Itultuloy ya Ipulong so Panarian
“Sayan maong a balita na panarian so nipulong ed amin a panaayaman a dalin ya onkanan pantasi ed amin a nasyones; tan insan onsabi so anggaan.”—MATEO 24:14.
1, 2. (a) Anto so sankaimportantian a kimey ed sayan siglo, tan anton kalaknab so kagagawa to? (b) Anto so ebidensya na panamendisyon nen Jehova ed sayan kimey?
SAY panangipulong ed maong a balita na Panarian na Dios so sankaimportantian a kimey ed sayan siglo. Sikato so labay na Makapanyarin-amin a Dios a nagawaan natan, tan sikato so nagagawa diad kasumpalan na mapropetikon Salita. Say inkiwas yo ed satan so mangapekta ed maandon pansumpalan yo.—1 Corinto 9:16, 23.
2 Makapalikliket so pakanengneng a say bilang na mibibiang ed sayan kimey na panagpulong so mantutultuloy ya ondaraak, a natan et wala so masulok a taloran milyon a mibibiang. Lalon ombabaleg a bilang so onloloob ed sigpot-panaon a ministeryo. Tan dakerakel nin interesadon totoo so mangaawat na panangiyaral ed Biblia tan pambabanikelan dan aralen so panggawa ed linawa na Dios.
3. Anto so nayarin ibaga na arum nipaakar ed pankaukolan na pantultuloy ed panangipulong ed maong a balita?
3 No maminsan, anggaman kuan, arum so nayarin “ontunda ed panggawa na maabig” tan “nakesawan” no nipaakar ed kimey na panagpulong. (Galacia 6:9; Hebreos 12:3) Nayarin ikuan da a say maong a balita so nipulong lan malaknab ed teritorya ra tan saray totoo so angala la ed talindeg da tan sikara la so naungangetan sano sikatayo so ondalaw ed kaabungan da. Saraman so manggagawa na kimey na panagpulong ditan so makagagamor na pigpigaran resulta odino anggapon balot. Sirin, liknaen da, anganko ta say kimey so asumpal la, tan anggapo la so pankaukolan na pantultuloy. Anto so lingo ed sayan nengneng na panagnonot?
Akin a Mantultuloy?
4. Anto so nepeg a mamakiwas ed sikatayon mantultuloy ed panagpulong anggan diad teritoryan makapkapuy so ikikiwas?
4 Ununa, say pansungdo tayon sitotoor ed kimey na panagpulong so agmandepende no kasin saray totoo so ontalineng ed sikatayo odino andi. Si Jeremias so nampulong ed 40 taon diad Jerusalem anggamano pigpigara so tinmalineng tan dakel ni ingen so siraramsak a sinmumpa ed sikato. Akin a sikato so nantultuloy? Lapud gagawaen to so sakey a kimey ya ingganggan nen Jehova tan lapud mapropetikon pikakabat to ed no anto so nagawa ed Jerusalem so amaskar ed sikaton mantultuloy a mansalita. (Jeremias 1:17-19) Inkuanto: “Diad pusok et nansumpal a singa mandarlang ya apuy ya akaputan ed saray pukel ko; tan siak so naksawan a mangitetepel, tan agko nayarian a sungdoan.” (Jeremias 20:7-10) Say kipapasen tayo so miulibay. Si Jehova, ed panamegley nen Jesu-Kristo, so angiganggan a say “maong a balita” so nepeg a nipulong ed amin a panaayaman a dalin. (Mateo 24:14) Sano saray totoo so agmalabay ya ontalineng, saya so mangiter ed sikatayo na pankanawnawan mangipanengneng na kaaralman na panangaro tan debosyon tayo ed si Jehova diad pantultuloy tayon manggawa ed duga. (1 Juan 5:3) Likud ni, sano manmorekdek tayo ed no anto so itatarya na arapen ed katooan, panon a nayarian tayon ikibot so panalin pamasakbay ed saray kakaabay tayo?—2 Timoteo 4:2.
5. (a) Nisengeg ed anto nin sananey a rason a sikatayo so nepeg a mansungdo ed kimey na panagpulong? (b) Panon a say panagpulong a kimey so sakey a letnegan na panangukom?
5 Nagkalalo ni, say panagpulong nen Jeremias so peteg a sakey a kimey na panangukom. Nen 607 K.K.P., anggapo ed saraman so akasagmak na patey odino inkaaripen sanen nagba so Jerusalem so makapangibagan agda amta no akin a saya so nagagawa ed sikara. Diad akaunan 40 taon, si Jeremias so mamapasakbay la ed sikara na eksakton ontan a pansumpalan no sikara so mantultuloy a rebelyoso ed si Jehova. (Ipareng so Ezequiel 2:5.) Miulibay natan, say panangipulong ed maong a balita a bilang “sakey a pantasi ed amin a nasyones” so sakey a letnegan na panangukom. Saya so impabitar nen apostol Pablo sanen imbaga to a si Kristo Jesus so mangitarok na panangibales ed “saraman so agmikabat ed Dios tan saraman so agmangunor ed maong a balita nipaakar ed Katawan tayon Jesus.” (2 Tesalonica 1:8, 9) Saray totoo so naukom ed panamegley na ikiwas da ed maong a balita. Sirin, say kimey na panagpulong so nepeg a mantultuloy a maksil tan malinew ya anggad kasampotan. (Apocalipsis 14:6, 7) Anggapo so makaamper ed sayan makanan mensahe diad kitarok to ed totoo a singa kabetbet no nayari. Saya so mangipapasakbat na baleg a responsabilidad ed amin na saray dedikadon ariripen nen Jehova.
6. Anggaman say mensahe so kabkabat lan malaknab, akin a nakaukolan tayo so mantultuloy ed panagpulong?
6 Tua, nayarin nipulong tayo la so maong a balita a malaklaknab ed lugar tayo. Balet wala niray dakel a tuloy a bengatlan nagagawa ed mundo ya anggamano dakel a totoo so akadngel la ed mensahe tayo, agmanbayag et nalingwanan da no itunda tayo so manpulong. Isipen iray rebolusyon, saray nagagawan terorista, welga, saray eskandalo, tan arum niran nagagawan malaknab a nipapalapag. Insan walaray dakerakel a nengneng na popular a panligliwaan tan arum iran pakaderalan na imano. Nepeg tayon itultuloy so panagpulong pian mansiansia so mensahe tayo ed arap na totoo anggaman ed amin na sarayan arum iran manatawag na imano ra.
7. Panon a say kiwas na dakel natan so miulibay ed saramay Israelitas diad panagpropesiya nen Isaias, balet akin a saya so agnepeg a mamatunda ed sikatayo diad panagpulong?
7 Sano dakel so manalin agmangimano ed sikatayo, nepeg tayon nonoten no anton nengneng na totoo so nampulongan nen propeta Isaias. Inkuan nen Jehova ed sikato: “Ta sikato so matunganga a katooan, aliwa ran matuan anak, ananak a masugnar ya ondengel ed ganggan nen Jehova; ya angikuan ed saray makakanengneng, ‘Agkayo onnengneng,’ tan diad saraman so walaan na pasingawey, ‘Agkayo manpapasingawey ed sikami na anggan anton maptek a bengabengatla. Mansalita kayo ed sikami na malamuyot iran bengatla; manpasingawey na saray makapalikdon bengatla. Onsuawi kayo ed dalan; onsipa kayo a manlapud basbas. Patundaen yo so kiwawala na Masanton Sakey na Israel a nisesengeg ed sikatayo.’” Anggaman kuan, si Isaias so simamatuan angibaga ed totoo: “Si Jehova so sakey a Dios na panangukom. Maliket ya amin iraman so mantutultuloy a manaalagar ed sikato.” (Isaias 30:9-11, 18) Nepeg met a gawaen tayo so ontan. Legan a sikatayo so mantultuloy, sayan mensahe tayo so ontanek ed arum a kalaknab. Arum so ontalineng tan arum so andi. Balet amin so nawalaan na pankanawnawan ondengel.
‘Panon So Idengel Da’?
8. Anggamano saray totoo so nayarin ompatnag ya angala la na talindeg da a sumpad katuaan, antoran sengegan so nayarin manguman na kanonotan da?
8 Anganko ta liknaen tayon saray totoo ed sakey a teritorya ya angala na pihon talindeg tan determinadon mangipulisay ed mensahe odino sumpaen da ni. Balet nonoten, say kipapasen ed bilay na totoo so pirmin mangumanuman. Nayarin arapen daray balon problema odino situasyon nabuas, ontumbok a simba, odino ontumbok a bulan a manggawa ed sikaran mangawat la ed katuaan. Nayarin sikara so makadngel ed saray makagonigon a nagagawgawa ed mundo odino anganko ta manasagmak na kakukusbo ed ekonomya, beblay, odino impatey diad pamilya. Saray ontan a bengatla so nayarin managdag ed sikaran onliing tan malabay a mangaral ed sengegan na gonigon da. No itultuloy tayo so manpulong, naamtaan da no iner so teplegan da.
9. Panon a nayarin say kimey na panagpulong tayo so nipareng ed saramay manangisalba ed pasen na desyang?
9 Say kipapasen tayo so nayarin nipareng ed saraman so manangisalba ed sakey a pasen na desyang, a singa diad kayari na yegyeg. Arum so nayarin mankikimey ed sakey a lugar a pigpigara so aromog a niliktar, balet say katuaan a saray katrabahowan da so makakalmo na mas dakel a niliktar ed sananey a pasen so agmanagdag ed sikara a manmeneng tan ontunda la. Imbes, amin a manangisalba so andi-kesaw a mantultuloy anggan sano liknaen dan nayarin anggapo la so niliktar ed nipabtang a pasen da. Tan, sirin, no maminsan et makaromog nira na sananey a niliktar. Say pansakusak so itunda lambengatla sano say panaon a linmabas so mangipatnag ya anggapo lan balot so ilalo. Bueno, say pansasakusak so agni pinatunda, tan sikatayo nin siansia so makakaromog na saray nilibulibo a malabay a nisalba ed sayan daan a mundo tan makaliktar “ed baleg a kairapan.” (Apocalipsis 7:9, 14) Anggan diad saray pasen ya akimeyan lan nagnap tan kaslakan a totoo so ag-onkikiwas, wala niran siansia so arum a resulta. Tan wala niray kaaruman a rason ed pantultuloy a pampulong.
10. Panon lambengat so pikabat na totoo ed no iner so teplegan da no labay dan anapen so katuaan, unong ed Roma 10:13, 14?
10 Saray totoo so nakaukolan a mantultuloy a napanonotan a “balang sakey ya ontawag ed ngaran nen Jehova so nilaban.” Anggaman kuan, a singa intultuloy nen Pablo ed saray sulat to ed saray taga Roma, “panon so itawag da ed sikato ed saman so agda angiteenan na pananisia? Panon, met, so pangiteen na pananisia ed saman so agda nadngelan? Panon, met, so idengel da no anggapo so sakey a nampulong?” (Roma 10:13, 14) Sarayan salita so nepeg a mangipanek ed balang sakey ed sikatayo na pankaukolan diad pantultuloy ed panangipulong ed maong a balita na Panarian na Dios.
11. Anton responsabilidad so wala ed sikatayo ed saray tobonbalo ya ombabaleg ed inkatatken?
11 Legan a say panaon na anggaan so mantultuloy, saray anak so ninianak tan binmaleg ed inkatatken odino diad sakey ya edad na responsabilidad. Mabetbet a sarayan walad kalangweran a totoo so agmangiiter na anggan imano ed katuaan. Saray atateng da so nayarin angipulisay ed mensahe tan sikara ni ingen so nansalita na sumpa ed satan. Balet natan et sarayan tobonbalo so matatken lan manisip a seryoso ed saray kipapasen na mundo, nipaakar ed arapen, tan nipaakar ed gagala ra ed bilay. Nakaukolan da met so ontawag ed ngaran nen Jehova pian sikara so nilaban. Balet “panon . . . so pangiteen da na pananisia ed saman so agda nadngelan?” (Roma 10:14) Diad dakel iran kipapasen et sarayan tin-edyer tan walad kalangweran so onkikiwas ed katuaan, kanian nakaukolan tayoran anapen tan manpulong ed sikara.
12. Panon a say pantultuloy tayo ed kimey na panagpulong so manibukel na sakey a balikas na panangasi nen Jehova?
12 Say katuaan a say dalan so siansia nin lukas ed panagpulong so sakey a balikas na panangasi nen Jehova. Insulat nen apostol Pedro: “Si Jehova so aliwan matantan nipaakar ed sipan to, a singa pangipasen na arum a totoo a matantan, noagta sikato so maanos ed sikayo lapud agto kaliktan so anggan siopan naderal noagta kaliktan to ya amin so makagegemtan na panagbabawi. Nagkalalo ni, imanoen so anos na Katawan tayo a bilang kilalaban.” (2 Pedro 3:9, 15) Say pilalek nen Jehova ya amin a nengneng na too et nilaban so nibalikas ya aliwa lambengat ed siaanos a pangipapalugar to ed panaon sakbay ya idapo to so panangukom noagta ontan met ed mantutultuloy ya iyaapelo to ed totoo ya onarap ed sikato tan nilaban. (1 Timoteo 2:4) Legan ya itultuloy tayon ipulong so maong a balita, ipapabitar tayo so panangasi na Dios, tan diad onia et sikato so idadayew tayo.
Paliisan So Kasalanan-ed-dala
13, 14. (a) Panon a say kimey na panagpulong tayo so nipareng ed kimey na sakey a bantay, a singa asalambit ed propesiya nen Ezequiel? (b) Akin a nayarian nen Pablo ya ibaga a sikato so “malinis a manlapud dala na amin a totoo,” tan panon lambengat so pakapangibaga na saray Tasi nen Jehova ed saya natan?
13 Say responsabilidad na saray dedikadon Tastasi nen Jehova a mamasakbay ed totoo diad onsasabin panangukom na Dios so nayarin nipareng ed si Ezequiel diad panaon to. Sikato so nipasen a sakey a bantay ed abung na Israel. Say kimey to et say pamasakbay ed saray Israelitas ya onsabi so kadudusa ed sikara no ag-ira ombeneg ed saray mauges a dalan da. No sikato bilang sakey a bantay so sinmaew a mangipaknol na pasakbay, siansian onsabi so pananusa ed saray marelmeng a totoo, balet say dala ra so wala ed tapew na ulo na mapaulian a bantay. Diad saya et impanengneng nen Jehova so awawey ed saraman so mangidapo na panangukom: “Panliketan ko, aliwan diad ipatey na sakey a marelmeng, noagta diad sakey a marelmeng ya ombeneg ed dalan to tan peteg a mantultuloy a manbilay. Ombeneg, ombeneg a manlapud saray mauges a dalan yo, ta akin a sikayo so ompatey, O abung na Israel?”—Ezequiel 33:1-11.
14 Binidbir nen apostol Pablo so responsabilidad to bilang sakey a bantay, ya imbaga to ed saray mamatatken ed Efeso: “Sirin tawagen takayo a mantasi ed sayan mismon agew a siak so malinis a manlapud dala na amin a totoo.” Akin a nayarian ton ibaga so ontan? Itultuloy to: “Ta agko inkibot ya imbaga ed sikayo so amin a bilin na Dios.” (Gawa 20:26, 27) Sirin ontan met ed bantay a klase natan, say nakdaan na alanaan a patumbok nen Jesu-Kristo. Amin na saraya, a pati saray masulok a taloran milyon a kakaiba ra a walaan na ilalo diad pakaliktar ed anggaan na sayan sistema na bengabengatla tan makaawat na andi-anggaan a bilay diad dalin, so nepeg ya agbalot manmeneng diad panangipulong ed maong a balita na Panarian na Dios tan mamasakbay ed onsasabin panangidapo na panangukom to. Diad onia et napaliisan da so kasalanan-ed-dala.
15. Unong ed Ezequiel kapitulo 9, siopa so amarkaan, tan siopa so nanggawa na impanmarka?
15 Say kimey na panagpulong natan so mapropetikon adeskribe ed Ezequiel kapitulo 9. Dia, say pananusa nen Jehova so nigeter la ed syudad na Jerusalem. Sakbay na kidapo na satan a panangukom, sakey a lakin akakawes na lienso tan walaan na tinteroan na sekretaryo ed awak to so nibagan onla ed pegley na syudad tan mangikarga na tanda ed kamulingan na amin na saraman so mansibek nisesengeg ed saray makapadimlan bengatlan nagagawad’man. Sano sayan kimey na panagtanda so nasumpal, amin ed syudad nilikud ed saraman so atandaan a para ed kililiktar so pateyen. Diad maaligwas ya inkasumpal na kimey to a panagtanda, imbalita na laki: “Ginawak so singa ingganggan mo ed siak.” (Ezequiel 9:11) Sitotoor a sinumpal to so kimey to ya anggad kasumpalan.
16. (a) Siopa so iretrato natan na samay lakin akakawes na liensa? (b) Panon a say salisalan na panangalangon ed inkasoberano nen Jehova so managdag ed sikatayon mantultuloy a manpulong?
16 Say lakin akakawes na lienso so mangireretrato ed alanaan a nakdaan na saray patumbok nen Kristo, tan sikara so akikasakeyan na “baleg ya ulop” na “arum a karnero.” Say baleg a salisalan natan, a singa ed panaon nen Ezequiel, et say panangalangon ed inkasoberano nen Jehova. Nipaakar ed anggaan na sayan peles a marelmeng a sistema na bengabengatla diad bakal na baleg ya agew na Dios a Makapanyarin-amin, ibabaga nen Jehova: “Tan saray nasyones so mikabat a siak si Jehova.” (Apocalipsis 7:9; Juan 10:16; Ezequiel 39:7) Pian saya so nakabatan na nasyones, kapilitan a saray ariripen nen Jehova ed dalin so mantultuloy a mangipulong ed ngaran to tan gagala to a bilang pantasi ed amin a nasyones.
17, 18. (a) Panon a say pantultuloy tayon manpulong so ontulong ed sikatayon mansiansian akabantay? (b) Anton report so labay tayon amin a gawaen ed si Jehova sano itarok to ed kasumpal so kimey na panagpulong, tan panon lambengat so pakagawa tayo ed saya?
17 Diad pantultuloy ed panangipulong ed maong a balita na Panarian, napansiansia tayo so dilin inkaliing. Mantultuloy itayon sikakabat ed kaimportantian na ngaran tan gagala nen Jehova. No sikatayo so manmeneng, say ilalo ed Panarian so onkapuy, tan ipalir itayo na “saray kapagaan tan kayamanan tan likeliket ed sayan bilay . . . tan agnitarok ed inkayadyari.” (Lucas 8:14) Diad magunaet a pantultuloy ed panangiyabawag “ed maong a balita,” sikatayo so sitotoor a manumbok ed ganggan na Katawan tayo, si Jesu-Kristo: “Mantultuloy a manbantay, mantultuloy ya aliing, ta agyo kabat no kapigan so aturon panaon. Balet say ibagak ed sikayo so ibagak ed amin, Mantultuloy a manbantay.”—Marcos 13:10, 33, 37.
18 Komon ta amin tayo, sirin, so mantultuloy a mananap ed ‘saraman so mansibek’ legan ya iyabuloy nen Jehova so panaon ed satan. Komon ta amin tayo, balanglan say alanaan a nakdaan odino say “arum a karnero,” so magmaliw a matoor diad panangisumpal ed kimey tayo a pangipulong ed maong a balita na Panarian ed amin a panaayaman a dalin ya onkanan pantasi ed amin a nasyones. (Mateo 24:14) Sano si Jehova a mismo so mangitarok ed sayan kimey ed kasumpalan diad gapo na “baleg a kairapan,” komon ta balang sakey ed sikatayo so makayarin mangibaga ed si Jehova, ‘Ginawa mi so singa unong na ingganggan mo ed sikami.’
Kasin Nanonotan Yo?
◻ Anto so ipanengneng na saray nansumpalan no nipaakar ed panagpulong tayo?
◻ Anto so arum a rason no akin a sikatayo so mantultuloy a manpulong?
◻ Panon a say panagpulong so sakey a balikas na panangasi nen Jehova?
◻ Panon so pakapansiansia tayon malinis ed dala na amin a totoo?
◻ Panon a say panagpulong so ontulong ed sikatayon mansiansian akabantay?
[Tsart ed pahina 20]
SARAY NANSUMPALAN NA PANAGPULONG ED LINMABAS A PITORAN TAON
Bilang na Inmatendi ed Bilang na Panangiyaral
Abautismoan Memoryal ed Biblia
1981 119,836 5,987,893 1,475,177
1982 138,540 6,252,787 1,586,293
1983 161,896 6,767,707 1,797,112
1984 179,421 7,416,974 2,047,113
1985 189,800 7,792,109 2,379,146
1986 225,868 8,160,597 2,726,252
1987 230,843 8,965,221 3,005,048