Akin a Mantultuloy a Manpulong?
1 Kasin abayaglan ipupulong so Panarian ed komunidad yo? (Mat. 24:14) No ontan, nayarin isipen yon atayek lay teritorya na kongregasyon yo. Natan no manpulong kayo, nayarin maslak a totoon naabet yo so ompatnag ya andian na interes ed mensahe na Panarian. Anggano ni, imanoen so inaksobi nipaakar ed saray tuan babangatan nen Jesus ed pahina 141 na libron Isaiah’s Prophecy II: “Diad arum a paspasen, say resulta na ministeryo ra so ompatnag ya agmakabaliksan no ikompara ed abalbaleg a kimey tan sagpot ya insekar da. Siansia, sikaray mansusungdo.” Balet akin a mantultuloy a manpulong?
2 Nonoten si Jeremias: Nepeg a say pansungdo tayo a sitotoor ed panagpulong a kimey so agmandependi no kasin ondengel ed sikatayo iray totoo odino andi. Nampulong si Jeremias ed loob na 40 a taon ed parehon teritorya anggaman pigpigara so dinmengel ed sikato tan dakel so sinmumpa ed mensahe to. Akin a nantultuloy si Jeremias? Lapud gagawaen to so kimey a pagagawa na Dios ed sikato tan ed pikakabat to ed say nagawa ed arapen, sikato so apakiwas a mantultuloy a mansalita.—Jer. 1:17; 20:9.
3 Mipadpara so situasyon tayo. ‘Imbilin [nen Jesus] ed sikatayo so pampulong ed baley, tan mantasi a sikato so inggaton na Dios, ya Ukom ed saray mabilay tan inatey.’ (Gawa 10:42) Say mensahe a tarok tayo et bengatlan nipaakar ed bilay tan patey parad saraman so makarengel ed satan. Saray totoo so naukom base ed ikiwas da ed maong a balita. Lapud satan, say responsabilidad tayo et say sigpot a panggawa ed ingganggan ed sikatayo. Anggano ag-ondengel iray totoo, saya so mangiter ed sikatayo na pankanawnawa pian ipanengneng so kaaralem na panangaro tayo ed sikara tan debosyon tayo ed si Jehova diad pantultuloy a panggawa ed nepeg tayon gawaen. Balet wala ni nagkalalo.
4 Nagugunggonaan Itayo: Say panggawa ed linawa na Dios, antokaman so reaksion ed teritorya, so mangiiter ed sikatayo na akindalem a kareenan, kapenek, tan liket, ya agnaromog ed arum nin paraan. (Sal. 40:8) Say bilay tayo so walaan na peteg a kabaliksan tan gagala. Diad lalon pibibiang tayo ed ministeryo, lalon niyaapasakey so kapusoan tan kanonotan tayo ed ilalo tan gayaga a manbilay ed balon mundo na Dios. Say panmolimoli ed sarayan Makasulatan a sipan et mamaaligwas ed espiritualidad tayo tan mamaelet na relasyon tayo ed si Jehova.
5 Anggano agtayo nanengneng a tampol so resulta na panagpulong a kimey tayo, say bukel na katuaan so nayarin nitanem ed puso na sakey a too ya ontubo ed aturon panaon nen Jehova. (Juan 6:44; 1 Cor. 3:6) Anggapo ed sikatayo so makaamta no kaunongan karakel ni so makaaral nipaakar ed Panarian panamegley na saray sagpot na totoo nen Jehova, balanglan diad lokal odino ed sankamundoan.
6 Mas maganat nen say nensaman, nepeg tayon tuloken so bilin nen Jesus: “Manlikas kayo, manbantay tan mikasi kayo: ta agyo amta no kapigan a panaon. Et no anto so kuan ko ed sikayo, kuan ko ed amin, Manpuyat kayo.” (Mar. 13:33, 37) Kanian, amin tayo komon so mantultuloy a mangiyabawag ed maong a balita na Panarian, a paliketen so puso nen Jehova legan a mibibiang itayo ed panamasantos ed matalonggaring tan masanton ngaran to.