Panon so Pakadngel Da?
1. Akin et nayarin makapaangat so kimey a panagpulong, tan akin ya ag-itayo ontutunda?
1 Lapud mapmaples lay isasabi na agew nen Jehova, kakkaukolan tayon tulongan so dakel ni pian nawalaan na suston pikakabat ed Dios tan ed gagala to parad totoo. (Juan 17:3; 2 Ped. 3:9, 10) No maminsan, nayarin makapaangat iya ta dakel iray ag-interesado odino mamabalaw ed sikatayo lapud panagpulong tayo. (2 Ped. 3:3, 4) Balet, dakel nin siansia so rason pian manisian wala niray totoo diad teritorya tayon mangawat ed maong a balita no narengelan da itan. Ingen, panon so pakadngel da no anggapoy manpulong ed sikara?—Roma 10:14, 15.
2. Panon itayon napaseseg na ehemplo nen Pablo?
2 Pangarap ed Saray Isusumpa: Nisesengeg ed saramay labay day ondengel ed mensahe na Panarian, nepeg ya ag-itayo papadismaya. Say Filipos so sankaunaan a syudad ed Europa ya akadngel ed maong a balitan impulong nen Pablo. Sanen sikara nen Silas so palson inakusaan, sikaray pinepekpek tan impriso. (Gawa 16:16-24) Balet, sayan ampait ya eksperiensya et ag-anaktakot tan ag-amatunda ed kinen Pablo. Sanen binisita to so Tesalonica—say syudad ya insublay ton binisita ed impanmisionero to—sikatoy ‘apabayani [odino akapanpakpel lapu] ed Dios.’ (1 Tes. 2:2) Agta malinlinew ed ehemplo nen Pablo so rason no akin ya ‘ag-itayo onkekesaw’?—Gal. 6:9.
3. Anto so nayarin makapanguman ed awawey na saramay datin ag-interesado?
3 Dakel so pigapigay taon lan agda labay so ondengel ed mensahe, balet ta anguman so awawey da. Posiblin say pansengegan na ontan a pananguman et say biglan ikusbo na ekonomya, sakit, ipatey na sakey a kapamilya, odino saray makapagonigon a balita nipaakar ed nagagawa ed mundo. (1 Cor. 7:31) Saramay say ateng da et datin onsusumpa et nagmaliw lan adulto tan labay day ondengel. No mantultuloy tayon manpulong, naikdan iraya na pankanawnawan ‘ontawag ed ngaran nen Jehova’ antis ya atrasado la.—Roma 10:13.
4. Anto so mamakiwas ed sikatayon ‘ag-ontunda’ diad ministeryo?
4 ‘Ag-ontutunda’: Say panangaro tayo ed Dios tan ed kaparan too so mamakiwas ed sikatayon ‘ag-ontundan’ manpulong tan manggawa na babangatan, a singa ginawa na saray apostol nen inmunan siglo. (Gawa 5:42) Dakdakel natan so “mansibek tan man-akis lapu ed amin a kadimlaan a nagagawa.” (Eze. 9:4) Seguradon nainawaan tan naikdan iraya na ilalo sano narengel day maong a balita! Balet, anggan daiset labat so ondengel, ipapaseguro ed sikatayo na Biblia a napapaliket tayon maong si Jehova diad saray sagpot tayo.—Heb. 13:15, 16.