No Akin a Pawil Itayo lan Pawil
1. Anto so nitetepet nipaakar ed panagpulong a kimey?
1 Diad maslak a kipapasen, mabetbet a nakokobrian tayo iray teritorya tayo. Anggaman ontan et siansian papawilen tayo iray parehon kaabungan anggano ibaga na akan-abung ya ag-ira interesado. Akin a lalaen tayo ni iramay datin agmangaawat?
2. Anto so manunan rason a pampepelengan tayo so ministeryo?
2 Panangaro ed si Jehova tan ed Totoo: Say manunan rason na pampepeleng tayo ed ministeryo et say panangaro tayo ed si Jehova. Pakikiwasen itayo na puso tayo ya itultuloy ya ibaga ed arum so nipaakar ed matalonggaring a Dios tayo. (Luc. 6:45) Say panangaro ed si Jehova so managdag ed sikatayo a mangunor ed saray ganggan to tan ontulong ed arum a mangalig ed satan. (Uli. 27:11; 1 Juan 5:3) Say sitotoor a pan-anos tayo ed sayan kimey et ag-akadepende ed reaksion na totoo. Sanen pinasegsegang iray inmunan siglon Kristiano, “ag-ira tinmunda” a nampulong. (Gawa 5:42) Imbes a nadismaya itayo sano ag-ondengel iray totoo, mansiasiansia itayon mapekder, diad ontan et nipapanengneng tayo so kabaleg na panangaro tan debosyon tayo ed si Jehova.
3. Panon itayon natulongan na panangaro ed totoo pian mantultuloy a manpulong?
3 Sikatayo met so manpepeleng lapud panangaro tayo ed kakaabay. (Luc. 10:27) Aglabay nen Jehova a walay siopaman a naderal. (2 Ped. 3:9) Anggan diad teritorya a mabetbet a nagagawaan et makakaromog itayo nin siansia na malabay a manlingkor ed si Jehova. Alimbawa, diad Guadeloupe, a diad kada 56 a totoo et walay 1 a Tasi nen Jehova, et 214 so abautismoan nen katantaon. Tan ngalngali 20,000 so inmatendi ed Memoryal, a manga 1 ed kada 22 a totoo ed Guadeloupe!
4. Antoray panguumanan na saray teritorya?
4 Saray Pananguman ed Teritorya: Say kipapasen na teritorya tayo et lawas manguuman. Diad onsublay ya idalaw tayo ed abung ya ag-angawat, nayarin sananey a membro na pamilya ya agnin balot akadngel ed mensahe tayo so mangilukas na puerta tan ontalineng. Odino sananey la manaya iray manaayam ditan tan sikaray interesado. Saray ananak na saray sumpan atateng so ombabaleg tan agmanbayag et ombiig la ra. Nayarin labay na saratan so ondengel ed mensahe na Panarian.
5. Antoy sengegan na idengel la na saray totoo ed mensahe?
5 Saray totoo met so manguuman. Si apostol Pablo et datin “maayew . . . tan manamasegsegang tan managdumsis.” (1 Tim. 1:13) Mipadpara ed satan, dakel ed saray manlilingkor natan so datin ag-interesado ed katuaan. Saray arum ni ingen et sumpa ed maong a balita nen saman. Legan a manguuman so kipapasen na mundo, arum ed saray onsusumpa odino agmangisengan-sengan so nayarin nasagyat ya ondengel. Nayarin ondengel la iray arum kayari impakasagmak da na trahedya, a singa say impatey na membroy pamilya ra, impakaandi na trabaho, problema ed pinansyal odino bunigas.
6. Akin ya itultuloy tayo so entusiastikon panagpulong?
6 Magano lan mangangga iyan sistema na bengabengatla, balet ompepeles so kimey tayon panagpulong tan panagbangat. (Isa. 60:22) Kanian, itultuloy tayo so entusiastikon panagpulong tan manggunaet a pansiansiaen so positibon awawey. Nayarin say onsublay a nakatongtong tayo et ondengel. Kaukolan ya itultuloy tayo so mansalita! ‘No gawaen tayo iya, nilaban tayo so inkasikatayo tan saray ondengel met ed sikatayo.’—1 Tim. 4:16.