No Panon so Pampulong ed Lugar na Saray Negosyo
1. Antoray pigaran bentaha na pampulong diad lugar na saray negosyo?
1 Kaliktan yo ta so manpulong ed teritorya a kaslakan lan aawaten iray bisita tan walay napitongtongan a totoo? Nayari yon gawaen itan diad mismon teritorya na kongregasyon yo. Panon? Diad idalaw ed lugar na saray negosyo. Mabetbet a panggagayagaan na saray manangipalapag so maabig iran resulta na panagtasi ed saray lakoan.
2. Panon ya uksoyen so panagtasi ed saray pasen na negosyo?
2 Walaray arum a kongregasyon a sakop na teritorya da so lugar na saray negosyo. Say agin laki a mangaasikaso ed saray teritorya so nayarin manggawa na mapa ed melag a kard parad sarayan apusek a seksion na negosyo. Dinanman a mapa na residensyal a teritorya a walaan na saray seksion na negosyo so nepeg a malinew a mangipabitar a saray seksion na negosyo so agkimeyan bilang kabiangan na residensyal a teritorya. Diad arum iran teritorya, saray lugar na negosyo so nayarin kimeyan kalaktip iray kaabungan. No agyo nin balot asali so nantasi ed saray lugar na negosyo, gapoan itan diad pampulong ed pigaran ankelag a lakoan.
3. Anto so ontulong ed sikatayon magmaliw ya epektibo sano mantatasi ed saray lakoan?
3 Mangusar na Simplin Introduksion: Sano mantasi ed saray lakoan, importante a sikayo so mangawes a singa ed panangawes yo sano onlan miaral ed Kingdom Hall. Maabig met so pamili na oras sano ag-okupado so lakoan. No posible, onloob kayo sano anggapo iray manaalagar a kustomer. Kerewen a mitongtong ed manedyer odino ed toon mangaasikaso. Magano kayo labat tan direkta ed punto. Anto so nayari yon ibaga?
4-6. Anto so nayari tayon ibaga sano mantatasi ed akankien na lakoan odino manedyer?
4 Sano mitotongtong ed akankien na lakoan odino manedyer, nayarin onia so ibaga yo: “Saray negosyante so talagan okupado kanian matalag mi ran nasabi ed abung da, satan so rason no akin a dadalawen mi kayo ed pantratrabahoan yo. Saray magasin mi so inkalapagan a mangiimaton ed kaplesan iran nagagawa ed interon mundo.” Insan mangiparungtal na sakey ya antikey a punto ed sakey ed saray magasin.
5 Odino nayari yon salien iyan simplin introduksion: “Dakel a totoo so malabay a manaral a nagkalalo nipaakar ed Biblia balet ta ngalngali anggapoy panaon da. Sayan tract so mangipapaliwawa ed libren programa na panagaral a pinawala pian ontulong ed sikayo a naromog iray ebat ed saray tepet yo ed Biblia.” Insan ipabitar so pahina 4-5 na tract a Labay Moy Makaaral nin Maong Diad Biblia?
6 No mapatnag ya okupado so toon mangaasikaso, nayarin iyopresi yo lambengat so tract insan ikuan: “Onsamar ak dia lamet sano agkayo la okupado. Labay kon amtaen no anto so nibaga yo ed sayan tract.”
7. Panon tayon nabayuboan so interes na aromog tayo ed teritorya a lugar na saray negosyo?
7 Bayuboan so Impatnag ya Interes: Nayari kayo ni ingen a makapangikondukta na panagaral na Biblia diad saray lugar na negosyo. Sakey ya espisyal payunir so regular a mangitutulor na saray magasin ed sakey a negosyanten laki. Sanen impatnag na laki so interes to ed nababasa to, indemostra na payunir so uksoyan ed panagaral na Biblia, ya inusar toy Kakaukolanen a brosyur. Niletneg so panagaral diad mismon pantratrabahoan na laki. Bilang konsiderasyon ed kipapasen, lilimitaan na payunir so idalaw to ed manga 10 anggad 15 a minuto labat. Komon ta mantultuloy itayo met a mananap ed saray makanepegan diad pantasi ed teritorya a lugar na saray negosyo.