“Atayek Lay Teritorya Mi!”
1 Kasin alikna yo lan say teritorya yo so mabetbet lan nakikimeyan ya anggapo laray kinmarneron totoo ditan? Nayarin inisip yo: ‘Amtak lay reaksion na totoo. Akin et pawil-pawilen ni iraman so ag-interesado?’ Tua a dakel iray teritoryan mabetbet lan nakikimeyan. Balet, sayan katuaan so nepeg a moriaen a positibo, aliwan negatibo. Akin ya ontan? Imanoen so apatiran rason a nibaga ed leksab.
2 Naeebatan Iray Pikakasi Tayo: Inkuan nen Jesus: “Say anien peteg a daakan, ingen saray komikimey daiset; pikasi yo sirin ed Katawan na anien, ta mangibaki komikimey ed anien to.” (Luc. 10:2) Diad loob na saray dekada et ipipikasi tayo ed si Jehova so nagkalalon tulong. Diad dakel a paspasen, walaan itayo la natan na nakakaukolan iran kaaruman a komikimey, tan lalon mabetbet a nakokobrian tayoy teritorya. Agta mamaliket ed sikatayo so katuaan ya eebatan nen Jehova iray pikakasi tayo?
3 Mamawala na Maabig a Bunga so Panseet: Anggan diad mabetbet a nakikimeyan a teritorya, saray totoo so onkikiwas ed mensahe na Panarian tan makakagamor na pikakabat ed katuaan. Sirin, nepeg tayon ompawil-pawil diad paniilalon makaromog na dakel niran matuan-impanpuso. (Isa. 6:8-11) Singa ginawa na saray inmunan babangatan nen Jesus, “mantultuloy ya onla” ed totoo diad niasain a teritorya yo, a panggunaetan a sagyaten so interes da parad Panarian na Dios.—Mat. 10:6, 7, NW.
4 Diad Portugal, dakel a kongregasyon so sinimban mangokobri ed teritorya ra, balet siansian makakaromog ira na saray kinmarnero. Sakey ya agin bii diman so walaan na positibon maong ya awawey. Inkuanto: “Sakbay ak ya onsipot pian manpulong kada kabuasan, manpikasi ak ed si Jehova a tulongan toak a makaromog na interesadon paiyaralan na Biblia.” Sakey ya agew et inyuksoy toy panangiyaral ed saray mantratrabaho diad sakey a parlor. Balet, diad saginonor et sakey labat so malabay a paiyaralan. Inkuan na saman a too: “Ag-interesado iray arum, balet interesado ak.” Diad loob na sakey bulan et sayan interesado so mangikokondukta lay duaran panangiyaral na Biblia. Ag-abayag sikatoy abautismoan, tan diad saginonor et sikatoy nampayunir!
5 Say Kimey so Nagagawaan La: Nipupulong la so maong a balita, unong ed impasakbay nen Jesus a kagawa na satan. (Mat. 24:14) Anggan diad saray lugar a saray totoo so ‘ag-ondengel ed [sikatayo],’ sikaray napapaimanoan diad panamegley na panagpulong a kimey. Ilaloan tayoy arum ya agmangawat odino onsumpa ni ingen ed katuaan. Balet, saratan so kaukolan a suston napasakbayan nipaakar ed onsabin panangukom nen Jehova.—Ezeq. 2:4, 5; 3:7, 8, 19.
6 Ag-itayo ni Asumpal: Aliwan sikatayo so mandesidi no kapigan itunda so panagpulong. Amta nen Jehova so eksakton pangitunda ed satan. Amta to no kasin wala niray totoo ed teritorya tayo a nayarin onkiwas ni ed maong a balita. Natan, arum a totoo so mangibagan ag-ira interesado, balet nayarin saray biglan pananguman ed kabibilay da—pakaandi na trabaho, graben pansakit, ipatey na inad-aro—so mamakiwas ed sikara ya ontalineng diad arum a panaon. Lapud panangidumaduma odino lapu labat ta anggapoy panaon dan ondengel, dakel a totoo so agnin balot akadngel ed ipupulong tayo. Say paulit-ulit a makaaron idadalaw so nayarin mamakiwas ed sikaran mangimano tan ondengel.
7 Saraman so binmaleg la ed imbeneg iran taon tan natan et de-pamilyaan la so nagkalalon mangipasen ed bilay a lalon seryoso tan sikaray mantetepet a say Salita na Dios labat so makaebat. Sakey ya ugaw nin ina so amatuloy ed duaran Tastasi ed abung to tan inkuanto: “Nen melag ak ni, agkon balot natalosan no akin ya aablogen nen inak iray Tastasi tan inkuanto ed sikaran sikatoy ag-interesado, anta say kaliktan da labat et say pangitongtong nipaakar ed Biblia. Denesidik ed saman a no ombaleg ak, miasawa, tan wala lay dilin abung ko, palooben ko iray Tastasi nen Jehova tan paipaliwawak ed sikara so Biblia.” Ontan so ginawa to, ya aliketan iray Tastasi a dinmalaw ed sikato.
8 Sarag Yo Kasi Magmaliw a Lalon Epektibo? Nayarin aliwan naynay a saray totoon dadalawen tayo so manggagawan singa mairap a kimeyan so teritorya a mabetbet. No maminsan et sikatayon mismo so sengegan. Kasin onggagapo itayo a walaay negatibo iran kanonotan? Satan so mangapekta ed awawey tayo ontan met ed tono na bosis tan itsura na lupa tayo. Mangipatnag na positibon awawey tan maligsan itsura na lupa. Salien so balon paraan. Iduma-duma yoy presentasyon yo, tan panggunaetan a paaligwasen itan. Nayarin umanen yoy panangigapon tepet yo odino mangusar na duman teksto diad tongtongan. Tepetan so arum ya agagi no antoy aromog dan matalona diad pankikimey da ed teritorya. Manpulong a kaiba iray nanduruman manangipalapag tan saray payunir, ontan met ya imanoen no akin et epektibo ira ed ministeryo ra.
9 Say panagpulong na Panarian a kimey so aabobonan tan bebendisionan nen Jehova, tan say pibibiang tayo ed satan so mamapaneknek ed aro tayo ed sikato tan ed kapara tayon totoo. (Mat. 22:37-39) Kanian sumpalen tayo sirin so kimey tayo, ya ag-onkekesaw diad mabetbet a pankimey ed teritorya.