“Say Ukom na Interon Dalin” et Naynay Ton Gagawaen no Antoy Maptek
“Say Bato, ayadyari so kimey to, ta amin a dalan to et inkahustisya.”—DEU. 32:4.
1. Panon ya imbalikas nen Abraham so talek tod inkahustisya nen Jehova? (Nengnengen so litratod gapo na artikulo.)
“KASIN say Ukom na interon dalin et agto gawaen no antoy maptek?” (Gen. 18:25) Diad satan ya tepet nen Abraham, imbalikas toy talek tod si Jehova ya iter Toy perpekton hustisya ed saray taga Sodoma tan Gomorra. Kombinsido si Abraham ya agbalot manggawa na ag-inkahustisya si Jehova diad “pamatey ed matunong a kaiba na mauges.” Parad si Abraham et “imposible” ya gawaen itan nen Jehova. Kayari na manga 400 ya taon, oniay imbaga nen Jehova nipaakar ed sarili to: “Say Bato, ayadyari so kimey to, ta amin a dalan to et inkahustisya. Sakey a matoor a Dios ya agbalot manggaway ag-inkahustisya; sikatoy matunong tan maptek.”—Deu. 31:19; 32:4.
2. Akin ya nibagan agnayarian nen Jehova so manggawa na ag-inkahustisya?
2 Akin ya matalek si Abraham a naynay ya matunong so panangukom nen Jehova? Lapud si Jehova so perpekton alimbawa na hustisya tan inkatunong. Diad tua, saray Hebreon salita ya impatalos ya “hustisya” tan “inkatunong” et mabetbet ya bibitlaen ya saniba ed Hebreon Kasulatan. Kaslakan ya anggapoy pandumaan na hustisya tan inkatunong. Siempre lapud si Jehova so mangiiter na estandarte na inkatunong, naynay ya base ed inkahustisya so panguusisa tod saray nagagawa. Sakey ni, nabasa ed Salita to ya “aaroen toy inkatunong tan hustisya.”—Sal. 33:5.
3. Mangisalaysay na alimbawa na ag-inkahustisya ya nagagawa ed mundo.
3 Naliligliwa iray matunong ya totoo no naamtaan dan naynay ya patas si Jehova, lapud sayan mundo et napno na ag-inkahustisya. Bilang resulta, wala ray biktima na graben ag-inkahustisya. Singa bilang, saray arum et sesentensiaan tan ipripriso anggano anggapoy kasalanan da. Insan labat nibulos iramay pigaran dekada ya apriso lapud krimen ya agda ginawa nen naimbento so pan-check na DNA pian rebyuen iray kaso. Anggaman makapadismaya tan makapasanok ni ingen so impangipriso ed saray inosente, wala ni sananey ya klase na ag-inkahustisya ya mas mairap parad saray Kristiano.
DIAD KONGREGASYON
4. Panon ya nasubok so pananisia na sakey a Kristiano?
4 Bilang Kristiano, iilaloan tayon makaeksperiensya tayoy ag-inkahustisya ed saray totoo ed mundo. Balet nasubok so pananisia tayo no walay naobserbaan odino nasali tayon singa ag-inkahustisya diad kongregasyon. Antoy reaksion mo no panisiaan mon walay nanggaway makapuy ed sika diad kongregasyon odino aliway impantrato ed sika na sakey ya agi? Kasin nagapol ka?
5. Akin ya agnabigla so sakey ya Kristiano no naobserbaan odino naeksperiensya toy ag-inkahustisya diad kongregasyon?
5 Lapud amin tayo et aliwan perpekto tan mainomay ya nalingo, amta tayon posiblin naeksperiensya tayoy ag-inkahustisya diad kongregasyon odino sikatayoy sengegan na satan. (1 Juan 1:8) Anggano mataltalag itan ya nagawa, saray matoor ya Kristiano et agnabigla odino agnagapol no bilang wala ray ag-inkahustisya. Angiter si Jehova na praktikal a bilin ed Salita to pian napansiansia tayoy katooran tayo, anggano naeksperiensya tayoy ag-inkahustisya lapud ginawa na agagi.—Sal. 55:12-14.
6, 7. Anton ag-inkahustisya ed kongregasyon so naeksperiensya na sakey ya brother, tan anto ran kualidad so tinmulong ed sikaton mansiansian balanse?
6 Imanoen so eksperiensya nen Willi Diehl. Manlapu nen 1931, matoor ya nanlingkor si Brother Diehl diad Bethel ed Bern, Switzerland. Nen 1946, sikatoy inmatendi ed komawalon klase na Gilead School diad New York, U.S.A. Ka-graduate to, sikatoy niyasain ya manangasikaso na sirkito ed Switzerland. Diad istoryay bilay nen Brother Diehl, oniay imbaga to: “Nen Mayo 1949, impaamtak ed headquarters diad Bern ya planok lay mangasawa.” Antoy ebat na opisina? “Anggapo lay arum ya pribilehyon niiter ed sika noagta regular payunir.” Onia ni imbaga nen Brother Diehl: “Agak naabuloyan ya manpaliwawa . . . Agkami la ibabano na dakel ya agagi, singa adispelo so impantrato dad sikami.”
7 Antoy ginawa nen Brother Diehl? Inkuan to: “Amta mi ya aliwan kontrad Biblia so pangasawa, kanian tuloytuloy kamin nampikasi tan nanmatalek ed si Jehova.” Asabi panaon, nipetek so lingon panmoria nipaakar ed panangasawa ya nansengegay ag-inkahustisya, tan naikdan lamet na saray pribilehyo si Brother Diehl. Abendisyonan so katooran tod si Jehova.a Kanian maabig no itepet tayod sarili tayo, ‘Kasin ontan met ya espiritualidad so ipanengneng ko no makaeksperiensya ak na ag-inkahustisya? Kasin maan-anos ak ya manalagar ed si Jehova, odino manggawa ak lay sarilik ya paraan?’—Pro. 11:2; basaen so Miqueas 7:7.
8. Akin ya nayarin nalingo kad panisip mo ya abiktima ka o say arum na ag-inkahustisya?
8 Balet, nayarin nalingo kad panisip mo ya abiktima ka na ag-inkahustisya odino say arum nin membro na kongregasyon. Posiblin nagawa iya lapud aliwan perpekto so pakatalos tayo odino lapud agtayo amta so amin ya detalye. Balanglan duga so atalosan tayo odino alingo tayo, makatulong so pampikasi, panmatalek, tan panmatoor ed si Jehova pian agtayo ‘onsanok ed sikato.’—Basaen so Proverbio 19:3.
9. Anto ran alimbawa so aralen tayod sayan artikulo tan ed onsublay?
9 Aralen tayo so taloran ag-inkahustisya ya agawad totoo nen Jehova nensaman. Diad sayan artikulo, konsideraen tayoy nipaakar ed apo ed pueg nen Abraham ya si Jose tan say ginawa na saray kuya to ed sikato. Diad ontumbok ya artikulo, aralen tayoy impantrato nen Jehova ed ari na Israel ya si Ahab tan say eksperiensya nen apostol Pedro diad Antioquia ed Sirya. Legan tayon pantotongtongan irayan alimbawa, imanoen iray leksion ya ontulong pian mansiansia kan akapokus ed espiritual tan naprotektaan moy relasyon mod si Jehova, lalo la no iisipen mon biktima kay ag-inkahustisya.
JOSE—BIKTIMA NA AG-INKAHUSTISYA
10, 11. (a) Anto ran ag-inkahustisya so naeksperiensya nen Jose? (b) Antoy pankanawnawa nen Jose diad prisoan?
10 Si Jose, ya matoor a lingkor nen Jehova et akaeksperiensya na ag-inkahustisya, aliwa labat ya diad saray totood mundo, noagta diad saray kuya to kanian mas ansakit. Nen tinedyer ni Jose, sikatoy kinidnap na saray kuya to tan inlako da bilang aripen. Anggano agto labay, sikatoy inawit ed Ehipto. (Gen. 37:23-28; 42:21) Kalabas na pigaran taon diad satan ya bansa, sikatoy naakusaan ya nan-rape tan bastabasta labat impriso. (Gen. 39:17-20) Sikatoy nanirap bilang aripen tan apriso na manga 13 taon. Anto ray naaralan tayod agawad si Jose ya makatulong no akaeksperiensya tayoy ag-inkahustisya lapud ginawa na sakey ya agi?
11 Awalaan na pankanawnawa si Jose ya ipaliwawa so kaso to ed kapara ton priso ya datin managserbi na iinumen na ari. Legan na panaon ya sanibad prisoan si Jose tan samay managserbi na iinumen, nankugip imay managserbi na iinumen, tan impaliwawa nen Jose so kabaliksan na satan. Imbaga to ya nipawil so managserbi na iinumen ed datin posisyon tod palasyo na Faraon. Nen imbaga nen Jose so nanlapud Dios ya kabaliksan na kugip na managserbi na iinumen, sinambot to met so pankanawnawan ipaliwawa so situasyon to. Makaaral tayo na importantin leksion aliwa labat ya diad saray imbaga nen Jose noagta pati diad saray agto imbaga.—Gen. 40:5-13.
12, 13. (a) Antoy pakanengnengan ya agbasta inawat nen Jose iray ag-inkahustisya ya naeksperiensya to? (b) Anto ran detalye so ag-imbaga nen Jose ed managserbi na iinumen?
12 Basaen so Genesis 40:14, 15. Imanoen ya imbaga nen Jose ya sikatoy ‘puersaan ya inala.’ Diad orihinal ya lenguahe, mankabaliksan itan na “tinakew.” Malinew ya sikatoy biktima na ag-inkahustisya. Imbaga met nen Jose ya anggapoy kasalanan to pian ipriso. Kanian, kinerew tod samay managserbi na iinumen ya sikatoy salitaen to ed Faraon. Akin? Oniay imbaga ton rason: “Pian nipaway ak ed sayan pasen.”
13 Kasin nanengneng ed satan ya imbaga nen Jose ya basta to labat inawat so situasyon to? Andi. Amta ton sikatoy aminpigan biktima na ag-inkahustisya. Impaliwawa to ray agawad sikato ed samay managserbi na iinumen, ya nayarin makatulong ed sikato. Balet tandaan ya anggapoy nabasad Biblia ya walay angibagaan nen Jose ya saray kuya to so nankidnap ed sikato. Agto itan imbaga anggan diad Faraon. Diad tua, nen linmad Ehipto iray kuya to tan akikasi rad sikato, inawat ira na Faraon tan inimbitaan to ran manayam ed Ehipto pian panliketan so “sankaabigan ed interon dalin na Ehipto.”—Gen. 45:16-20.
Say negatibon panagsalita et posiblin palooren toy problema ya anggad agla nakontrol (Nengnengen so parapo 14)
14. Antoy manprotektad sikatayo pian agtayo natukson mansalita na negatibo anggano makaeksperiensya tayo na ag-inkahustisya ed kongregasyon?
14 No iisipen na sakey a Kristiano ya sikatoy biktima na ag-inkahustisya, kaukolan toy manalwar pian agnatukson mantsismis. Siempre, duga labat ya onkerew na tulong ed saray elder tan ipaamtad sikara no walay membro na kongregasyon ya nanggaway seryoson lingo. (Lev. 5:1) Balet diad dakel ya situasyon ya aliwan seryoson lingo so agawaan na agim, nayarin ayosen so agpantatalosan ya anggapo lay arum ya ilanor, anggan saray elder. (Basaen so Mateo 5:23, 24; 18:15.) Komon ta gawaen tayoy anggaay nayarian tayon resolbien iratan ya isyu base ed saray prinsipyo na Biblia. Diad arum ya situasyon, ompan namoria tayo lanlamang ya agtayo manaya abiktima na ag-inkahustisya. Seguradon maliket tayo ta agtayo pinaloor so situasyon diad pamauges ed agi tayo! Tandaan, balanglan duga itayo o andi, anggapon balot so nitulong na negatibon panagsalita. Say katooran ed si Jehova tan ed saray agagi tayo so manprotektad sikatayo pian agtayo itan gawaen. Imbaga na salmista ya “samay manaakar ya andiay pakabalawan” et “agto uusarey dila to pian deralan so arum, agmanggagaway mauges ed kapara ton too, tan agto dederalan so kakaaro to.”—Sal. 15:2, 3; Sant. 3:5.
AGLILINGWANAN SO SANKAIMPORTANTIAN YA RELASYON MO
15. Akin et bendisyon ed si Jose so relasyon tod si Jehova?
15 Wala ni mas importantin naaralan tayo ed relasyon nen Jose ed si Jehova. Diad 13 taon ya impanirap to, pinaneknekan to ya miparay panmoria to ed si Jehova. (Gen. 45:5-8) Agton balot tinetel si Jehova ed saray agawad sikato. Anggano agto alingwanan iray makapuy ya naeksperiensya to, agto nanem-em na sakit na linawa. Sankaimportantian ed amin, agto inabuloyan ya lapud ag-inkaperpekto tan lingo na arum et naderal so relasyon tod si Jehova. Matoor si Jose kanian anengneng ton impetek nen Jehova iray ag-inkahustisya tan sikatoy abendisyonan tan say pamilya to.
16. Akin ya nepeg ya mas onapit tayod si Jehova no makaeksperiensya tayo na ag-inkahustisya ed kongregasyon?
16 Diad sikatayo met natan, nepeg tayon pablien tan protektaan so relasyon tayod si Jehova. Agtayon balot aabuloyan so ag-inkaperpekto na agagi ya makapangisian ed sikatayod Dios ya aaroen tan dadayewen tayo. (Roma 8:38, 39) Imbes, no makaeksperiensya tayoy ag-inkahustisya lapud ginawa na sakey ya agi, komon ta aligen tayoy Jose tan mas onapit tayod si Jehova, pansagpotan tayon aligen so panmoria to. No ginawa tayo lay amin ya paraan ya ibabaga na Biblia pian resolbien so situasyon, kaukolan ya ipalima tayo la itan ed si Jehova, tan manmatalek tayon ipetek to itan diad dugan panaon tan paraan to.
MANMATALEK ED “UKOM NA INTERON DALIN”
17. Panon tayon nipanengneng ya manmamatalek tayod “Ukom na interon dalin”?
17 Legan ya manbibilay tayo ed sayan mauges a mundo, walan walay naeksperiensya tayon ag-inkahustisya. Anggano matalag ya nagagawa, nayarin sikan mismo odino say arum et makaeksperiensya o makaobserba na singa ag-inkahustisya ed kongregasyon. Agmo aabuloyan ya nagapol ka. (Sal. 119:165) Imbes, bilang lingkor na Dios, matoor tayod sikato tan manmamatalek tayo panamegley na pikakasi. Sakey ni, mapaabeba tayon awaten ya ompan agtayo amta so amin ya detalye. Amta tayo ya aliwan perpekto so pakatalos tayo kanian nayarin aliwa so iisipen tayo. Naaralan tayod alimbawa nen Jose ya nepeg tayon paliisay negatibon panagsalita, ta say ontan ya panagsalita et palooren to labat so situasyon. Kaunoran, imbes ya basta ti labat onkiwas ed sarili tayon paraan, komon ta determinado itayon magmaliw ya matoor tan maan-anos ya manalagar ed si Jehova ya mangipetek ed situasyon. No ontan so gawaen tayo, seguradon abobonan tan bendisyonan itayo nen Jehova ya singa ginawa tod si Jose. On, matalek tayo ya si Jehova, “say Ukom na interon dalin” et naynay ton gawaen no antoy maptek “ta amin a dalan to et inkahustisya.”—Gen. 18:25; Deu. 32:4.
18. Antoy aralen tayod onsublay ya artikulo?
18 Diad onsublay ya artikulo, aralen tayoy duara nin ag-inkahustisya ya agawad saray totoo nen Jehova nensaman. Nanengneng tayod sarayan salaysay a say kapaabebaan tan inkamabulos ya mamerdona et mikonektaan ed panmoria nen Jehova ed inkahustisya.
a Nengnengen so istoryay bilay nen Willi Diehl diad artikulon “Jehovah Is My God, in Whom I Will Trust,” diad Nobyembre 1, 1991 ya The Watchtower.