Marakdakep ya Design na Saray Balon Tract!
1. Anto ray walaan na marakdakep a balon design ya nausar tayod ministeryo?
1 Walay limaran balon tract ya in-release ed 2013 ‘Say Salita na Dios et Katuaan!’ a Distriton Kombension. Ontan met, say Kingdom News No. 38 ya “Talaga Kasin Nabilay Lamet Iray Inaatey?” et niarum ed sarayan serye na tract. Amin irayan anemiran tract et marakdakep so balon design da. Akin et walay balon format? No iyopresi tayo iratan ed kaabungan, panon tayon epektibon nausar so inkadesinyo na saratan?
2. Antoy gagala na balon design?
2 Akin ya Balo so Design?: Mabetbet ya gagawaen irayan apatiran step pian epektibo so presentasyon: (1) Pian nigapoy tongtongan, tepetan so householder no antoy panmoria to. (2) Manginabang na punto manlapud Kasulatan. (3) Mangiyopresi na literatura ya basaen na householder. (4) Mangitilak na tepet ya ebatan ed onsublay, tan iyeskedyul so ipawil. Say balon design na saray tract et makatulong ed sikatayo pian mainomay tayon natumbok iratan ya apatiran step.
3. Panon tayon iyopresi so sakey ed saray balon tract diad ministeryo?
3 No Panon ya Usaren: (1) Kayarin ibano, ipanengneng ed householder so makapainteres a multiple-choice ya tepet diad arap na tract, tan alaen so opinyon to. (2) Ilukas so tract, tan pantongtongan so “Say ibabaga na Biblia.” No iyabuloy na kipapasen, direktan basaen ed Biblia so teksto. No magenap so panaon, pantongtongan so onsublay ya subheading diad bandad leksab. (3) Iyopresi so tract, tan pasesegen ya ituloy ton basaen itan. (4) Antis kan onalis, ipanengneng ed sikato so tepet ed beneg ya walad “Isipen Pa” tan iyeskedyul so ipawil pian pantongtongan ed onsublay so ebat na Biblia.
4. No interesado so householder, antoy nayarin ibaga tayo no ompawil tayo?
4 Mainomay met so panagpawil. Usaren labat so teksto ed beneg na tract pian ebatan so intilak mon tepet nen imbeneg. Antis kan onalis, ipaimano so litrato na brosyur ya Maong a Balita, ipanengneng ed householder so brosyur tan say tinukoy ya leksion ya walaan na kaaruman ya impormasyon ed topic, tan iyopresi so brosyur. No inawat to itan, iyeskedyul ya pantongtongan so brosyur diad onsublay ya ibisitam. Akapangigapo ka lay panangiyaral na Biblia! Odino, imbes ya iyopresi so brosyur, sarag mon iyopresi so arum nin tract tan iyeskedyul ya pantongtongan yo itan.
5. Akin et importante iray tract ed ministeryo tayo?
5 Masulok lan 130 taon ya uusaren iray tract diad ministeryo tayo. Anggano anguman-uman lay kabaleg tan format na saratan, epektibo iratan ed panagpulong. Komon ta usaren tayon maong iyan balon design pian tuloytuloy tayon nikayat so kakabatan ed Biblia diad interon mundo.—Uli. 15:7a.