“Panon so Pakayarik, No Anggapo so Mangiwanwan ed Siak?”
1 Sanen tinepetan nen ebanghelisador a Felipe so Etiopen eunuko no natatalosan to so babasaen to manlapud Salitay Dios, inmebat so eunuko: “Panon so pakayarik, no anggapo so mangiwanwan ed siak?” Malikeliket si Felipe a tinmulong ed eunuko pian natalosan to so maong a balita nipaakar ed si Jesus kanian tampol ya abautismoan so laki. (Gawa 8:26-38) Tinulok nen Felipe so ganggan nen Kristo a ‘manggawa na saray babangatan a totoo ed amin a nasyon, a bautismoan ira tan bangatan ira.’—Mat. 28:19, 20.
2 Nepeg tayon tuloken so ganggan a manggawa na saray babangatan, a singa ginawa nen Felipe. Balet, say maples ya imbulaslas ed espiritual na Etiopen eunuko et aliwan naynay a naimano ed limog na totoo ya iyaaralan tayo na Biblia. Saman a too et sakey a Judion proselita a mikabisadon maong ed Kasulatan tan walaan na maawat a puso tan say kaukolan to labat la et awaten si Jesus bilang say insipan a Mesias. Sakey itan ya angat no saramay iyaaralan tayo et agmikabisado ed Biblia, nibalang la ira na saray palson bangat na relihyon, odino nabebelatan ira ed saray personal a problema. Antoy ontulong ed sikatayon magmaliw a matalonan mangiwanwan ed saray iyaaralan na Biblia ya ontundas ed dedikasyon tan bautismo?
3 Tebeken Iray Espiritual a Pankaukolan na Iyaaralan na Biblia: Asingbat ed insert na Agosto 1998 a Ministeryo Tayo ed Panarian so karukey na panaon a nayarin pangiyaral tayo ed totoo, ya usaren so brosyur a Kakaukolanen tan say libron Pikakabat. Onia so inter na satan a panangiwanwan: “Nakaukolan a determinaen so peles na panaaral unong ed saray sirkumstansia tan abilidad na estudyante. . . . Agtayo aamperen so malinew a pakagamor na iyaaralan ed suston pikakabat lapu lambengat ed maples a pakasumpal ed libro. Kada estudyante so mankaukolan na malet a pundasyon parad balon nalmoan a pananisia to ed Salitay Dios.” Kanian, magmaong no ag-apuraen ya iyaral so libron Pikakabat a nononoten a panggunaetan a sumpalen so libro ed loob na anem bulan. Nayarin kaukolan ni na satan so masulok ya anem bulan pian natulongan so pigaran totoo ya onaligwas ya anggad pakabautismoan. Leleg ya ikokondukta yoy panagaral a sinimba, mangusar na kaukolan a panaon pian tulongan so iyaaralan a makatalos tan mangawat ed aaralen to manlapud Salitay Dios. Diad arum a kipapasen, nayarin kaukolay duara odino taloran simba diad pangobri ed sakey a kapitulo ed say libron Pikakabat. Mangiyabuloy itan na panaon ed pambasa tan pamalinew ed dakel a nisitan teksto.—Roma 12:2.
4 Panon to no asumpal la so libron Pikakabat, balet ta natebek yon say pakatalos na iyaaralan ed katuaan et kaukolan nin napaaligwas odino sikatoy agni sigpot ya apakiwas pian ondapag ed katuaan tan idedika toy bilay to ed Dios? (1 Cor. 14:20) Anto ni nagawaan yo pian sikatoy niwanwan ed dalan ya ompugta ed bilay?—Mat. 7:14.
5 Peneken Iray Espiritual a Pankaukolan na Iyaaralan na Biblia: No mapatnag lan onaaligwas so too, anggaman matantan, tan nababayuboan to lay apresasyon to ed say aaralen to, diad ontan et ituloy so panagaral na Biblia ed komaduan libro kayarin asumpal so brosyur a Kakaukolanen tan say libron Pikakabat. Nayarin agla kaukolan iya ed amin a kipapasen, balet ta no nakaukolan, ituloy so panagaral ed libron True Peace, libron Nankakasakey ed Panagdayew, odino say libron God’s Word. Maslak a manangipalapag so walaan la na personal a kopya ed sarayan libro pian nausar no bilang ta anggapo lay naala ed kongregasyon. No nakaukolan, nayarin napedido irayan libro diad sanga. Diad amin a kaso, aralen nin unona so brosyur a Kakaukolanen tan say libron Pikakabat. Say panangiyaral na Biblia, panagpawil, tan nausar a panaon pian ituloy so panagaral so kaukolan ya ibilang tan ireport, anggano nabautismoan la so iyaaralan sakbay a nasumpal to so komaduan libro.
6 Kasin kabaliksan na saya a saramay agano nin abautismoan balet ta sakey labat nin libro so inaral to et iyaralan lamet ed komaduan libro? Agla nakaukolan. Anggaman ontan, nayarin sikaray nagmaliw ya inaktibo odino nayarin ag-inmaligwas ed katuaan, tan nayarin liknaen da a kaukolan day personal a tulong pian makapanggaway malaglaem a pangiyaplika ed katuaan ed bilay da. Nepeg ya ipanon ed manangasikaso na serbisyo sakbay ya iyaralan lamet so bautismadon manangipalapag. Balet, no walay kabat yon nanaral ed libron Pikakabat balet ta agtinmundas ed dedikasyon tan bautismo, nayarian yo lay manbulon ya amtaen no labay to lamet so manaral na Biblia.
7 Tanda na Kristianon aro so pangiter na maapit tan personal a panangimano ed balang interesadon too ya iyaaralan tayo. Say getma tayo et tulongan so iyaaralan a makagamor na malaglaem ya aralem a pakatalos ed katuaan na Salitay Dios. Insan alaen to la so desidido tan walaay pikakabat a talindeg to ed katuaan tan idedika to lay bilay to ed si Jehova, ya isimbolo to itan a dedikasyon panamegley na bautismo ed danum.—Sal. 40:8; Efe. 3:17-19.
8 Nanonotan yo no antoy agawa kayarin abautismoan so Etiopen eunuko? “Intuloy to so dalan to a malikeliket” bilang balon babangatan nen Jesu-Kristo. (Gawa 8:39, 40) Komon ta sikatayo tan saramay matalona tayon iwawanwan ed dalan na katuaan so makapanggayagan tuloy diad panlingkor ed si Jehova a Dios—natan tan ed ando lan ando!