Pantitipon Parad Lawak na Serbisyo

1. Akin a labay tayon organisado tayo sano manpulong?

¹ Inletneg nen Jesus so organisado tan epektibon paraan na pangasikaso ed panagpulong. Ontan met so labay a nagawa na saramay responsable ed panangipulong na Panarian ed sankamundoan natan. Kanian, oorganisaen na saray kongregasyon ed sankamundoan iray grupo na manangipalapag diad saray pantitipon parad lawak na serbisyo.​—Mat. 24:45-47; 25:21; Luc. 10:1-7.

2. Anto so ilaloan a nagawa diad saray pantitipon parad lawak na serbisyo?

² Maabig ya Uksoyan: Say gagala na pantitipon parad lawak na serbisyo et pian mangiter na panamaseseg, praktikal ya instruksion, tan panangiwanwan antis a manpulong. Nayarin pantongtongan so teksto a magano no onaplika ed lawak na serbisyo. No maminsan, pantongtongan iray panonot a walad Ministeryo Tayo ed Panarian, Reasoning, odino anggan say walad libron Eskuelaan Parad Ministeryo pian iparaan iray onlan manpulong. Nayari met ya idemostra ed antikey so opresin literatura. Sakbay a manpikasi, nepeg ya amta la na amin so piulopan to tan no iner so laen dan teritorya. Kayari na sayan pantitipon ya ag-onlampas ed 15 minuto, amin so ondiretso lan tampol ed teritorya ra.

3. Siopa so akan-responsabilidad ed pangorganisa na pantitipon parad lawak na serbisyo?

³ Panon Iratan ya Organisaen? Say manangasikaso na serbisyo a mangidadaulo so responsable ed pangi-eskedyul ed sarayan pantitipon. Responsabilidad na saray manangasikaso na grupo odino saray katulongan da, so miulop ed saray kagrupo ra diad saray Sabado tan Simba. Arum iran manangasikaso odino ministeryal a lingkor et nayarian day miulop ed saray kagrupo da diad saray ordinaryon agew. Kaukolan a mikoordina iray manangasikaso na grupo ed manangasikaso na serbisyo pian walay magenap a teritoryan kimeyan na grupo ra ed saray Sabado tan Simba. Diad loob na sakey Simba, asikasoen na manangasikaso na serbisyo irayan uksoyan parad saramay mangidaulo ed saray grupo a manpulong.

4-6. (a) Antoy gagala na saray pantitipon parad lawak na serbisyo no nipaakar ed teritorya na kongregasyon? (b) Antoray nayarin ikonsidera diad pandetermina ed pankaukolan parad sarayan pantitipon?

⁴ Iner tan Kapigan Gawaen Irayan Pantitipon? Imbes a mantitipon ed saksakey a lugar so interon kongregasyon, kaslakan et sankaabigan ya iyuksoy irayan pantitipon ed lugar a kombeniente, kaslakan et diad abung na saray agagi, pian epektibon nakimeyan so teritorya na kongregasyon. Nayari met a diad Kingdom Hall so pantitiponan. Dakel a kongregasyon so manggagawa ed saya kayari na aral da ed Simba. Pampelengan a napatikeyan so oras a pambiahe a paonla ed teritorya. Sirin, sagpaminsan et nayarin repasoen iray uksoyan pian seguroen a saray peles a pasen a pantitiponan et siansian nin matukoy pian epektibo tan nakimeyan a maong so teritorya.

⁵ Say sankaabigan ya oras parad sarayan pantitipon tan no maminpiga iyan ikondukta ed interon sakey simba so akadepende ed kipapasen na teritorya. Saray onggendan a tepet so onkanan giya pian determinaen no iner tan kapigan so sankaabigan a panggawa ed saray pantitipon parad lawak na serbisyo.

⁶ Anton teritorya so mankaukolan na nagkalalon imano? Antoy sankaabigan ya oras a pankabkaabungan? Kasin nayarin iyeskedyul ed labi iray pankabkaabungan odino panagpawil? Amin ya uksoyan ed lawak na serbisyo so nepeg ya ipaskil ed information board na kongregasyon. Pilalek na amin a manangipalapag a kimeyan a maong so niasain a teritorya ra ta pian nibaga tayo met so imbaga nen apostol Pablo: “Asumpal ko lay kimey ko’d sarayan pasen.”​—Roma 15:23, MB.

7. Antoy responsabilidad na mangidaulo ed grupo parad lawak na serbisyo?

⁷ Pangikondukta ed Sarayan Pantitipon: Nipanengneng na niasain a mangasikaso ed sayan pantitipon so panamabli to ed sayan teokratikon uksoyan diad pamparaan ton maong. Kaukolan a nigapo ed suston oras iratan a pantitipon tan kaukolan a makaibangat tan antikey, a gawaen ed loob na 10 anggad 15 minuto. Kaukolan ya amta la na manangikondukta no iner so teritorya a kimeyan na grupo antis na pantitipon. Anggaman agkaukolan ya alagaren iray atrasadon onsabi kayari na pantitipon parad lawak na serbisyo, makatulong so pangitilak na nota odino pangibilin no iner so pankimeyan na grupo. Kaukolan ya amin et ondiretso lan tampol ed teritorya kayari na pantitipon. Seguradon mangitarya na nakaukolan a panangiwanwan so organisadon maong tan makaibangat a pantitipon parad lawak na serbisyo ed amin a manpulong ed satan ya agew.​—Uli. 11:14.

8. Panon a makapikoopera iramay inmatendi ed pantitipon parad lawak na serbisyo ed samay mangidadaulo?

⁸ Iyatendi ed Sarayan Pantitipon: Kaukolan so kooperasyon. (Heb. 13:17) No posible, tulongan na mangoorganisa ed grupo so siopaman a mankaukolan na kaulop a manpulong. Maabig no presente iray eksperiensyado lan manangipalapag pian makatulong ed saray balo ni tan agni tanton eksperiensyado. No maminsan, nayarin baleg so nagawaan na saramay mabulos a niasain a mikimey ed arum. (Uli. 27:17; Roma 15:1, 2) Nepeg a panggunaetan na amin so isabi ed dugan oras. Say respeto tayo ed teokratikon uksoyan tan pangikonsidera ed agagi tayo so mamakiwas ed sikatayon manggawa na kaukolan iran pananguman.​—2 Cor. 6:3, 4; Fil. 2:4.

9. Diad antoran paraan a nasuportaan na saray payunir iyan uksoyan?

⁹ Suporta na Saray Payunir: Makanakana tan makapaseseg ed amin so suporta na saray payunir ed pantitipon parad lawak na serbisyo. Amta tayo a dakel so responsabilidad na saray payunir. Likud ed panangiyaral na Biblia tan panagpawil, kabiangan ed inagew-agew a kimey da so pangasikaso ed responsabilidad da ed pamilya tan sekular a trabaho ra. Kanian, ag-ipapasen na saray payunir ya obligado iran mansuporta ed amin a pantitipon parad lawak na serbisyo ya inyuksoy na kongregasyon, lalo la no inagew-agew itan a gagawaen. Balet, posible a nayarian dan suportaan so pigara ed sarayan pantitipon ed loob na sakey simba. Sarayan pantitipon et kipasalan, tan makatulong a maong ed arum so kakabatan na saray payunir ed Biblia tan eksperiensya ra. Lapud mabetbet iran manpupulong, dakel lay eksperiensya ra ed ministeryo. Ninabang da iya ed arum. Say seseg da ed ministeryo tan ed pantitipon parad lawak na serbisyo so maabig ya aligen. Tan aapresyaen a maong so pibibiang da ed sarayan pantitipon.

10. Akin a matukoy ya ipapuson suportaan na amin a manangipalapag iyan uksoyan?

¹⁰ Singa ed di Jesus tan saray babangatan to, baleg so nagagawaan na panagpulong ed kaabungan pian nasumpal so panangipulong na Panarian. Say gagala na pantitipon parad lawak na serbisyo et parad pakapasesegan tan ontulong ed sikatayon magmaliw ya epektibo ed panagkabkaabungan. Kaukolan a panggunaetan a suportaan na amin a manangipalapag iyan teokratikon uksoyan. (Gawa 5:42; 20:20) Komon ta ipapuso tayon suportaan iya, pian nagamoran tayo so daakan a bendisyon nen Jehova. Napaliket tayo met so Lider tayo, si Jesu-Kristo, legan tayon ipupulong so Panarian na Dios.​—Mat. 25:34-40; 28:19, 20.