Saray Pantitipon Parad Lawak na Kimeyan ya Talagan Makagunggona

1. Antoy gagala na pantitipon parad lawak na kimeyan?

¹ Aminsan, tinipon nen Jesus so 70 ya disipulo to antis iran onlan manpulong. (Luc. 10:1-11) Pinaseseg to ra diad impangipanonot ton agda bukbukor tan idadaulo ira na “Katawan na panag-ani,” si Jehova. Angiter met si Jesus na saray instruksion pian akaparaan iran manpulong insan to ra imbaki ya “sanderwa.” Ontan met so gagala na saray pantitipon ya gagawaen tayo antis ya manpulong—pian napaseseg tayo, tan gawaen to tayon akaparaan tan organisado.

2. Panon karukey so pantitipon parad lawak na kimeyan?

² Diad kaplesan, say pantitipon parad lawak na kimeyan et gagawaen ed 10 anggad 15 minuto, kaiba lay pangiyulop, pangiyasain na teritorya, tan pampikasi. Balet umanen la itan natan. Kagapoy Abril, say pantitipon parad lawak na kimeyan et 5 anggad 7 minuto labat la. Balet mas patikeyen ni itan no gawaen kasumpal na aral, ta saramay inmatendi et akarengel lay makapaseseg iran punto ed Biblia. Saray pantitipon parad lawak na kimeyan et pinatikey pian mas dakel so panaon tayon manpulong. Sakey ni, no ginmapo la ray payunir o manangipalapag ya manpulong antis na pantitipon parad lawak na kimeyan, magano labat lan napultot so pampupulong da.

3. Panon ya gawaen a talagan makagunggonad saray manangipalapag iray pantitipon parad lawak na kimeyan?

³ Nepeg ya gawaen a talagan makagunggonad saray manangipalapag so pantitipon parad lawak na kimeyan. Diad dakel ya kongregasyon, mas maabig no biig ya mantitipon so kada grupo nen say mantitipon iran amin ed saksakey a lugar. Nayarin mas mainomay iran makasabid lugar a pantitiponan tan diad teritorya. Mas maganon naorganisa na manangasikaso na grupo iray manangipalapag, tan mas naasikaso to ray walad grupo to. Nayarin konsideraen na ulop na mamatatken so kipapasen na kongregasyon tan mandesisyon ira no antoy maabig ya gawaen. Antis ya sampotan so pantitipon ed antikey a pikakasi, nepeg ya amta la na amin no iner so pankimeyan da tan no siopay kaulop da.

4. Akin ya agnepeg ya isipen a say pantitipon parad lawak na kimeyan et aliwan tanton importante komparad saray aral?

⁴ Importante ya Singa Saray Aral: Saray pantitipon parad lawak na kimeyan et parad saramay onlan manpulong, kanian ompan aliwan interon kongregasyon so onatendi. Balet agto labay ya ibagan sarayan pantitipon et aliwan tanton importante komparad saray aral. Singa met ed amin ya aral, nanlapu itan ed si Jehova tan makatulong pian makapansasagyatan tayon mangaro tan manggawa na maabig. (Heb. 10:24, 25) Kaukolan sirin ya akaparaan so mangikondukta pian sarayan pantitipon et mangiter na galang ed si Jehova tan makagunggonad saray onatendi. No praktikal, nepeg ya pansagpotan na saray manpulong so onatendi.

Ag-iisipen ya saray pantitipon parad lawak na kimeyan et aliwan tanton importante komparad saray aral

5. (a) Antoy betang na manangasikaso na serbisyo ed pangiyuksoy ed pantitipon parad lawak na kimeyan? (b) Panon so nepeg a pangikondukta na sister ed pantitipon parad lawak na kimeyan?

⁵ Pamparaan na Mangikondukta: Pian akaparaan a maong so sakey ya mangipresenta na parte tod aral, kaukolan ya mabayag ni et naawat to lay asainmin to. Ontan met ed pantitipon parad lawak na kimeyan. Siempre, no biig ya mantitipon so kada grupo, say manangasikaso odino say assistant to so mangikonduktad grupo ra. Balet no maniba so interon kongregasyon ed pantitipon parad lawak na kimeyan, mangiyasain so manangasikaso na serbisyo na mangikondukta. Say arum ya manangasikaso na serbisyo et iikdan day kopya na eskedyul so amin ya mangikondukta tan mangipeket met irad information board. Nepeg ya aralen na manangasikaso na serbisyo no siopa ray iyasain ton mangikondukta, tan tandaan to ya say kalidad na sarayan pantitipon et akadepende met ed abilidad na saray mangikondukta ya manbangat tan mangorganisa. No wala ray agew ya anggapoy manpulong ya elder, ministeryal a lingkor, o kualipikado ya bautismadon brother, nepeg ya mangiyasain so manangasikaso na serbisyo na kualipikadon bautismadon sister ya mangikondukta.—Nengnengen so artikulon “No Bii so Mangikondukta.”

6. Akin ya importantin manparaan a maong so niyasain a mangikondukta?

⁶ No walay asainmin tayod Teokratikon Eskuelaan Parad Ministeryo odino Pantitipon Parad Panagserbi, ipaparaan tayon maong itan. Aliwan no paonla ti lad Kingdom Hall insan ti labat la isipen so ibaga tayo. Ontan met no niyasain tayon mangikondukta na pantitipon parad lawak na kimeyan. Natan ta mas antikey la, mas kaukolan so pamparaan pian makagunggona itan tan dugad oras. Kaibad satan so masakbay lan pannonot no anton teritorya so kobrian.

7. Anto ray nayarin konsideraen na saray mangikondukta ed pantitipon?

⁷ No Anto Iray Konsideraen: Lapud nanduruma so kada teritorya, anggapoy outline ya inter na matoor ya aripen ya usaren ed kada pantitipon parad lawak na kimeyan. Makatulong so kahon ya “Saray Nayarin Konsideraen Legan na Pantitipon Parad Lawak na Kimeyan.” Maslak et gagawaen iyan pantitipon a mankomentoy dumerengel. No maminsan, nayarin walay imparaan ya demostrasyon odino matukoy ya video ya nanlapud jw.org. No manpaparaan, nepeg ya nonoten na mangikondukta no antoy nausar na saray manpulong ed satan ya agew tan mamaseseg ed sikara.

8. Anto ray nayarin pantongtongan ed pantitipon parad lawak na kimeyan diad Sabado tan Simba?

⁸ Singa bilang, diad Sabado, maslak ya manangipalapag et mangiyoopresi na Say Panag-bantayan tan Onliing! Dakel ed saray ompapaway no Sabado so agmakakapaway na Lunes anggad Biernes, kanian ompan nalingwanan da lay presentasyon ya impasal da legan na Panagdayew na Pamilya ra. Nayarin makatulong no rebyuen na mangikondukta so sakey ed saray pangaligan a presentasyon diad beneg na Ministeryo Tayo ed Panarian. Nayari met ya pantongtongan no panon ya iyopresi iray magasin ya usaren so kaplesan a holiday, balita, o nagagawad lugar yo, odino no panon ya iparaan so unabung ed ipawil no inawat to ray magasin. No nausar la na arum iray opresin magasin, nayarin tepeten na mangikokondukta no anto ray makapaseseg ya eksperiensya da odino no anto ray nisuheri da. Diad Simba, ontan met so gawaen na mangikondukta ed saray opresi ed satan a bulan. Nayarin iyopresi ed anggan anton agew iray iyaaral tayon publikasyon a singa say brosyur ya Maong a Balita tan Ondengel ed Dios, tan say libron Ibabangat na Biblia, kanian nayarin konsideraen a magano na mangikondukta no panon ya iyopresi irayan publikasyon.

9. Anto ray nayarin pantongtongan diad Sabado-Simba ya walay espisyal a kampanya?

⁹ Diad Sabado-Simba ya walay espisyal a kampanya na kongregasyon, nayarin ikonsidera na mangikondukta no panon ya iyopresi iray magasin kaiba na imbitasyon o tract, odino ipaliwawa toy gawaen no walay angipanengneng na interes. Nayari met ya mangisalaysay na saray eksperiensya a mangipapanengneng ya epektibo iray ontan a kampanya.

10, 11. Akin ya importante so pamparaan na saray manangipalapag pian maaligwas so pantitipon parad lawak na kimeyan?

¹⁰ Pamparaan na Saray Manangipalapag: Wala met so gawaen na saray manangipalapag pian maaligwas so pantitipon parad lawak na kimeyan. No manpaparaan tayon masakbay, nayarin legan na panagdayew na pamilya, walay nainabang tayod arum a manangipalapag. Kaukolan met ya wala lay magasin tan literatura tayo antis tayon onlad pantitipon parad lawak na kimeyan pian kayari to, amin et makaonla lan tampol ed teritorya.

¹¹ Importante met ya iplanon onsabi antis ya onggapoy pantitipon. Pansasagpotan tayoy onsabin masakbay ed amin ya aral. Balet mas lalon makadisturbo no diad pantitipon parad lawak na kimeyan tayo naatrasado. Akin? Dakel so ikokonsidera na mangidaulo antis ton organisaen so grupo. No pigpigara labat so manpulong, nayarin ibaki to ran amin ed teritoryan matalag ya napulongan. No wala ray anggapoy luluganan tan arawi so teritorya, nayarin iyulop to rad saramay walay luluganan da. No say teritorya et delikado, nayarin mangiyasain na lalaki ya ag-onarawi odino miulop ed saray bibii. Nayarin iyasain to ray maedad la ed lugar ya aliwan patatdang tan diad saray abung ya agla ra ontakayan. Saray balon manangipalapag et nayarin iyulop tod saray eksperiensyado la. Balet no atrasadon onsabi iray manangipalapag, kaukolan to lamet ya umanen iray uksoyan parad saray atrasado. Siempre, no maminsan et walay makatunongan ya rason ya naatrasado tayo. Balet no naynay la, maabig no usisaen tayoy sarili tayo ompan kulang so apresasyon tayod saray pantitipon parad lawak na kimeyan odino ompan agtayo manpaparaan.

12. No kaslakan et sikay manpipili na kaulop mo, antoy nayarin ikonsideram?

¹² Antis ya onggapoy pantitipon, sarag na saray manangipalapag so manpili na kaulop da odino nayari met ya miulop irad iyasain ed sikara. No kaslakan et sikay manpipili na kaulop mo, nayarim kasin ‘inatnat so panangarom’ diad pikimey ed nanduruman manangipalapag imbes ya saray kakaarom lan lanang? (2 Cor. 6:11-13) Sarag mo met kasi miulop no maminsan ed saray balon manangipalapag pian natulongan mo ran onaligwas ed panagbangat da? (1 Cor. 10:24; 1 Tim. 4:13, 15) Dengelen a maong iray instruksion, pati no iner so pangigapoan ed teritorya. No asumpal lay pantitipon, anggad posible, agla uumanen iray uksoyan tan onla lan tampol ed teritorya.

13. No amin et seryoso dan gawaey biang da, antoy nitulong ed sikatayo na pantitipon parad lawak na kimeyan?

¹³ Kasumpal dan nampulong, “malikeliket a pinmawil” iramay 70 ya imbaki nen Jesus. (Luc. 10:17) Seguradon akatulong a maong imay impanipon nen Jesus ed sikara antis iran nampulong. Makatulong met so pantitipon parad lawak na kimeyan natan. No amin et seryoso dan gawaey biang da, say pantitipon parad lawak na kimeyan et makapaseseg, tan gawaen to tayon akaparaan tan organisado pian nagawaan tayoy ganggan ed sikatayon ‘mantasi ed amin a nasyon.’—Mat. 24:14.

No manpaparaan, nepeg ya nonoten na mangikondukta no antoy nausar na saray manpulong ed satan ya agew tan mamaseseg ed sikara

No Bii so Mangikondukta

Nepeg ya manpandong so sister tan akayurong no mangikonduktay pantitipon parad lawak na kimeyan. Say pilien ton ikonsiderad pantitipon et singa met ed saray ikokonsidera na brother. Pian ag-ompaway ya singa manbabangat, nayarin gawaen to itan ya pantotongtong bilang grupo. No ipadaulo tod sakey a bautismadon sister so pikakasi, nepeg ya manpandong met so sister. No walay onsabin bautismadon brother legan na pantitipon, paituloy la itan na sister ed sikato. Nepeg ya isipen na manangasikaso na serbisyo iray posiblin nagawa tan mangiter na matukoy iran instruksion pian anggapoy singa nasisikig. Singa bilang, ompan walay mantinedyer ni labat ya bautismadon brother ya onatendid pantitipon tan sister so mangikondukta, balet parad saray elder et agni kualipikado so brother ya mangikondukta. No ontan, ipaamta na manangasikaso na serbisyo ed sikaran dua ya inyasain so sister ya mangikondukta, balet say brother so mangidauloy pikakasi no parad saray elder et kualipikado lan manpikasi. Odino ompan walay brother ya walay restriksion to tan agnayarin mangikondukta na pantitipon odino mangidauloy pikakasi, tan saray elder labat so makaamtay rason. Agla kaukolan ya ibaga iray kompidensyal ya impormasyon, nepeg ya ipaamta na saray elder ed saray inyasain ya sister ya sikaray mangikondukta tan manpikasi anggan wadman may brother. Ipaamta met na saray elder ed samay brother no anton agew ya inyasain iray sister ya mangikonduktay pantitipon parad lawak na kimeyan.

Saray Nayarin Konsideraen Legan na Pantitipon Parad Lawak na Kimeyan:

Sakey ya pangaligan a presentasyon diad Ministeryo Tayo ed Panarian.
Sakey a video diad jw.org ya nausar ed ministeryo.
Sakey ya aspekto na maabig a presentasyon, singa say pangigapoy tongtongan, pangiparaan ed unabung parad ipawil, o pangibaga na uksoyan ed pandonasyon no walay angawat na literatura.
Makapaseseg odino mausar a teksto ya matukoy ed ministeryo.
Eksperiensyad panagpulong a nabasad publikasyon odino diad mismon kongregasyon yo.
Impormasyon ed sakey ya artikulo na Ministeryo Tayo ed Panarian.
Impormasyon manlapud sakey ya agano nin parte ed Pantitipon Parad Panagserbi.
Impormasyon ya nausar ed ministeryo a walad Panag-bantayan.
Impormasyon ya nausar ed ministeryo a walad libron Eskuelaan Parad Ministeryo tan “Gala Magmaliw Kan Patumbok Ko.”
Sakey a feature ed jw.org ya mausar ed ministeryo.
Sakey a seksion ed revised ya New World Translation ya mausar ed ministeryo.
No panon ya igapoy tongtongan no ateista, manisiad ebolusyon, Hindu, odino Buddhist so unabung.
No antoy iyebat ed ibaga na unabung ya posiblin mamatunday tongtongan.
No panon mon natulongan so kaulop mo ya magmaliw a mas epektibon manpulong.
No antoy gawaen no sananey so lenguahe na unabung.
No panon ya gawaen so sakey ya klase na ministeryo, singa say pan-search, pampulong ed telepono, panagpulong ed publiko, panagpawil, o panangiyaral na Biblia.
Panonot nipaakar ed panag-alwar diad ministeryo, pangiyadapta na presentasyon, pangipanengneng na respeto, pagmaliw ya positibo, odino arum nin miparad satan.