Simpitan

Pangikondukta na Progresibo Iran Panangiyaral na Biblia

Tinugyop ed sayan insert iray manunan punto manlapud serye na saray artikulon pangikondukta na progresibon panangiyaral na Biblia a pinmaway ed Ministeryo Tayo ed Panarian. Amin so papasesegen a simpitan iyan insert tan konsultaen sano mangiyaaral na Biblia. Niarum ni, nayarin ipabitar iray punto ed sayan insert sano manmimiting parad lawak na serbisyo, tan nayarin usaren na saray manangasikaso ed serbisyo a basiyan na paliwawa ra sano ombibisita ira ed saray grupo na panagaral.

Parte 1: Anto so Panagaral na Biblia?

No regular tan sistematiko yon sisingbaten so Biblia, anggaman antikey labat, ya uusaren so Biblia tan say nirekomenda iran publikasyon, mangikokondukta kayo la na panagaral ed Biblia. Nayari lan ireport so panangiyaral sano amidua lan inkondukta itan manlapu nen indemostra so uksoyan na panagaral tan no ompatnag a mantultuloy itan.​—km 7/04 p. 1.

Nirekomenda Iran Publikasyon

◼ Anto so Kakaukolanen na Dios ed Sikatayo?

◼ Pikakabat a Mangitonton ed Andi-Anggaan a Bilay

◼ Dayewen so Alenleneg a Tuan Dios

◼ Say Nayarian Moy Magmaliw a Kaaro na Dios! so nayarin usaren a pangiyaral ed saray totoon limitado so aral da odino agtanto makabasa.

Parte 2: Pamparaan ed Pangikondukta na Panagaral

Nakaukolan tayon ipresenta so impormasyon diad paraan a napakiwas so puso na iyaaralan. Kakaukolanen na saya so pamparaan a maong parad pakagunggonaan na iyaaralan.​—km 8/04 p. 1.

No Panon so Pamparaan

◼ Analisaen a magano so titulo, subtitulo, tan saray ilustrasyon na kapitulo odino leksion.

◼ Anapen iray ebat ed inimprintan tepetepet, a gulisan labat iray manunan salita tan balikas.

◼ Desidien no dinan a nisitan teksto so basaen legan na panagaral. Mangisulat na antikey iran nota ed mardyin na iyaaral a publikasyon.

◼ Mangiparaan na antikey a repaso na saray manunan punto.

Iyadapta so Leksion

◼ Ipikasi so iyaaralan tan saray pankaukolan to.

◼ Nonoten lan unona no dinan iran punto so nayarin mairap a talosan odino awaten na iyaaralan.

◼ Nonoten: Anto kasi kaukolan ton talosan odino pankimeyan pian onaligwas so espiritualidad to? Panon kon nasabi so puso to?

◼ No nakaukolan, manparaan na ilustrasyon, eksplinasyon, odino manggegendanan a tepet pian natulongan so iyaaralan a mantalos ed punto odino teksto.

Parte 3: Epektibon Panangusar ed Kasulatan

Say gagala tayo ed panangiyaral na Biblia et say ‘panggawa na saray babangatan’ diad panulong ed totoo a talosan tan awaten iray bangat na Salita na Dios insan iyaplika iratan ed bilay da. (Mat. 28:19, 20; 1 Tes. 2:13) Kanian, say panagaral et nepeg ya akasentro ed Kasulatan.​—km 11/04 p. 8.

Manbangat Manlapud Salita na Dios

◼ Ibangat so iyaaralan no panon so pananap ed saray espisipikon teksto ed dili ton kopya na Biblia.

◼ Nengnengen tan singbaten iray teksto na Biblia a mangipapanengneng ed Makasulatan a basiyan na saray sisisiaen tayo.

◼ Mantepet. Imbes ya ipaliwawa ed iyaaralan iray teksto ed Biblia, paipaliwawa iratan ed sikato.

◼ Pansiansiaen a simpli so panagaral. Agsasalien ya ipaliwawan amin so kada aspekto na teksto. Ilaktip labat iramay kaukolan pian napalinew so punto.

◼ Manggawa na praktikal ya aplikasyon. Tulongan so iyaaralan a mantalos no panon ya onaplika ed sikaton mismo iray teksto na Biblia.

Parte 4: Pangipasal ed Saray Iyaaralan a Manparaan

Say iyaaralan a manbabasa lan unona ed leksion, mangugulis ed saray ebat, tan mannononot no panon ton ibalikas ed dili ton salita iray ebat, so maples ya onaligwas ed espiritual. Kanian, sano niletneg la so regular a panagaral, iparaan so leksion a kaiba so iyaaralan pian ipanengneng ed sikato no panon a gawaen itan. Diad maslak ya iyaaralan, makatulong so pangiparaan yon dua ed interon kapitulo odino leksion.​—km 12/04 p. 1.

Panggulis tan Pannota

◼ Ipaliwawa no panon so pananap na direkta iran ebat ed inimprintan tepetepet.

◼ Ipanengneng ed iyaaralan so kopya yo na aaralen a publikasyon a minarkaan yo lambengat iray manunan salita tan balikas.

◼ Tulongan so iyaaralan a mantalos a kada nisitan teksto so manusuporta ed sakey a punto na parapo, tan ibangat no panon ton makapanggaway antikey iran nota ed mardyin na aaralen ton publikasyon.

Analisaen a Magano tan Repasoen

◼ Ibangat so iyaaralan no panon ya usisaen so kapitulo odino titulo na leksion, saray subtitulo, tan ilustrasyon antis ton igapo so detalyadon pamparaan.

◼ Pasesegen so iyaaralan a repasoen to iray manunan punto diad pansampot na panagparaan.

Parte 5: Determinaen no Kaunongan Karakel so Kobrian a Materyal

Mandependi ed abilidad tan sirkumstansya na managbangat tan iyaaralan so karakel na materyal a nayarin singbaten.​—km 1/05 p. 1.

Iletneg so Malet a Pananisia

◼ Ag-isasakripisyo so pakagamor na iyaaralan na malinew a pakatalos ed materyal pian labat napapeles so panagaral.

◼ Mangusar na nakaukolan a panaon pian natulongan so iyaaralan a mantalos tan mangawat ed nanaaralan to.

◼ Mangigana na magenap a panaon pian konsideraen iray manunan kasulatan a basiyan na saray ibabangat tayo.

Ag-onaarawi ed Tema

◼ No labalabay na iyaaralan so mangistorya nipaakar ed saray personal a pamaakaran, nayari yon iyuksoy a pantongtongan iratan kasumpal na panagaral.

◼ Agkayo salita lan salita legan na panagaral. Limitaan so pangisingbat na kaaruman iran punto tan eksperiensya pian agnaamper so pakagamor na iyaaralan na suston pikakabat ed saray manunan bangat na Biblia.

Parte 6: Sano Walay Tepet na Iyaaralan

Bektaman a niletneg lan maong so panangiyaral na Biblia, kaslakan et sankaabigan lan aralen a maalutor iray bangat na Biblia imbes ya onlukso-lukso ed nanduruman tema. Ontulong iya ed iyaaralan a niletneg so pundasyon parad suston pikakabat tan pian onaligwas ed espiritual.​—km 2/05 p. 6.

Usaren so Pakatebek

◼ Diad kaslakan et saray tepet a misiglaotan ed aaralen a materyal so nayarin ebatan lan tampol.

◼ Saray tepet ya agmisiglaotan ed aaralen a materyal odino mankakaukolan na pansukimat et nayarin konsideraen diad arum a panaon. Nayarin makatulong so pangisulat ed saratan a tepet.

◼ No nairapan so iyaaralan a mangawat ed sakey a bangat, mangusar na kaaruman a materyal a manisingbat a maong ed tema.

◼ No agnin siansia akombinse so iyaaralan, dia la’d arum a panaon itan pantongtongan tan ituloy so panagaral.

Magmaliw a Mapaabeba

◼ No agyo amta so ebat ed intepet, agyo itan papadesiran.

◼ Kalkalnan bangatan so iyaaralan no panon so pansukimat.

Parte 7: Panagpikasi Diad Panagaral

Pian onaligwas ed espiritual iray iyaaralan na Biblia, importante so panamendisyon nen Jehova. Kanian, matukoy so pangilukas tan panampot ed niletneg lan panagaral panamegley na pikakasi.​—km 4/05 p. 8.

No Panon ya Iparungtal so Panagpikasi

◼ Diad saramay relihyoso, nayari itayo lan manpikasi diad unonan panagaral ni labat.

◼ Diad arum, kaukolan tayon tebeken so matukoy a panaon na pangiparungtal ed pikakasi.

◼ Nayarin usaren so Salmo 25:4, 5 tan 1 Juan 5:14 pian ipaliwawa no akin a manpikasi.

◼ Nayarin usaren met so Juan 15:16 pian ipanengneng a kaukolan tayoy manpikasi ed si Jehova panamegley nen Jesu-Kristo.

No Antoy Ilaktip ed Pikakasi

◼ Matukoy so pangidayew ed si Jehova bilang say Lapuan na bangat.

◼ Ibalikas so masimoon ya interes ed iyaaralan.

◼ Ibalikas so apresasyon ed organisasyon ya uusaren nen Jehova.

◼ Onkerew na panamendisyon nen Jehova ed panggugunaet na iyaaralan a mangiyaplika ed nanaaralan to.

Parte 8: Iwanwan Iray Iyaaralan ed Organisasyon

Say kalat tayo ed pangiyaaral na Biblia et aliwa labat a pian ibangat iray doktrina noagta pian tulongan iray iyaaralan ya onkamang ed Kristianon Kongregasyon. Mangigetar na pigaran minuto kada simba diad panagaral yo pian manginabang na sakey a punto nipaakar ed organisasyon nen Jehova.​—km 5/05 p. 1.

Saray Pantitipon na Kongregasyon

◼ Deskribien so kada pantitipon na kongregasyon. Manlapud primeron panagaral et imbitaan la ran onatendi.

◼ Inabang iray makapabiskeg iran punto ya impresenta ed saray pantitipon.

◼ Paaralemen so interes to ed Memoryal, saray asamblea, tan ibibisita na manangasikaso na sirkito.

◼ Usaren iray litrato ed publikasyon tayo pian nilitrato to ed nonot to no antoy nagagawa diad saratan.

◼ Pasesegen iran manbasa na brosyur a Jehovah’s Witnesses​—Who Are They? What Do They Believe?

Usaren Iray Video Pian Paaralemen so Apresasyon

◼ Jehovah’s Witnesses​—The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Parte 9: Pangiparaan ed Saray Iyaaralan a Mantasi ed Impormal a Paraan

Sano onggagapo la ray iyaaralan na Biblia a mangagamil na pananisia ed naaaralan da, napakiwas iran itongtong itan ed arum.​—km 6/05 p. 1.

Pasesegen Iran Mantasi

◼ Wala kasi iray kakaaro odino kapamilyaan da a nipila ra ed panagaral?

◼ Wala kasi iray katrabahoan, kaeskuelaan, odino kakaaro da ya angipatnag na interes?

Ibangat Ira a Manginabang ed Saray Sisiaen da

◼ Diad saray apilin punto legan na panagaral, tepetan so iyaaralan, “Panon mon usaren so Biblia pian ipaliwawa iyan katuaan ed pamilyam?”

◼ Tulongan so iyaaralan pian natalosan to a kaukolan so pagmaliw a marespeto tan mapangasi sano itotongtong ed arum so nipaakar ed Dios tan saray gagala to.

◼ Nausar na iyaaralan so brosyur a Jehovah’s Witnesses​—Who Are They? What Do They Believe? pian natulongan iray kakaaro tan kapamilyaan to a natalosan iray nibase ed Biblia a sisisiaen tan aktibidades tayo.

Parte 10: Ipasal Iray Iyaaralan Diad Panagkabkaabungan a Ministeryo

Sano apandesisyonan la na saray mamatatken a kualipikado la bilang agbautismadon manangipalapag so sakey ya iyaaralan na Biblia, nayarian to lay mibiang ed mapublikon panagpulong na kongregasyon.​—km 7/05 p. 1.

Manparaan a Saniba

◼ Ipanengneng ed balon manangipalapag so pakaromogan ed saray nisuherin presentasyon.

◼ Tulongan a mamili na simplin introduksion a praktikal ed lokal a teritorya.

◼ Pasesegen a mangusar na Biblia ed ministeryo to.

◼ Saniban manpasal. Ibangat no panon so mataktikan iyebat ed kaslakan iran reaksion.

Manpulong a Saniba

◼ Paulyan a naobserbaan na iyaaralan no panon so pangiparungtal yo ed presentasyon ya imparaan yon dua.

◼ Ikonsidera so personalidad tan saray abilidad na iyaaralan. Diad maslak a kipapasen et sankaabigan lay pangipabtang ed sikato na kabiangan labat na presentasyon.

◼ Tulongan so balon manangipalapag a nawalaan na regular ya eskedyul ed pibibiang ed ministeryo.

Parte 11: Tulongan Iray Iyaaralan a Manggawa na Saray Panagpawil

Say panagparaan parad panagpawil so onggapo ed samay primeron dalaw. Pasesegen so iyaaralan a mangipatnag na masimoon ya interes ed saramay nakakatongtong to. Kalkalna yon ipasal no panon ton nasagyat iray unabung a mangibalikas ed nononoten da, ya ontalineng ed ibabaga ra, tan mangimano ed saray bengatlan pakapapagaan da.​—km 8/05 p. 1.

Pamparaan Parad Ipawil

◼ Repasoen so primeron dalaw tan tulongan so iyaaralan a mamili na teman managyat ed unabung.

◼ Mangiparaan na antikey a presentasyon a mangipaparungtal na sakey a teksto ed Biblia tan sakey a parapo ed publikasyon.

◼ Mangiparaan na sakey a nitepet ed sampot na tongtongan.

Pankulian so Pamawil

◼ Pasesegen so iyaaralan ya ompawil a tampol ed saramay angipatnag na interes.

◼ Tulongan so iyaaralan a makamoria a kaukolan so pampeleng pian nakatongtong iramay mairap a nabanaan.

Ibangat so iyaaralan no panon so mitarato, tan tulongan a mantalos a kaukolan so ipawil unong ed nipromiso.

Parte 12: Tulongan Iray Iyaaralan a Mangigapo tan Mangikondukta na Saray Panangiyaral na Biblia

Importante so pangalig ed si Jesus diad pangipanengneng moy maong ya ehemplo diad dilin ministeryom. Legan a naiimatonan na iyaaralan mo so ehemplom ed ministeryo, natalosan to a say gagala na panagpawil et pian makapangigapo na saray panangiyaral na Biblia.​—km 9/05 p. 1.

Panangiyopresi na Panagaral na Biblia

◼ Diad kaslakan et agmet kaukolan a detalyadon ideskribe so uksoyan na panagaral.

◼ Mabetbet et sankaabigan lay pangidemostra ed panangiyaral diad pangusar lambengat na sakey odino duaran parapo ed iyaaral tayon publikasyon.

◼ Repasoen tan ipasal so sakey ed saray suhestion ed panangigapoy panangiyaral na Biblia.​—km 8/05 p. 4; km 5/02 p. 6.

Ibangat Iray Iyaaralan a Magmaliw a Managbangat

◼ Pasesegen iran manpalista ed Teokratikon Eskuelaan Parad Ministeryo.

◼ Iyuksoy so pakapiulop ed sikayo na saray balon manangipalapag diad arum iran panangiyaral na Biblia a nayarin pakapibiangan day daiset ed panagbangat.