Tepet

◼ Siopa so nepeg a mangidaulo na pikakasi diad saray miting ed kongregasyon?

Say pikakasi ed kongregasyon so makanan kabiangan na panagdayew tayo. Say pangidaulo a kaibay arum ed imaton nen Jehova so mablin pribilihyo tan ambelat a responsabilidad. Lapud kaimportantian na satan, kaukolan ya usaren na mamatatken so maong a pandesisyon sano desidien da no sioparan agagin lalaki so onkualipika a mangidaulo na pikakasi ed saray miting. Saray bautismadon agagi a mangidaulo ed kongregasyon so nepeg a matakken ed espiritual a Kristianon ministro a kabat bilang maong ya ehemplo tan rerespetoen ed kongregasyon. Say mapagalang tan marespeton pikakasi ra so nepeg a mangipatnag na maabig a relasyon ed si Jehova a Dios. Say artikulon “Prayer Before Others With a Humble Heart” ed Mayo 15, 1986, a paway na The Watchtower so angidatak ed saray importantin prinsipyo a nagkalalo lan makatulong ed saramay mangidaulo na pikakasi ed kongregasyon.

Ag-usaren na mamatatken a mangidaulo na pikakasi so sakey ya agin kabat a walaay kuestionabli odino aliwan masimpit a kondukta. Agpipilien so agin misasanok odino no manpikasi ed publiko et iwalwal to iray personal ya agpanpaknaan. (1 Tim. 2:8) Anggan bautismado la so tin-edyer ya agi, kaukolan a determinaen na mamatatken no kasin sikato lay matakken ed espiritual pian mangidaulo na pikakasi ed kongregasyon.​—Gawa 16:1, 2.

No maminsan diad saray miting ed lawak na kimeyan, nayari met parad bautismadon agin bii a manpikasi no anggapoy kualipikadon agin laki a mangidaulo ed grupo. Sikatoy nepeg a manpandong na matukoy. No bilang ta anggapoy kualipikadon agin laki a presenti ed saray miting parad serbisyo, nepeg a mangi-asain iray mamatatken na kualipikadon agin bii a mangidaulo.

Kaslakan la parad tsirman ed Miting Publiko so mangidaulo na manangilukas a pikakasi. Balet, diad arum a miting ed kongregasyon, sano walaray kualipikadon agagin lalaki, nayarin kerewen iran mangidaulo ed manangilukas odino manangisaran pikakasi nilikud ed agin mangilukas ed miting odino samay apabtangan na unor a parti. Diad dinanman a kipapasen, say agi a kerewen a manpikasi diad miting ed kongregasyon so nepeg a pakabatan a masakbay ta pian niparaan to so ibaga to. Diad ontan et sikatoy makapanpikasi a madalatdat tan masimoon, a matukoy parad satan a partikular a miting.

Agkaukolan ya andukey iratan a pikakasi. Sano mangidaulo so agin laki ed mapublikon pikakasi, maslak et magmaong no sikatoy akaalagey, a mansalitan narengel tan malinew. Lapud saya et narengel a maong na saramay atiptipon so pikakasi tan nibesngaw day impapuson “Amen!”​—1 Awa. 16:36; 1 Cor. 14:16.