Antoy Dugan Gawaen Tayo No Walay Ag-inkahustisya?

1-2. Antoy reaksion na maslak ya totoo ed ag-inkahustisya, tan antoy pantongtongan tayo ed sayan artikulo?

SAYAN mundo et napnoy ag-inkahustisya. Wala ray totoo ya mamaltratoen day kapara dan too lapud mairap so bilay da, dumay lahi da, lapud itsura da, o arum nin rason. Dakel met so maniirap lapud gagawaen na saray makasarilin negosyante tan kurakot ya opisyal na gobierno. Amin tayo et nayarin nabiktima na sarayan ag-inkahustisya.

² Agti la pankelawan sirin no akin ya dakel so totoon ampetang so ulo ra lapud sarayan nagagawa. Siempre, labay tayoy manbilay ed mundo ya patas so panagtrato ed amin, tan amay anggapoy panaburidoan tayo. Kanian sasalien na arum so manggaway paraan pian nasolusyonan iray problema ed mundo odino diad bansa ra. Singa bilang, manproprotesta ira odino susuportaan da iray politiko o partido ya say sipan da et ekalen da kuno so ag-inkahustisya. Pero sikatayo ran Kristiano, agtayo itan gagawaen ta ‘agtayo kabiangay mundo,’ tan amta tayo ya say Panarian na Dios labat so makaekal ed amin ya ag-inkahustisya. (Juan 17:16) Pero no maminsan, agtayo naiwasan so nadismaya odino onsyodot ni ingen no walay nanengneng tayon maniirap lapud aliwan patas so impantrato da ed sikato. Ompan naisip mo, ‘Anto kasi dugan gawaen ko no walay ag-inkahustisya? Wala kasi nagawaan ko natan legan kon aalagaren so panaon ya naandi so ag-inkahustisya?’ Pian naebatan iratan ya tepet, pantongtongan tayo ni no antoy nalilikna nen Jehova tan nen Jesus ed saray nagagawan ag-inkahustisya.

KABUSOL NEN JEHOVA TAN JESUS SO AG-INKAHUSTISYA

3. Akin et agtayo labay so makanengneng na ag-inkahustisya? (Isaias 5:7)

³ Nabasa ed Biblia so rason no akin ya agtayo labay so makanengneng na ag-inkahustisya. Ibabaga na Biblia ya ginawa itayo nen Jehova “unong ed indengan” to, tan lapud ‘inaro to so inkatunong tan inkahustisya,’ ontan tayo met. (Gen. 1:26; Sal. 33:5) Patas ya Dios si Jehova, tan kabusol to iramay aliwan patas so panagtrato da ed kapara dan too! (Deu. 32:​3, 4; Miq. 6:8; Zac. 7:9) Singa bilang, nen panaon nen propetan Isaias, arengel nen Jehova so “panakis” na saray Israelita lapud panmamaltrato ed sikara na saray kabaleyan da. (Basaen so Isaias 5:7.) Sinegurado nen Jehova ya nadusa iramay Israelita ya agmanguunor ed Ganggan to tan anggapoy panangasi da ed arum.—Isa. 5:​5, 13.

4. Antoy nalilikna nen Jesus no nanengneng ton anggapoy panangasi na arum ya too ed kapara dan too? Mangiter na alimbawa. (Nengnengen met so litrato.)

⁴ Singa si Jehova, inaro met nen Jesus so hustisya tan kabkabusol toy ag-inkahustisya. Nen wadiad dalin, wala tay inkagawa ya anengneng toy sakey ya laki ya say lima to et paralisado. Akasian nen Jesus kanian pinaabig to. Pero mamapasnok iramay wadman ya lider na relihyon, ta bawal kunoy manpaabig no agew na Sabaton. Mapatpatnag ya anggapoy panangasi ra! Antoy alikna nen Jesus nen ontan so reaksion da? Sikatoy “naermenan a maong ed inkaawet na puso ra.”—Mar. 3:​1-6.

5. Anggano walay rason tayon onsyodot ed ag-inkahustisya, anto dapat so tandaan tayo?

⁵ On, kabkabusol nen Jehova tan Jesus so ag-inkahustisya, kanian aliwan makapuy no ontan met so nalikna tayo. (Efe. 4:26; nengnengen so study note ya “napoot” diad nwtsty-TG.) Pero anggano wala met so rason tayon onsyodot, tandaan tayo ya aliwan satan so solusyon ed ag-inkahustisya. Sakey ni, no agtayo kontroley liknaan tayo, sikatayo lanlamang so kaskasian. Ompan atan laingen so rason ya mansakit o na-depress tayo. (Sal. 37:​1, 8; Sant. 1:20) Anto sirin so gawaen tayo no walay ag-inkahustisya? Makaaral tayo ed alimbawa nen Jesus.

ANTOY GINAWA NEN JESUS ED ANENGNENG TON AG-INKAHUSTISYA?

6. Anto ran ag-inkahustisya so anengneng nen Jesus nen wadiad dalin? (Nengnengen met so litrato.)

⁶ Nen wadiad dalin si Jesus, anengneng ton mismo so aliwliwan panagtrato na arum ed kapara dan too. Singa bilang, kaskasian iray ordinaryon totoo lapud karakel na ganggan ya ginawa na saray lider na relihyon. (Mat. 23:​2-4) Anggapo met so panangasi na saray Romanon opisyal ed saray Judio. Mair-irap so bilay na dakel ya Judio kanian labalabay da lay nibulos ed uley na Roma. Say arum ingen et akaparaan ya mipateyan pian nibulos ira, singa say grupo ya tatawagen ya Zealot. Pero si Jesus, agan balot akila o sinmuporta ed ontan iran grupo. Diad tua, nen naamtaan to ya plaplanoen na totoo ya gawaen dan ari, imbatikan to ra.—Juan 6:15.

7-8. Nen wadiad dalin si Jesus, akin et agto sinalin solusyonan so ag-inkahustisya? (Juan 18:36)

⁷ Akin et ag-akibabali si Jesus ed politika? Amta to ya agsarag na too ya solusyonan so ag-inkahustisya, tan anggapoy abilidad tan karapatan na too ya uleyan so kapara ton too. (Sal. 146:3; Jer. 10:23) Sakey ni, anggapoy pakayari na too ya ekalen so lamot na amin ya ag-inkahustisya—si Satanas tan say atawir tayon kasalanan. Si Satanas so manuuley ed sayan mundo. Anggapon balot so panangasi to! Kanian ontan met so ugali na saray uuleyan to. (Juan 8:44; Efe. 2:2) Tan lapud atawir tayon kasalanan, anggan say sankamaongan lan too et walan-walay nagawaan ton aliwa ed kapara ton too.—Ecl. 7:20.

⁸ Amta nen Jesus ya say makaekal labat ed lamot na ag-inkahustisya et say Panarian na Dios. Atan so rason no akin ya amaspasyan ‘nampulong tan angiyabawag ed maong a balita na Panarian na Dios.’ (Luc. 8:1) Impaseguro tod saray “naeerasan tan napepegaan parad inkatunong” ya onsabi panaon et naandi lay kurapsion tan ag-inkahustisya. (Mat. 5:​6, nengnengen so study note diad nwtsty-TG; Luc. 18:​7, 8) Pero aliwan gobierno na too so manggawa ed satan. Say makagawa labat ed satan et say Panarian o gobierno na Dios, ya “agkabiangan na sayan mundo.”—Basaen so Juan 18:36.

ALIG MOY JESUS NO WALAY NANENGNENG MON AG-INKAHUSTISYA

9. Akin et segurado ka ya Panarian na Dios labat so makaekal ed amin ya ag-inkahustisya?

⁹ Manbibilay tayo la ed “kaunoran iran agew” kanian mas dakel so ag-inkahustisya natan no ikompara ed samay panaon ya wadiad dalin si Jesus. Pero siansia ni ya say lapuan na ag-inkahustisya et si Satanas tan saray agperpekton totoo ya uuleyan to. (2 Tim. 3:​1-5, 13; Apo. 12:12) Singa si Jesus, amta tayo ya Panarian na Dios labat so makaekal ed lamot na ag-inkahustisya. Atan labat ya gobierno so susuportaan tayo, kanian agtayo mibabali ed saray protesta tan ed arum nin gagawaen na totoo pian nasolusyonan kunoy ag-inkahustisya. Imanoen pay eksperiensya nen Sister Stacy.a Antis ton naamtaay katuaan, lanang ya mimila ed saray rally. Pero nen manbayag la, apaisip no kasin walan talagay nitutulong to may gagawaen to. Kuan to: “No mimila ak ed rally, napapaisip ak no kasin duga so solusyon ya ilalaban ko. Pero natan ya Panarian na Dios lay susuportaan ko, segurado ak ya ayan talaga so solusyon! No ikomparad si Jehova, anggapoy nagawaan ko! Segurado ak ya iyagel to so kada biktima na ag-inkahustisya.”—Sal. 72:​1, 4.

10. Akin et nibaga tayo ya say pamprotesta et kontra ed samay bangat nen Jesus ya nabasad Mateo 5:​43-48? (Nengnengen met so litrato.)

¹⁰ Dakel so totoo natan ya mimila ed saray grupo ya kontra ed gobierno, tan manproprotesta ira ta labay dan walay nagawan pananguman. Pero say problema, rebelyoso ira tan anggapoy pibabali da anggano nasakitan day arum. (Efe. 4:31) Aliwan ontan so ugali nen Jesus, tan kontra itan ed bangat to. Imanoen iyan imbaga nen Brother Jeffrey: “Diad gapo, singa mareen met iray manra-rally. Pero nagugunoyan, magulogulo la ra tan nambabangil lay dederalen tan tatakewen da.” Aratan ya ugali tan kagagawa et duman maong ed samay imbangat nen Jesus ya aroen tayoy amin ya totoo, anggan saramay mamubusol tan mamapairap ed sikatayo. (Basaen so Mateo 5:​43-48.) Lapud papatumbok itayo nen Jesus, aligen tayoy alimbawa to tan gawaen tayoy anggaay nayarian tayo ya unoren so bangat to.

11. Antoy situasyon ya ompan nairapan tayon aligen si Jesus?

¹¹ Anggano amta tayo ya Panarian na Dios labat so solusyon ed ag-inkahustisya, ompan nairapan tayon aligen si Jesus no sikatayo lan mismo so abiktima. Ontan so agawad si Sister Janiya. Aliwliway impantrato na arum ed sikato lapud lahi to. Onia kunoy alikna to: “Ampetang so ulok! Asakisakitan ak. Labay koy ombawi ed saramay totoon nanmaltrato ed siak. Naisip ko ingey onsuporta ed saray grupo ya kontra ed diskriminasyon. Say amtak, no gawaen ko ’tan, anggan panon et onkepay pasnok ko.” Pero atalosan lanlamang nen Janiya ya aliwan saman so solusyon. Kuan to: “Aliwliway epekto tod siak ta singa puppulyanan ko labat ya impluensyaan ak na arum. Alikas ko ya mantitiwala ak lad too, imbes ya diad si Jehova. Kanian pinultot ko lay koneksion ko ed saraman ya grupo.” On, anggano walay rason tayon onsyodot lapud nagagawan ag-inkahustisya, manalwar tayo ta ompan mibabali tayo la manaya ed nanduruman isyu tan aliwa tayo lan neutral ed politika.—Juan 15:19.

12. Akin et kaukolan tayoy manalwar ed saray babasaen, dedengelen, tan babantayan tayo?

¹² Antoy makatulong pian nakontrol tayoy liknaan tayo no walay ag-inkahustisya? Manalwar tayo ed saray babasaen, dedengelen, tan babantayan tayo. Singa bilang diad social media, wala ray mangipo-post na saray istorya, litrato, tan video ya makapabigla o eksaheradon maong. Tan say arum et puros reklamo ed gobierno so ipo-post da. Wala met iray reporter ya puros opinyon da labat so ibabaga ra imbes ya ibalita da no antoy tuan agawa. Anggano bilang ta tua met so abalitaan tayon ag-inkahustisya, wala kasi nitulong na pansubaybay tayod satan? Anggapo. Tan diad tua, ompan naaburido tayo labat tan onkapuy so liknaan tayo. (Pro. 24:10) Ompan onsabi ni ingen ed punto ya nalingwanan tayo lan say Panarian na Dios labat so alenleneg ya solusyon ed ag-inkahustisya.

13. Panon ya makatulong so inagew-agew ya pambasa na Biblia pian onligen so nonot tayo no walay ag-inkahustisya?

¹³ No walay nagawan ag-inkahustisya, makatulong so inagew-agew ya pambasa na Biblia tan pandalepdep pian onligen so nonot tayo. Ontan so ginawa nen Sister Alia nen wala ray totoo ed lugar da ya anengneng ton mamaltratoen na arum. Agto kuno natanggap ya agnadudusa iramay manlalames ed kapara dan too. Kuan to: “Tinepetan koy sarilik, ‘Kasin manisia ak ya talagan solusyonan nen Jehova irayan problema?’ Dugaruga ta say Bible reading ko ed saman et diad libro na Job. Nen abasak may Job 34:​22-29, apanonotan ak ya anggapoy naiyamot ed si Jehova. Sikato labat so makapangiter na tuan hustisya, tan seguradon iter to itan!” Pero say tepet, antoy gawaen tayo legan tayon aalagaren ya solusyonan na Panarian na Dios so ag-inkahustisya?

ANTOY GAWAEN TAYO LEGAN TAYON MANAALAGAR?

14. Antoy gawaen tayo pian agtayo la makaaru-arum ed ag-inkahustisya ed mundo? (Colosas 3:​10, 11)

¹⁴ On, dakdakel natan so anggapoy panangasi ra ed kapara dan too, tan siempre, agtayo kontrolado itan. Pero kumustay mismon ugali tayo ey? Panoy pantratrato tayo ed kapara tayon too? Singa abitla nen niman, naalig tayoy Jesus no ipanengneng tayoy panangaro. No inaro tayoy kapara tayon too, marespeto so pantrato tayo ed sikara, anggan diad saray manggagaway mauges. (Mat. 7:12; Roma 12:17) Seguradon naliliketan si Jehova no maomaong tan patas so pantrato tayo ed amin.—Basaen so Colosas 3:​10, 11.

15. Antoy resulta no ibaga tayod totoo iray katuaan ed Biblia?

¹⁵ Say sankaimportantian ya paraan pian natulongan tayo ray totoo et no ipaamta tayod sikara iray katuaan ed Biblia. Akin et makatulong itan? On ta say ‘kakabatan nipaakar ed si Jehova’ et sarag ton umanen so sakey ya too. Anggan say sankaugesan tan sankaruksaan lan too et sarag ton naaralan so magmaliw ya mareen tan maaro no naamtaan toy katuaan ed Biblia. (Isa. 11:​6, 7, 9) Ontan so agawad sakey ya laki ya say ngaran to et Jemal. Antis ya naamtaan nen Jemal so katuaan, sikatoy membro na sakey ya grupo na saray rebelde ya kontrad gobierno na bansa ra. Kuan to: “Apatunayan ko ya agmo napuersan manguman so sakey ya too. Anggapo pay nampuersa ed siak ya manguman. Anguman ak lapud saray katuaan ya naamtaan ko ed Biblia.” On, lapud saray naaralan nen Jemal, mareen lan too natan. Kanian no diman mas dakel so iyaralan tayoy Biblia tan manguman ira, diman met mas ondaiset so manggaway ag-inkahustisya.

16. Akin et labalabay mon ibaga ed arum so gawaen na Panarian na Dios?

¹⁶ Singa si Jesus, labalabay tayo met ya ipaamta ed arum ya say Panarian na Dios labat so makapangiter na permanentin solusyon ed ag-inkahustisya. No naamtaan itan na saray totoon biktima na ag-inkahustisya, nawalaan iray ilalo. (Jer. 29:11) Oniay imbaga nen Stacy ya abitla nen niman: “Dakdakel so anengneng tan dinalan kon ag-inkahustisya. Pero nen naamtaan ko ya ekalen na Dios so amin ya paniirap tayo, linmemew so liknaan ko. Talagan makaligliwa so mensahe na Biblia.” Pian nipaamtam ed totoo so mensahe na Biblia, dapat akaparaan ka. Marakep sirin no kabisadoen mo iray punto ya tinalakay tayo ed sayan artikulo. No kombinsido ka ya tua so ibabaga na Biblia, akaparaan kan mansalita no bilang ta napantongtongan so ag-inkahustisya, tan nibagam ed saray kaklasem, katrabahom, tan arum nin totoo no antoy gawaen nen Jehova diad arapen.b

17. Panon to tayon tutulongan nen Jehova pian nasarag tayoy ag-inkahustisya?

¹⁷ Anggad uuleyan nen Satanas iyan mundo, walan-walay ag-inkahustisya. Pero labay to kasin ibaga, pakaskasi tayo la kalamor legan tayon aalagaren ya “napataynan” si Satanas? (Juan 12:31) Andi, ta tutulongan to tayo nen Jehova pian nasarag tayoy ag-inkahustisya. Singa bilang, impaamta tod sikatayo diad Biblia no akin ya walay ag-inkahustisya tan no antoy nalilikna to ed saray biktima. (Sal. 34:​17-19) Impaisulat to met ed Biblia so alimbawa nen Jesus ya pakaaralan tayo. Tan nabasa tayo met ditan ya asingger lan ekalen na Panarian so ag-inkahustisya. (2 Ped. 3:13) Kanian komon ta maseseg tayon ipulong so maong a balita na Panarian legan tayon aalagaren so panaon ya niwalay “inkahustisya tan inkatunong” diad interon dalin.—Isa. 9:7.