Usaren Iray Tract a Pangigapoy Tongtongan
1 Agkayo ta miabobon a say epektibon panpulong et mandependin tuloy ed pangigapo na tongtongan? Say angat et say pangibaga na bengatlan managyat ed too tan pangibiang yo ed sikato. Balet panon iyan nagawaan ya epektibo?
2 Nalmoan na dakel a manangipalapag a diad pigaran alay abig a salita tan diad pangiyopresi na sakey ed saray nibase’d-Biblia a tract so makapangigapo na tongtongan. Saray titulo so makapasagyat, tan saray ilustrasyon so makolor tan makapaayat. Say tract so agmakapadismaya ed too, a mangiter na impresyon a dakel ya impormasyon a basaen. Siansia, say asegek iran mensahe ed saray tract so makapasagyat tan nausar a pangiyaral ed Biblia.
3 Onia so alikna na sakey a Tasi: “Diad sayan okupadon mundo, mabetbet et aglabay na totoo so manbasa a mangalay baleg a panaon, balet saray tract so magenap la a mangiter na importantin mensahe ingen aliwan andukerukey itan a sengeg na agla pangimano na totoo ed satan. Dakel iran tract so abasak, tan ag-abayag et naamtaan ko so katuaan.” Agleglemewen so pakayari na Salitay Dios a singa nipaliwawa ed sarayan antikey tan niprinta iran mensahe.—Heb. 4:12.
4 Apatiran Mainomay a Paraan: Dakel so tinmalona diad simplin iyaasingger. (1) Ipanengneng ed too so pigara ed saray tract tan tepetan mo no dinan so paninteresan to. (2) No akapili la, tepetan na alay abig a tepet a mangipabitar ed manunan punto ed tract. (3) Bilang ebat ed tepet, basaen so sakey a matukoy a parapo odino teksto a walad tract. (4) No marakep so inyebat to, ituloy a singbaten iray lugan na tract odino itukoy ed sakey a leksion diad brosyur a Kakaukolanen odino ed kapitulo diad libron Pikakabat a mangiter na kaaruman iran komento. Diad onian paraan nayarian yo lan tampol ya iyaralan na Biblia. Saray onggendan a suhestion so makatulong ed sikayon iparaan no antoy ibaga yo ya usaren so apatira ed saray tract.
5 Say paulo na tract a “Siopan Peteg so Manguuley ed Mundo?” so nayarin itepet:
◼No say ebat ed satan na too a katongtong yo et ibaga ton “Dios” odino “Agko amta,” basaen so manangilukas a duaran estansa ed pahina 2 tan say unonan parapo ed pahina 3. Ipabitar so 1 Juan 5:19 tan Apocalipsis 12:9. Manduaruwa man odino andi so too ed kiwawala nen Satanas a Diablo odino bidbiren to so impluensia to ed mundo, nayarian yon ituloy iray eksplinasyon diad silong na subheading a “Sakey a Pakatandaan Manlapud Saray Kipapasen ed Mundo” pian ituloy so tongtongan. No walay interes, ipaliwawa no iner so nanlapuan na Diablo, ya usaren iray punto ed pahina 3 tan 4 na tract.
6 Say tract a “What Hope for Dead Loved Ones?” so nayarin managyat a tampol na interes. Nayarian yon igapoy tongtongan diad panepet:
◼ “Isipen yo kasin napinengnengan tayo ni lamet iray pinabli tayon inaatey?” Kayarin onebat so too, ipabitar so komaduan parapo ed pahina 4 ed say tract tan basaen so Juan 5:28, 29. Insan ipaliwawan satan so makatulong pian natalosan so impormasyon ed silong na unonan subheading ed say tract. Ibagan singbaten yon dua itan.
7 Say tract a “Pangayagaan so Bilay na Pamilya” so inkalapagan a makapasagyat ed saray pamilya. Diad pangusar ed satan et oniay nibagam:
◼ “Miabobon kayo anganko a nabubuyak so pamilya natan. Antoy padesir yon nagawaan pian napaelet so siknol na pamilya?” Kayarin onebat so too, ipaimano yo ed sikara iray punto diad unonan parapo ed pahina 6. Mamili na saray a teksto ya inaon ed pahina 4 tan 5 na tract, tan ipaliwawa no antoy labay ton ibaga. Insan la iyopresi so libren panagaral na Biblia.
8 Say tract a “Why You Can Trust the Bible” so nayarin usaren diad onian presentasyon:
◼ “Maslak a totoo so akadngel la ed istorya nipaakar ed si Cain tan Abel, a naromog ed unonan libro na Biblia. Tinukoy met na salaysay ed Genesis so asawa nen Cain. Kasin panumamengan yo no iner so nanlapuan nen asawa to?” Usaren so unor a parapo ed pahina 2 na tract parad ebat. Ipaliwawan sisingbaten na tract iray importantin komento na Biblia nipaakar ed no antoy nagawa ed arapen. Diad pangigapo ed komatlon parapo ed pahina 5, ituloy so tongtongan, ya usaren iray manusuportan teksto.
9 Say panangibunog ed saray Bible tract so epektibon paraan ed pangipresenta ed maong a balita. Lapud ta saratan so mainomay ya awiten inerman so laen yo, nausar yo iratan ya epektibo ed panagkabkaabungan a kimey tan sano manpulong ya impormal. Importanti so betang na tract ed panumpal na ministeryo tayo. Seguroen a mangawit kayo na nanduruman tract, tan lawas usaren iratan pian nigapoy tongtongan.—Col. 4:17.