Parte 7—Pangikondukta na Progresibo Iran Panangiyaral na Biblia
Panagpikasi Diad Panagaral
1. (a) Akin a matukoy so pangilukas tan panampot ed sakey a panagaral na Biblia panamegley na pikakasi? (b) Panon tayon niparungtal so panagpikasi diad panagaral na Biblia?
1 Pian onaligwas ed espiritual iray iyaaralan na Biblia, importante so panamendisyon nen Jehova. (1 Cor. 3:6) Kanian, matukoy so pangilukas tan panampot ed niletneg lan panagaral panamegley na pikakasi. Mabetbet a nagawaan tayo la iyan tampol ed saramay iyaaralan tayo a relihyoso. Diad arum balet, nayarin kaukolan tayo nin tebeken no kapigan so dugan panaon na pangiparungtal tayoy panagpikasi. Nayari yon usaren so Salmo 25:4, 5 tan 1 Juan 5:14 pian tulongan so iyaaralan a natalosan no akin a kaukolan so pampikasi, tan say Juan 15:16 pian ipaliwawa so kaimportantian na panagpikasi ed si Jehova panamegley nen Jesu-Kristo.
2. No say agin bii et ibaan na sakey a bautismadon agin laki odino agbautismadon lakin manangipalapag diad pangiyaral na Biblia, siopa so nepeg a mangibalikas na pikakasi?
2 Siopa so nepeg a mangibalikas na pikakasi ed panagaral na Biblia? No walay bautismadon agin laki a kaiba na agin bii diad panagaral, say agin laki so mangibalikas na pikakasi, anggaman say agin bii so mangikondukta na panagaral ya akapandong. (1 Cor. 11:5, 10) Diad biek a dapag, no say kaiba to et sakey a lakin agbautismadon manangipalapag na Panarian, say agin bii so mangibalikas na pikakasi. Diad satan, nepeg a manpandong so bii sano manpipikasi tan sano mangikokondukta.
3. Antoray matukoy a bengatla a nilaktip ed saray pikakasi diad panagaral ed Biblia?
3 No Antoy Nayarin Ilaktip ed Pikakasi: Agnakaukolan ya andukdukey iray pikakasi diad panagaral ed Biblia, balet kaukolan ya espisipiko iratan. Likud ed pangipikasi ed pamendisyon na Dios ed panagaral tan pisalamat ed naaralan a katuaan, manepeg met so pangidayew ed si Jehova bilang say Lapuan na bangat. (Isa. 54:13) Nayari tayo met ya ibesngaw iray balikas a mangipatnag na masimoon ya interes tayo ed iyaaralan tan say pisasalamat tayo ed organisasyon ya uusaren nen Jehova. (1 Tes. 1:2, 3; 2:7, 8) Say pangipikasi ed pamendisyon nen Jehova ed panggugunaet na iyaaralan a mangiyaplika ed naaaralan to so ontulong met ed sikaton natalosan so kaimportantian na pagmaliw a ‘mananumpal na salita.’—Sant. 1:22.
4. Say pangilukas tan panampot ed panagaral ed Biblia panamegley na pikakasi so mangitarok na antoran gunggona?
4 Amayamay iray gunggona na pampikasi. Mangitarok itan na panamendisyon na Dios. (Luc. 11:13) Idadanet na satan so inkaseryoso na panagaral ed Salitay Dios. Legan met a tatalinengen na iyaaralan iray pikakasi tayo, naaralan to no panon so pampikasi. (Luc. 6:40) Sakey ni, saray pikakasin nanlapud puson napno na panangaro ed Dios tan pisasalamat ed agnaparaan iran kalidad to so makatulong ed iyaaralan pian nabayuboan to so maapit a relasyon ed si Jehova.