Kasin Papablien Yo Iray Sagradon Bengatla?
1 Sano natepetan itayo no kasin papablien tayo iray sagradon bengatla, nayarin tampol tayon onebat na on! Antoray pigara ed saray sagradon probisyon na Dios a papablien tayo?
2 Agaylan pabpablien tayoy niiter ed sikatayon personal a siglaotan ed mangatatawen ya Ama tayo! Pinaseguroan to itayo a no ‘onapit itayo ed sikato, sikatoy onapit ed sikatayo.’ (Sant. 4:8) No anggapoy dondon bagat nen Jesu-Kristo, anggapoy toon makaawat na andi-anggaan a bilay. (Juan 3:16) Lapud masimoon a pisasalamat, inagew-agew tayon ipipikasi so aralem a panamabli tayo ed sayan mablin langkap na Dios.
3 Say apuyanan a Salitay Dios, say Masanton Biblia, et sagrado met parad sikatayo, ontan met ed mangaraldalin ya organisasyon nen Jehova. Nipanengneng tayoy matukoy a panamabli ed sarayan probisyon nen Jehova sano mitunosan itayo ed saray prinsipyo na Biblia, paeleten iray bedber na inaagin aro, maalwar ya unoren so teokratikon uksoyan, tan pitulongan ed saramay mangidadaulo.—1 Ped. 1:22.
4 Diad panamegley na matoor tan makabat ya aripen, makakaawat itayo na daakan ya espiritual a tagano. Tua itan diad sayan taon a “Mananumpal na Salitay Dios” a Distriton Kombension. Naawat tayo ditan so makanan bilin tan panggayagaan tayoy ampetang a pantutuyaw a kakkaukolan tayo. Panon tayon nipanengneng so impapuson panamabli ed sayan sagradon probisyon?
5 Ag-ikakaindan so Abung nen Jehova: Pinaseseg nen Nehemias iramay impasyan nankimey ya angipaalagey lamet ed saray bakor na Jerusalem ya ‘ag-ikakaindan so abung na Dios da.’ (Neh. 10:39) Natan, say “abung” nen Jehova et say uksoyan parad panagdayew. Saray distriton kombension tayo so kabiangan na satan ya uksoyan. Pian agtayo nikaindan iyan uksoyan, nepeg itayon onatendi tan manimanon maong, ya ipanengneng ed si Jehova a papablien tayo iray probisyon to. (Heb. 10:24, 25) Antoray iplano tayo la natan pian nipanengneng a sigpot tayon papablien iyan sagradon ebento?
6 Onatendi a Taloy Agew: Kaukolan tayon amin ya iyuksoy so pakaatendi a taloy agew ed kombension. Kasin iplaplano yo lay onsabin masakbay ed kada agew tan pasumpalen so unor a pikakasi ed Simba? No ontan, niwala’d sikayoy mayaman iran bendision. Aliwan naynay a mainomay so iyatendi ed kombension. Say panangiyarunsa ed trabaho yo so mankaukolay malet a talindeg yo. Aliwan naynay a kombinienti so luganan. Balet agtayo aabuloyan iraya a manismaya ed sikatayon onatendi ed kombension.
7 Konsideraen Iyan Alay Abig ya Alimbawa: Nen katantaon sanen paarap la ra ed distriton kombension, sakey a grupo na agagi ed sakey a bansa ed Aprika a walay kaguloan so biglan akapiabet ed grupo na sundalo. Tinepetan daray agagi: “Siopa kayo, tan iner so laen yo?” Inmebat ira: “Tastasi nen Jehova kami, tan onla kamin onatendi ed distriton kombension.” Inkuan na sakey ed saray sundalo: “Sikayoran Tastasi nen Jehova et anggapoy katatakotan yo. Onla ki la, tan makapankombension kayon anggapoy problema. Balet, manalwar kayo ompan makaabet kayo na dakel a sundalo. Lanang a diad pegley na dalan so panakaran yo! No makanengneng kayo na atiptipon a totoo, ituloy yo labat so manakar ed pegley na dalan!” Ontan so ginawa ra et akasabi ran maligen ed kombension. Atumangan irayan agagi lapud ta impatnag day panamabli ra ed saray sagradon bengatla.
8 Singa saray agagi tayo ed Aprika, nidudunget itayo met ed saray angat. Balet andi-duaruwan naalig tayoy pananisia ra pian determinado tayon onatendi ed amin a sesyon na distriton kombension tayo. No nakaukolan iray panangiyarunsa, paiwanwan ed si Jehova, a kabat tayon papalaren toray sagpot tayo pian makaatendi itayo ed intiron programa.
9 Anien Iray Bendision: Pampipilalekan tayo so Salitay Dios, ya amta tayon diad panamegley na satan et ontundas itayo ed kilalaban. (1 Ped. 2:2) Say iyatendi tayo ed distriton kombension tan idengel ed programa et ontulong ed balang sakey ed sikatayo a lalon napabiskeg so pananisia tayo ed satan a Salita tan diad ontan sikatayoy lalon makapansungdo ed saray panangataki nen Satanas. Diad panggawa’d satan, nipanengneng tayo ed si Jehova tan saray maniimaton a sigpot tayon papablien iray sagradon bengatla tan “aliwa itayon nengneng ya onsener . . . noagta nengneng a walaan na pananisia a kilabanan na kamarerwa.”—Heb. 10:39, NW; 12:16; Uli. 27:11.
10 Makapanilalo tayo ed pangilukas nen Jehova a Dios ed saray dorongawen na tawen tan ikalbo to ed sikatayo so daakan ya espiritual iran bendision. (Mal. 3:10) Gawaen yon kalat so kiwala ed “Mananumpal na Salita na Dios” a Distriton Kombension diad kagapo na programa ed Biernes na kabuasan angga ed pansaran pikakasi tan “Amen!” ed Simba na ngarem. Manliket kayo’d pakagawa yo ed satan!