Tepet

◼ Anton duaran publikasyon so kaukolan ya iyaral ed saray interesado?

Say libron Ibabangat na Biblia so manunan uusaren tayo ed pangigapo tan pangikondukta na panangiyaral na Biblia. Anggaman agsusupiaten no sananey a publikasyon, a singa say sakey a matukoy a tract, so inusar ed pangigapo na pangiyaral, nepeg a panggunaetan ya isandi a tampol so libron Ibabangat na Biblia. Maabig iray resulta na impangusar ed libron Ibabangat na Biblia ed pangigapoy panangiyaral.

Sano asumpal lan inyaral so libron Ibabangat na Biblia tan onaaligwas so iyaaralan, say libron Dayewen so Dios so nepeg ya iyaral. (Col. 2:7) Diad pahina 2 et nipaliwawa so gagala na satan a libro: “Papasesegen na Biblia so amin a mangaaro ed Dios a ‘talosan dan maong so . . . kaatagey tan kaaralem’ na saray mablin katuaan to. (Efeso 3:18) Lapud satan et intarya iyan libro. Mailalo kami a makatulong iya ed ibulaslas yo ed espiritual tan lalo kayon nakinlongan diad panakar ed mainget a dalan ya ompugta ed bilay diad matunong a balon mundo na Dios.”

No kualipikado lan nabautismoan so iyaaralan anggaman agni asumpal so duaran libro, kaukolan ya itultuloy ya iyaral so komaduan libro anggad nasumpal. Anggaman say iyaaralan et bautismado la, say mangikokondukta so nayarin mangireport ed oras, panagpawil, tan panangiyaral na Biblia. Say manangipalapag ya akila ed mangikokondukta tan akibiang ed panagaral so nayari met a mangireport ed oras.