Kasin Natulongan Ka no Walay Personal ya Teritoryam?
1. No dakel so teritorya na kongregasyon yo, antoy nayarin gawaen mo?
1 No dakel so teritorya na kongregasyon yo, sarag moy onkerew na personal ya teritorya a nayarin asingger ed panaayaman mo. Oniay impaliwawa na libron Organisado diad pahina 103: “[Lapud] kombeniente so kawalaan na personal a teritorya yo . . . epektibo yon nausar so panaon ya igana yo ed lawak na serbisyo. Ontan met, nayarin labay yon itagar so sananey a manangipalapag a mikimey ed sikayo ed personal a teritorya yo.”
2. Panon a say personal ya teritorya et kaaruman ed panagtasi bilang grupo?
2 Kaaruman ed Panagtasi Bilang Grupo: No naikdan kay personal ya teritoryan asingger ed trabahom, makapanpulong ka legay lunch break odino antis ya onsempet. Ompan sarag moy mangitagar na agin mantratrabahod asingger. No say inter dad sika et asingger ed abung yo, sarag mon itagar so pamilyam ya manpulong ed labi. Siempre, no agka makaatendid pantitipon parad lawak na kimeyan, antis a manpulong et nepeg a manpikasi ka tan onkerew na panangigiya nen Jehova. (Fil. 4:6) Balet, kaukolan mon balansien so panaon mod personal ya teritorya tan pansuportam ed inyuksoy na kongregasyon ya panagtasi bilang grupo. Lalo no weekend, ya dakel so oonlad pantitipon parad lawak na kimeyan, maabig no onsuporta kad grupom.
3. Anto ray gunggona no mangala kay personal ya teritoryam?
3 Saray Gunggona: No mangala kay personal ya teritoryam, walan walay napampulongan mo no malaem so panaon mo. Makapanpulong ka lan tampol tan agnaupot so panaon mod pambiahe. Lapud saya, say arum et makakapan-auxiliary odino regular payunir. Tan lapud nanaasinggeran iray naalmom ya interesado, mas mainomay iran napawil tan niyaralan na Biblia. Nalmoan na dakel ya akatulong iyad sikara pian mas nakabat da ray interesado tan manmatalek irad sikara, lalo la no maminpigan nakimeyan so teritorya antis dan ipawil itan ya teritorya pian nakimeyan met na arum. Kasin say personal ya teritorya et makatulong ed sika tan ed pamilyam pian sigpot yon nasumpal so ministeryo yo?—2 Tim. 4:5.