No Panon ya Usaren Iray Suhestion Parad Pitongtong

Imparaan a maong iray suhestion parad pitongtong, tan dakel ya manangipalapag so epektibon manguusar ed saratan diad teritorya da. Balet lapud nandurumay situasyon ed interon mundo, sarag na saray manangipalapag so mangusar ed ministeryo da na duman paraan na pitongtong odino duman topic ya mas makapainteres ed totoo diad lugar da. Balet siempre no walay espisyal ya kampanya, kaukolan ya tumboken na amin ya agagi iray instruksion parad satan. Say goal tayo et naunor tayoy ingganggan nen Jesus ya ipulong so maong a balita na Panarian.—Mat 24:14.

Diad parte na saray estudyante, kaukolan ya tumboken na saray manangipalapag so topic ed suhestion parad pitongtong ya walad Workbook ed Aral Parad Ministeryo tan Bilay na Kristiano. Balet sarag day mangusar na duman tepet, teksto, say tepet parad ontumbok, odino eksena ya mas epektibo ed lugar da. No bilang ta kaukolan ya eksakton aligen so suhestion parad pitongtong, walay nanengneng ya instruksion parad estudyante. Sakey iyan pananguman ed samay instruksion ya walad pahina 8 na Hunyo 2020 ya isyu na workbook ed aral.