No Panon ya Usaren Iray Suhestion Parad Pitongtong

Manlapu nen Enero 2018, wala ray suhestion parad pitongtong ed unonan pahina na Workbook ed Aral Parad Ministeryo tan Bilay na Kristiano. Panon tayon usaren iratan?

No Walay Partem: Kaukolan mon usaren imay tepet, teksto, tan tepet parad ontumbok ya walad suhestion parad pitongtong. Balet agto labay ya ibaga ya nepeg mon aligen iray eksakton salita ya inusar ed video na suhestion parad pitongtong. Sarag moy mangusar na duman setting, introduksion, panagkatunongan, tan arum ni. Sarag mo met so mangiyopresi na publikasyon ya walad Uusaren ed Panagbangat tayo, anggano anggapoy akaiyan ya espisipikon instruksion parad partem.

No Walad Kad Ministeryo: Say gagala na saray suhestion parad pitongtong et pian walay ideyam no antoy nayarin ibagam. No interesado so katongtong mo tan labay to ni makaaral, sarag mon ituloy so tongtongan yo, a nayarim ya usaren imay suhestion nipaakar ed panagpawil. Sarag mon umanen so suhestion parad pitongtong odino nayari kan mangusar na duman presentasyon. Ompan mas epektibo ed teritorya yo imay suhestion nen imbeneg a bulan odino sananey ya teksto. Ompan mas labay ya pantongtongan na totoo iray kaplesan ya balita odino saray nagagawa diad lugar yo. Antokaman so paraan no panon mon usaren so suhestion parad pitongtong, say gagalam et pian ‘nagawaan moy amin a bengatla nisengeg ed maong a balita.’​—1Co 9:22, 23.