Mamepeligro so Dakel a Bilay!
1 Impalinew na Biblia a say linawa nen Jehova et “amin a nengneng na totoo so nisalba.” Balet, tua met a say bilay ya iilaloan na binilyon dia ed dalin so mandependi ed awawey da ed si Jehova a Dios tan ed Panarian to panamegley nen Jesu-Kristo. Say dugan awawey so nibase labat ed “suston pikakabat ed katuaan.” (1 Tim. 2:3, 4, NW) Leleg ya ipapakabat a magano lan nalinisan so dalin ed amin a karelmengan parad igapo na balon mundo na Dios na inkatunong, niganggan met ed sikatayon sumpalen so importantin kimey na panangisalbay bilay.—Mat. 24:14; 28:19, 20; Roma 10:13-15.
2 Akin ya Ontanlan Maganat? Amasakbay si Jesus nipaakar ed “baleg a kairapan ya agni agawa nanlapula ed gapo na mundo.” (Mat. 24:21, NW) Satan a kairapan so mamantok ed Armagedon. (Apoc. 16:16) Napalanit so karaklan a totoo no ag-ira onkiwas ed maong a balita, pati iray agmananisian kakanayon, kakaabay, katrabahoan, kaeskuela, tan kabkabat. Balet pampelengan tayon ipakabat itan ed “amin a nengneng na totoo,” bilang pangalig ed Dios, ya angipatnag na panangaro to ed intiron mundo na katooan nen inter toy Anak to, si Jesu-Kristo, bilang dondon parad amin. (Juan 3:16) Nepeg a maseseg tan magunaet tayon imbitaan so amin ya onkamang ed pasen a panalimbengan na Dios. No sigpot a sumpalen so panagpulong a kimey, napaliisan tayoy pankasalanan ed dala.—Ezeq. 33:1-7; 1 Cor. 9:16.
3 Anto so Gagala Tayo? Nidanet ed Salitay Dios so kaimportantian na panagpulong a kimey. Singa imbalikas nen apostol Pablo, ‘say aro nen Kristo pasooten to itayo’ a manbilay a mitunosan ed saray dalan na Dios. (2 Cor. 5:14) Niarum ni, mabetbet ya idadanet na Say Panag-Bantayan so obligasyon tayon manpulong. Tuloytuloy a mangitatarya na panangiwanwan so Ministeryo Tayo ed Panarian no panon a nagawaan so panagpulong a kimey. Oorganisaen na mamatatken so kimey tan papasesegen da itayo a mibiang ed satan. Sikatayoy iimbitaan na kaparan manangipalapag a miulop ed sikara a manpulong. Dakel so narerengelan tayo nipaakar ed pangiparaan na saray presentasyon tayo, pangiyopresi ed saray magasin tan arum a literatura, panagpawil, panangiyaral na Biblia, tan panganamot ed amin a pankanawnawa pian makapanpulong. Amin na saya so makatulong ed sikatayon sumpalen so gagala na pangisalba ed saray bilay.—1 Cor. 9:22, 23; Efe. 1:13.