No Panon Mon Aralen so Biblia Diad Paraan ya Mas Makagunggona tan Makapaliket

Babasaen nen Josue so Ganggan; nagba iray padir na Jerico balet ag-apilanor so abung nen Rahab; intagey nen Josue iray lima to nen nampikasi

MAIR-IRAP ya asainmin so arapen nen Josue. Kaukolan ton idaulo so nasyon na Israel diad Insipan a Dalin tan aliwan mainomay itan. Balet sikatoy pinaseguroan nen Jehova ya nagawaan to itan, tan pinaseseg to: ‘Manpakpel tan manpabiskeg kan maong. Unor mo ray Ganggan ko. Basam itan ed agew tan labi, pian maalwar mon nagawaan so amin a nisulat ed satan. Diad ontan et ontalona ka, tan onkiwas kan walaay karunongan.’—Jos. 1:7, 8.

Diad sayan “mapeligro tan mair-irap a panaon,” onaarap tayo met ed mairap iran subok. (2 Tim. 3:1) Singa si Josue, ontalona tayo no unoren tayo ray bilin nen Jehova ed sikatayo. Regular tayon basaen so Biblia tan maalwar ya iyaplika iray prinsipyo na satan ed saray subok ya aarapen tayo.

Balet, aminen na dakel ed sikatayo ya agtayo apasal ya manaral tan aliwan mainomay itan parad sikatayo. Balet, lapud importantin maong so panaral na Biblia, nengnengen so kahon ya “Salien Irayan Suhestion” pian naamtaan iray nayarin makatulong ya magmaliw a mas makagunggona tan makapaliket so panaral tayoy Biblia.

“Iwanwan mo ak pad basbas na saray ganggan mo,” so inkansion na salmista, “ta satan so panliliketan ko.” (Sal. 119:35) On, talagan na-enjoy mo so panaral na Salitay Dios. Nadiskobrem iray makagunggonan katuaan, legan mon kokotkoten iray espiritual a kayamanan.

Anggano agmo kaukolan ya idaulo so sakey ya nasyon a singa ginawa nen Josue, wala met iray subok ya aarapen mo. Kanian singa si Josue, aralen tan unoren iray nisulat parad pakagunggonaan mo. No ontan so gawaen mo, magmaliw ka met ya matalona tan onkiwas kan marunong.

SALIEN IRAYAN SUHESTION

Manpikasi antis kan manaral. Karga na Biblia iray kanonotan na makapanyarin amin a Dios ya impaisulat to parad pakagunggonaan mo. Kanian no basaen moy Biblia, kerew moy tulong to pian natalosan, natandaan, tan niyaplikam itan ed bilay mo.—Esd. 7:10.
Tepetan moy sarilim legan mon babasaen so Biblia odino saray literatura tayo ya base ed Biblia: ‘Antoy naaralan kod saya nipaakar ed si Jehova? Panon iyan mikonektaan ed interon mensahe na Salita To? Panon kon nausar iya pian natulongan so arum?’
Dalepdep mo ray nanaaralan mo. Ontundan magano diad pambabasam, tan mannonot: ‘Antoy epekto na saya ed siak? Akin et oniay naliliknak? Panon iyan mikonektaan ed saray apalabas ya eksperiensyak, situasyon ko natan, odino diad posiblin nagawa ed arapen? Panon kon niyaplika irayan prinsipyo tan simbawa na Biblia ed bilay ko?’ (Job 23:5; Sal. 49:3) Salim ya ipaliwawa no akin ya bibilinen nen Jehova iray lingkor to ya paliisan iray pigaran kagagawa odino iray nayarin pansumpalan na ag-iyunor ed saray ganggan to.—Deu. 32:28, 29.
Usar moy imahinasyon mo no babasaen mo ray salaysay ed Biblia. Singa bilang, sarag mo kasin ilitratod nonot mo so eksena nen inlako si Jose na saray kuya to ed saray Ismaelita? (Gen. 37:18-28) Antoy nanenengneng, narerengel, tan nasisingob mo? Iyan moy sarilim ed situasyon na saramay karakter ed Biblia. Antoy iisipen tan nalilikna da? Makatulong iratan pian magmaliw ya mas mabilabilay tan lalon makagunggona so panagaral mo.
Usaren iray tulong ed panaral na Biblia ya intarya pian makatulong ed pan-research mo. Kabisadoen iratan ya tools ya walad lenguahem, balanglan online odino inimprinta. Agka nababaingan ya manpatulong ed arum no panon ya epektibon usaren iratan. Singa bilang, say Watch Tower Publications Index odino say Giya ed Pan-research na Saray Tasi nen Jehova, so makatulong ed sikan naanap iray reperensya na dakel a topic tan naamtaan iray eksplinasyon nipaakar ed dakel a bersikulo ed Biblia. Usaren iray apendise na Balon Mundo a Patalos na Masanton Kasulatan no wala itan ed lenguahem. Naalmo ditan iray makatulong ya impormasyon nipaakar ed geography, kronolohiya, panagsimbang tan panagsukat, tan arum ni.
Isumaryo iray manunan punto ya naaralan mo pian agmo iratan nalingwanan. Mas maabig met no inabang mo itan ed arum. Kasin walay nausar mod ministeryom? No ontan so gawaen mo, aglabat mansiansia ed nonot mo iray manunan punto noagta nausar mo met iratan pian nagunggonaan so arum.