No Panon ya Usaren so Libron “Panangaro na Dios” Diad Panangiyaral na Biblia
1. Anto so gagala na libron “Panangaro na Dios”?
1 Agaylay liket tayo sanen naawat tayoy balon libro a “Mansiansia Kayo ed Panangaro na Dios” diad Distriton Kombension ya atemaan na “Igigiya na Espiritu na Dios”! Unong a niyanunsio la, sayan libro et denesinyo, aliwan pian ibangat iray manunan doktrina na Biblia, noagta pian natulongan itayon nakabat tan aroen iray estandarte nen Jehova nipaakar ed kondukta. Agtayo iya iyopresi ed kabkaabungan.
2. Siopay pangusaran ed sayan publikasyon, tan panon?
2 Sayan libro et isublay ya iyaral ed saray estudyante na Biblia kayari na samay libron Ibabangat na Biblia. Tandaan a nanduruma so peles na iyaaligwas ed espiritual na saray iyaaralan. Nepeg ya itukoy so karukey na panag-aral depende ed pakasarag na estudyante. Seguroen ya atalo-atalosan to so leksion. Diad kaslakan, sayan libro et ag-usaren pian mangigapo na panangiyaral na Biblia ed saramay akasumpal lay pigaran libro balet agni mimiaral tan mapatnag ya ag-ira interesadon itunos so kabibilay da ed naamtaan dan katuaan ed Biblia.
3. Anto so nepeg tayon gawaen no diad kaplesan et walay iyaaralan tayo ed libron Dayewen so Dios?
3 No natan et walay iyaaralan mo ed libron Dayewen so Dios tan wala kayo la’d unor iran kapitulo, nayarin desidien mon sumpalen la itan ya iyaral tan pasesegen so iyaaralan mon basaen to lan bukor so libron “Panangaro na Dios.” No andi, maabig no iyalis lay panag-aral ed balon libro tan igapo itan ed sankaunaan. No nipaakar ed samay libron Ibabangat na Biblia, wala la’d mangiyaaral no kobrian to ni iramay walad apendise.
4. Anto so nepeg tayon gawaen no abautismoan lay iyaaralan tayo sakbay ton nasumpal so libron Ibabangat na Biblia odino “Panangaro na Dios”?
4 No abautismoan lay iyaaralan yo sakbay yon nasumpal so anggan dinan ed sarayan libro, nepeg ya ituloy yoy panagaral anggad agnasumpal so libron “Panangaro na Dios.” Anggano abautismoan la imay iyaaralan yo, nayari yo nin ireport so oras, panagpawil, tan say panangiyaral. Nayari met ya ireport na kapartner yo so oras ed saratan a panag-aral.
5. Panon a makatulong so libron “Panangaro na Dios” pian naasistian iramay manangipalapag ya abayag lan agmanpupulong?
5 No inasain kayo na membroy Komite Parad Serbisyo na Kongregasyon a mangiyaral na Biblia ed sakey ya inaktibo, nayarin wala ra labat lay espisipikon kapitulo ed libron “Panangaro na Dios” ya iyaral yo ed sikato. Saratan a panangiyaral et agla kaukolan a sabien to ni andukey a panaon. Talagan sayan balon libro et balibalin probisyon ed sikatayo ta denesinyo iya pian ontulong ed sikatayon mansiansia “ed panangaro na Dios”!—Jud. 21.