Kasin Nagugunggunaan Kayo?

¹ Kaliktan na minilyon a totoo natan a naamtaan no panon a natalonaan iray problema pian panggayagaan so bilay. Panggagayagaan dan maong iray dilin-makatulong a libro odino ontutupleg ira ed saray grupo tan organisasyon no panon dan napaaligwas so bilay da. Nayarin ipaimano na arum so limitado iran gungguna ya agamoran da. Balet, diad panaglawi ed kualidad na kabibilay natan, kasin naaralan la na totoo ed inkalapagan a panggayagaay mareen tan pirmin makapnek a kabibilay diad panamegley na saray programa na too nipaakar ed panamilin? Andin balot!​—1 Cor. 3:18-20.

² Diad biek a dapag, iiter a libre na Manamalsa tayo so pirmin makatulong ya instruksion parad amin ya ontalineng. Kaliktan nen Jehova ya amin so nagunggunaan ed bangat to. Mabulos ton inter so apuyanan a Salita to pian nigiya so katooan ed kaptekan, tan ginawa ton nipulong so maong a balita na Panarian ed sankadalinan. (Sal. 19:7, 8; Mat. 24:14; 2 Tim. 3:16) Say tuan maliket a bilay so direktan misiglaotan ed panimano ed saray ganggan nen Jehova.​—Isa. 48:17, 18.

³ Lalon matalonggaring so panangigiya nen Jehova nen say niiter na dilin-makatulong iran libro odino dilin-panamaaligwas iran programa ya iyoopresi na mundo. Nagamoran tayo so peteg a tulong tan magnayon iran gungguna no anamoten tayon maong iray probisyon nen Jehova a nidatak ed Salita to tan ibabangat na organisasyon to.​—1 Ped. 3:10-12.

⁴ Nagunggunaan Kayo ed Saray Miting ed Kongregasyon: Natan, ipapanengneng nen Jehova so puron interes diad pangibabangat to ed sikatayo ed saray dalan to, tan nagunggunaan tayo no imanoen tayo so bilin to. Say limaran sinimban miting tayo so pakapatnagan na maaron panagpaga nen Jehova. Sano miaral itayo, ondaak so pikakabat tayo ed Dios. Naaralan tayo a salimbengan so inkasikatayo manlapud mauges no onapit itayo ed si Jehova. Diad onian paraan a napaaligwas iray awawey tayo.

⁵ Dakel ni. Diad saray miting ed kongregasyon et nayarian tayoy “onnatnat.” (2 Cor. 6:13, NW) Laktipen na saya so pikabat ed arum diad kongregasyon. Nagunggunaan tayo manlapud pakapanpapasesegan, a singa ed insulat nen apostol Pablo ed sulat to’d saray taga-Roma. (Roma 1:11, 12) Sanen nansulat ed saray Hebreo, sinimbawa ton maong iramay nayarin niyuugali da lay pamaulyan ed Makristianon pantutuyaw.​—Heb. 10:24, 25.

⁶ Say magayagan kapenek ed bilay so misiglaotan a tuloy ed pagmaliw ya interesado ed pankaabigan na arum. Napapaseseg itayon anapen iray paraan pian napaliket so arum. Sirin, saray Kristianon miting so peteg a pakagunggunaan tayon mismo tan pati saramay pakababayuboan tayo na maabig a pantutuyaw. Say kakaukolanen ed sikatayo et say impapuson pibibiang.

⁷ Ontan met so impabitar nen apostol Pablo ed simbawa to ed si Timoteo sanen sinulat to: “Ipasal mo so inkasika ed maridios a debosyon bilang kalat mo.” (1 Tim. 4:7, NW) Nitepet tayo ed inkasikatayo: ‘Kasin ipapasal koy inkasiak? Kasin manaaral ak pian nagunggunaan ak ed narerengelan ko ed saray miting ed kongregasyon?’ Naebatan tayo na on iratan no momotekteken tayoy narerengel tayo ed saray miting tan no panggunaetan tayo ya iyaplika so naaaralan tayo. Lapu ed mata na pananisia, nayarian tayon nanengneng si Jehova bilang say Abalbaleg a Managbangat ed totoo to ya aliwa labat lan saray agagi tayon manbabangat.​—Isa. 30:20.

⁸ Teokratikon Eskuelaan Parad Panagministro tan Service Meeting: Adesinyo irayan duaran miting ya ontulong ed sikatayon magmaliw ya epektibo ed Kristianon ministeryo. Ontan so gagala na Teokratikon Eskuelaan Parad Panagministro​—sakey ya eskuelaan a walaray estudyante a mangaawat na bilin tan simbawa ed regular a paraan. Pankanawnawa yon idemostra so aligwas yo bilang managpaliwawa ed publiko tan bilang managbangat na Salitay Dios. Balet pian nagunggunaan a maong manlapud eskuelaan, kaukolan yoy manpalista, onatendi, regular a mibiang, tan pampelengan yo iray asainmin yo. Say pangawat tan pangiyaplika ed simbawa a niiter so ontulong ed sikayon onaligwas.

⁹ Nibabangat ed sikatayo diad Service Meeting so kaimportantian na Kristianon ministeryo tan nipapanengneng ed sikatayo no panon itayon makapibiang ed panaggaway babangatan a kimey. Kasin sikayo tan say pamilya yo so sigpot a nagugunggunaan ed niprepresenta ed sarayan duaran miting? Inkuan na sanasawan Kristiano: “Aminsan a Service Meeting et nadngel min kaukolan min singbaten so inagew-agew a teksto bilang pamilya. Agmi itan gagawaen, balet gagawaen mi la natan.” Panon iran agunggunaan? Inako ra: “Nalmoan min lalon makapaliket so pantotongtong mi ed lamisaan. Anggapo lay sangsangan no panangan.” Kasin anggan saray angkelag ya anak so nagugunggunaan ed saray miting? On. Inkuan na ina: “Mapatnag a saray anak mi so apakiwas a maong ed saray miting. Walay aminsan a simba et narel min mantitila so anem-taon ya anak min laki. Balet diad miting ed satan a simba, say instruksion a paliwawa so nipaakar ed panagtila. Lapud nakokonsiensia a maong so itsura to, nilinggis na ugaw si ama to insan nababaingan ya akayurong. Akaaral so ugaw, et kayari na satan anggapo lay problema mi.”

¹⁰ Inkuan na sakey a biin payunir a sikatoy maliket ta niiiter iray suhestion diad Service Meeting pian napaaligwas so ministeryo tayo. Akin? Insalaysay to: “Onsasawa ak la, ta iisipen ko la no maminsan ya agla epektibo iray nisusuheri ed Ministeryo Tayo ed Panarian. Balet diad Service Meeting, sanen nadngel kon kaukolan tayon salien itan, apaseseg ak a maong ya iyaplika iratan a suhestion. Nagmaliw a makapaliket so ministeryo!” Kayari pigaran simba diad impangiyaplika ed saray suhestion pian panggunaetan ya igapoy panangiyaral na Biblia ed unonan dalaw, inggapo toy panagaral ed unonan dalaw ed sakey a bii ya abayag lan manpipikasi parad tulong.

¹¹ Sano makarengel kayo na paliwawa a laktipen toy simbawa na Biblia nipaakar ed saray labalabay yon gawaen, nalilikna yo kasin si Jehova so arap-arapan a mitotongtong ed sikayo? Ontan so alikna na sakey ya agin laki. Inkuanto: “Agano ni diad sakey a miting, walay paliwawa a ditan et sinaglawi na agi no antoran nengneng na panagligliwaan so manepeg tan agmanepeg parad saray Kristiano. Labalabay koy manbantay na boksing ed telebisyon. Balet kayari na satan a miting, impasen kon sayan isport et sakey a klase na panagligliwaan ya agmanepeg parad saray Kristiano. Kanian agak lan balot nambantay na ontan.” On, anggaman labalabay na sayan agi so bengatlan marawal, sikatoy mapaabeban kinmiwas ed panangiwanwan nen Jehova.​—Sal. 11:5.

¹² Say Miting Publiko, say Panagaral na Panag-Bantayan, tan say Panagaral na Libro ed Kongregasyon: Say publikon paliwawa a narerengel tayo ed kada simba so manasaglawi ed nanduruman tema ed Biblia. Anto so naaaralan yo manlapud sarayan paliwawa? Nankomento so sakey a Kristianon asawan laki nipaakar ed gunggunan naawat to: “Nipabitar ed sakey a publikon paliwawa so amin a bunga na espiritu. Binitla na espiker, a parad inkasikato, sikatoy mamili na sakey a partikular a kualidad insan to pankimeyan itan ed loob na sakey simba, ta pian nabayuboan to irayan bunga. Diad sampot na simba, molimolien to no panon ton impatnag itan a bunga diad inagew-agew iran aktibidad to. Insan to pankimeyan so sananey a kualidad ed ontumbok a simba. Agustoan ko itan ya ideya tan ginapoan kon inyaplika ed inkasiak.” Agaylan abig so pangiyaplika ed nanaaralan!

¹³ Ibabangat itayo na Panagaral na Panag-Bantayan a mangiyaplika ed saray prinsipyo na Biblia diad nanduruman situasyon ed bilay. Ontulong iya ed sikatayon namantini so mapalnan kanonotan tan puso anggaman walaray kapagaan ed bilay. Tuloytuloy itayo met a makapibansag ed progresibon katuaan lapud Panagaral na Panag-Bantayan. Alimbawa, agta agunggunaan tayo manlapud impanaral ed saray artikulo na Mayo, 1, 1999, a Panag-Bantayan ya atituloan na: “Sarayan Bengatlan Kaukolan a Napalabas,” “Komon ta Usaren na Mambabasa so Pakatebek,” tan “Manbantay tan Manpeleng!” Panon kayon personal a naapektoan na sarayan impanaral? Kasin ipapanengneng na kiwas yo ya ipapapuso yoy pasakbay nen Jesus nipaakar ed arapen? Kasin ipaparaan yoy inkasikayo parad arapen iran subok sano nanengneng tayo so “makapadimla a bengatla a sengegay pankibalatar . . . ya akaalagey ed sakey a masanton pasen”? (Mat. 24:15-22, NW) Kasin saray kalat tan kurang na bilay yo so mangipatnag ya, aliwan say pantitipon ed materyal a kayarian, noagta say panamasantos ed ngaran nen Jehova so sankaimportantian ed sikayo? Diad Panagaral na Panag-Bantayan, agta say aaralen tayo et pakagunggunaan tayo la natan?

¹⁴ Isipen pa no kaunongay nanaamtaan tayo ed Panagaral na Libro ed Kongregasyon a sinimba. Diad peles et aaralen tayo so libro na Biblia a Daniel. Diad apat bulan lan panaaral tayo ed satan a libro na Biblia, agtayo kasi naiimanon ombubulaslas so pananisia tayo a sinimba? Singa say inad-aron propeta nen Jehova a si Daniel, napabiskeg tayo so pananisia tayo ta pian makapansungdo.

¹⁵ Ibabangat Itayo nen Jehova a Manbilay a Magayaga: Napaliisan tayoy pirmin ermen sano imanoen tayo iray ganggan na Dios. Sakey ni, naeksperiensia tayoy kabaliksan na magayagan kabibilay. Diad itumbok ed panangiwanwan nen Jehova, makapibiang itayo ed kimey to, aliwa labat lan manag-imaton. Tan saramay manusumpal ed kimey na Dios so maliket a totoo.​—1 Cor. 3:9; Sant. 1:25.

¹⁶ Nonot yon maong no panon yon iyaplika iray bengatlan narengel yo ed saray miting ed kongregasyon. (Juan 13:17) Maligligsan manlingkor ed Dios, diad intiron puso yo. Manleppua so gayaga yo. Magmaliw a lalon maaligwas tan makabaliksan so bilay yo. On, nagunggunaan kayo.