No Panon a Nigapoy Tongtongan Panamegley na Saray Tract

Manlapu la nen Enero 2018, nanengneng ed unonan pahina na Workbook ed Aral Parad Ministeryo tan Bilay na Kristiano iray suhestion parad pitongtong. Napapaseseg itayon manpokus ed pitongtong ed totoo imbes ya basta labat mangitilak ed sikara na literatura. Pian natulongan iray manangipalapag ya nitukoy so paraan na pitongtong da, wala ray nababantayan ya video na suhestion parad pitongtong no panon ya nigapo so tongtongan panamegley labat na Biblia. Balet kasin labay ya ibaga na saya ya agtayo la mangusar na literatura sano mankakabkaabungan tayo? Andi! Singa bilang, saray tract et epektibon nausar pian nigapo tayoy tongtongan. Sano iyoopresi tayo so anggan dinan ed saray tract, sarag tayon usaren irayay paraan ya walad leksab:

1. Usaren so tepet ed unonan pahina ya walay pampilian ya ebat.

2. Ipanengneng so (iray) ebat na Biblia ya walad tagey na komaduan pahina. No walay panaon na unabung, basaen tan pantongtongan so pigaran impormasyon ya walad tract.

3. Iter so tract ed unabung, tan pasesegen ya ituloy ton basaen itan diad kombenientin panaon to.

4. Antis ya onalis, ipanengneng so tepet ed leksab na “Isipen Pa” tan ibagam ya pantongtongan yo so ebat na Biblia diad ipawil mo.

Sano ompawil ka, pantongtongan so ebat tan mangitilak na sananey ya tepet ya ebatan mo diad onsublay. Sarag moy manpili na tepet manlapud website tayo odino publikasyon ya abitla ed beneg ya pahina. No matukoy, ipresenta so brosyur ya Maong a Balita ya Nanlapud Dios! odino arum nin aaralen ya publikasyon ya walad Uusaren ed Panagbangat.