Mantultuloy a Manpulong!
1 Linawa na Dios ya “amin a nengneng na totoo so kaukolan a nilaban tan ondago ed suston pikakabat ed katuaan.” (1 Tim. 2:4, NW) Nisengeg ed saya, inikdan to itayo na kimey ya ipulong so maong a balita. (Mat. 24:14) No natalosan tayo no akin a nepeg itayon mantultuloy a manpulong, ag-itayo naamper na antokaman a pakadismayaan odino nayarin pakasbelan a naabet tayo.
2 Akin ya Itultuloy? Dakel a pakasbelan diad mundo so sengeg na pakalingwan odino panleglemew na totoo ed ibabaga tayo ed sikara. Kanian nepeg tayon itultuloy iran panonotan ed mensahe na Dios nipaakar kilalaban. (Mat. 24:38, 39) Niarum ni, naynay a manguuman iray sirkumstansia ed bilay na totoo. Anggan saray kipapasen ed mundo so nayarin biglan manguman. (1 Cor. 7:31) Nayarin nabuas, ontumbok a simba, odino ontumbok a bulan et nipaarap ed balo iran problema odino kapagaan iray totoon pupulongan tayo a sengegay panimano da la ed maong a balitan tarok tayo ed sikara. Agkayo kasi misalsalamat ta intultuloy ya impulong na Tasi so katuaan ed sikayo?
3 Aligen so Panangasi na Dios: Maanos ya inabuloyan nen Jehova ya onlabas ni so panaon sakbay ton ipaakseb so panangukom ed saray marelmeng. Diad panamegley tayo et intultuloy toy akikasi ed saray maptek-impanpuso ya onsingger ed sikato pian nilaban ira. (2 Ped. 3:9) Walay eebatan tayo ed dala no agtayo intultuloy ya impulong ed totoo so mapangasin mensahe na Dios tan ag-ira apasakbayan nipaakar ed onsabin panangukom na Dios ed amin ya agmanguman ed saray mauges a dalan da. (Ezeq. 33:1-11) Anggaman aglawas ya aawaten so panagpulong tayo, nepeg ya ag-itayo ontayer a mansagpot pian tulongan iray masimoon ya apresiaen da so baleg a panangasi na Dios.—Gawa 20:26, 27; Roma 12:11.
4 Ipatnag so Panangaro Tayo: Si Jehova a Dios, panamegley nen Jesu-Kristo, so angiganggan ya ipulong so maong a balita ed intiron dalin. (Mat. 28:19, 20) Anggan ag-ondengel so totoo, pankanawnawa tayon ipanengneng so panangaro tan debosyon tayo ed Dios diad pantultuloy a manggawa na duga.—1 Juan 5:3.
5 Determinado tayo komon a mantultuloy a manpulong! Maseseg tayo komon a gawaen itan leleg a wadia ni so “agew na panangilaban” nen Jehova.—2 Cor. 6:2.