa ed Biblia so tungkol ed “saray lenguahe na totoo tan saray anghel,” kanian wala sirin so lenguahe na saray anghel. Anggano angibaki so Dios na saray anghel ya mitongtong ed saray totoo, agto inyabuloy ya mandayew o manpikasi tayod saray anghel.—1 Corinto 13:1; Apocalipsis 22:8, 9.
Abitla ed Biblia ya samplon libolibo a samplon libolibo so karakel na saray anghel, kanian nayarin bilyon-bilyon ira.—Daniel 7:10; Apocalipsis 5:11.
Saray anghel et “mabiskeg ed pakayari”—mas mabiskeg ira nen saray totoo—tan mas matalino ira. Sarag day onlan mapmaples ed anggan iner. Agtayon balot nipaliwawa o nakuenta so kapeles da.—Salmo 103:20; Daniel 9:20-23.
Anggano matalino tan makapanyarin maong iray anghel, wala ray limitasyon da, tan wala met iray agda amta.—Mateo 24:36; 1 Pedro 1:12.
Saray anghel et ginawa na Dios ya walaan na kanya-kanyan personalidad, wala met ed sikara iray kualidad na Dios, tan makapandesisyon ira parad sarili da. Kanian singa met ira totoo ya sarag day manpili no kasin duga o aliwa so gawaen da. Makapaermen ta wala ray anghel ya pinili day manrebelde ed Dios.—Judas 6.

Anto ray Responsabilidad na Saray Anghel na Dios?

Say arkanghel ya si Miguel so sankatagyan na pakayari tan autoridad ed amin ya anghel. Malinew ya ipapaamta na Biblia ya say Miguel et sananey ya ngaran nen Jesu-Kristo.—1 Tesalonica 4:16; Judas 9.

Saray serapin et anghel ya atagtagey so rangko da lapud asainmin tan kagalangan ya niiter ed sikara, tan wala rad paliber na trono na Dios.—Isaias 6:1-3.

Saray kerubin et atagey met so rangko da tan gagawaen da ray espisyal ya responsabilidad parad Makapanyarin-amin. Nabasa ed Biblia ya direkta iran manseserbi ed Dios.—Genesis 3:24; Ezequiel 9:3; 11:22.

Saray dakdakel nin anghel et manlilingkor ed Sankatagyan bilang mensahero to pian nagaway panlabayan to.a—Hebreo 1:7, 14.

a Parad kaaruman ya impormasyon tungkol ed saray anghel, nengnengen so kapitulo 10 na libron Anto so Peteg ya Ibabangat na Biblia? ontan met ed artikulo diad apendise ya “Siopa si Miguel ya Arkanghel?” ya im-publish na Saray Tasi nen Jehova. Wala met ed www.jw.org/pag.