Usaren so Libron Dayewen so Dios Pian Mangikondukta na Saray Panangiyaral ed Biblia

Say libron Dayewen so Alenleneg a Tuan Dios so denesinyo pian tulongan iray balo ni ya ombulaslas ed katuaan tan onaralem so apresasyon da ed si Jehova tan ed organisasyon to. Nayarin usaren itan ed saray iyaaralan na Biblia bilang komaduan libro ya iyaral. Oniay isasalaysay na Hunyo 2000 a Ministeryo Tayo ed Panarian, pahina 4: “No mapatnag lan onaaligwas so too, anggaman matantan, tan nababayuboan to lay apresasyon to ed say aaralen to, diad ontan et ituloy so panagaral na Biblia ed komaduan libro kayarin asumpal so brosyur a Kakaukolanen tan say libron Pikakabat. . . . Diad amin a kaso, aralen nin unona so brosyur a Kakaukolanen tan say libron Pikakabat. Say panangiyaral na Biblia, panagpawil, tan nausar a panaon pian ituloy so panagaral so kaukolan ya ibilang tan ireport, anggano nabautismoan la so iyaaralan sakbay a nasumpal to so komaduan libro.”

Siopa ni so nagunggonaan diad panangiyaral na Biblia ed libron Dayewen so Dios? Onia so intuloy na satan met lanlamang ya artikulo: “No walay kabat yon nanaral ed [brosyur a Kakaukolanen tan] libron Pikakabat balet ta agtinmundas ed dedikasyon tan bautismo, nayarian yo lay manbulon ya amtaen no labay to lamet so manaral na Biblia.” Nikaduman pansagpotan tayo so pangigapo na saray panangiyaral ed libron Dayewen so Dios ed saratan legan na Abril tan Mayo.