Gawaen ya Maliket so Bilay Mo
DIAD arapen, sarag moy manbilay ya agka la mansakit, ontatken, tan ompatey! Balet natan, say bilay tayo et mair-irap tan dakdakel so problema. Antoy makatulong pian magmaliw ya maliket so bilay mo natan? Mangiiter so Biblia na saray bilin ya makatulong ed sikan magmaliw ya maliket tan kontento ed bilay mo. Imanoen so pigara ed saray probleman aarapen tayo tan no panon itayon natulongan na Biblia.
MANKONTENTO
Say bilin na Biblia: “Komon ta agnapatnagan ed kabibilay yo so panangaro ed kuarta, tan mankontento kayo ed saray bengatlan walad sikayo.”—Hebreo 13:5.
Diad panaon tayo, dakdakel so iyoopresi na mundo ya kaukolan tayo kuno. Balet, ibabaga na Biblia ya sarag tayoy ‘mankontento ed saray bengatlan walad sikatayo.’ Panon?
Paliisan so “panangaro ed kuarta.” Lapud “panangaro ed kuarta” saray totoo natan et gawaen day amin anggano mansakit ira, naderal so pamilya ra, pikakaaro, moralidad, pati say dignidad da. (1 Timoteo 6:10) Agaylay kabaleg na isasakripisyo da! Balet say mangaaro ed kayamanan et “agbalot napenek.”—Eclesiastes 5:10.
Mas importante iray totoo nen saray gamit. Tua, mausar iray materyal a bengatla. Balet ag-itayo aroen odino pisalamatan na saray gamit; totoo labat so makayarin manggawa ed satan. Say “tuan kaaro” so makatulong ed sikan mankontento ed bilay.—Proverbio 17:17.
MAGMALIW YA MALIKET SO BILAY TAYO NO UNOREN TAYO IRAY BILIN NA BIBLIA
MANANOS NO WALAY SAKIT MO
Say bilin na Biblia: “Say maliket a puso et maong a tambal.”—Proverbio 17:22.
Say liket et singa “maong a tambal” ya tulongan to tayon mananos no walay sakit tayo. Balet panon itayon magmaliw ya maliket no mansasakit tayo?
Magmaliw ya maapresya. No say lanang tayon sankanonot et saray problema tayo, say pakalikna tayo et mauges lay “amin ya agew.” (Proverbio 15:15) Mas maong no “ipanengneng yon misalsalamat kayo,” so kuan na Biblia. (Colosas 3:15) Iyugali ya apresyaen iray maabig ya bengatla anggan panon kamelag iratan. Singa say balibalin iseselek na agew, ambetel ya siplog na dagem, tan imis na inarom ed bilay. Mas maliket tayo no aapresyaen tayo iratan.
Tulongan so arum. Anggano walay sakit mo, siansia nin “mas makapaliket so mangiter nen say mangawat.” (Gawa 20:35) No aapresyaen na arum so gagawaen tayo, naliliketan tayo, tan nalilingwanan tayon magano iray problema tayo. Sarag tayon gawaen ya mas maliket so bilay tayo no tulongan tayoy arum ya magmaliw a mas maliket.
PAELETEN SO RELASYON YON SANASAWA
Say bilin na Biblia: “Seguroen yo komon no anto ray mas importantin bengatla.”—Filipos 1:10.
Saray sanasawan ngalngali anggapoy panaon da ed sakey tan sakey et napepeligron naderal so relasyon da. Kanian nepeg ya iprayuridad na sanasawa so panamaley da—sakey ed saray sankaimportantian ed bilay da.
Saniba ya gawaen iray kimey. Imbes ya kanya-kanya yon gawaen iray hilig yo, iplano yon gawaen iratan ya saniba. “Mas maong ni duara nen say sakey,” so kuan na Biblia. (Eclesiastes 4:9) Sarag yoy saniba ya manluto, man-exercise, mankape o manmerienda, odino gawaen iray hilig yo.
Ipanengneng so panangarom. Ibabaga na Biblia ed saray sanasawa ya manaroan tan ipanengneng day respeto ed sakey tan sakey. (Efeso 5:28, 33) Baleg so nagawaan na balibalin imis, maar-aron lakap, odino simplin regalo pian onelet so relasyon na sanasawa. Tan nepeg ya parad sanasawa labat so seksual ya relasyon.—Hebreo 13:4.