Kasin Maawang so Teritorya na Kongregasyon Yo?
1 Manlapud saray syudad diad Judea angga ed saray baryo na Galilea, si Jesus so malaknab a nampulong diad maawang a teritorya na Israel nensaman. (Mar. 1:38, 39; Luc. 23:5) Sikatayo met so kaukolan a mangipasabi ed maong a balita diad dakel a totoo anggad nayarian tayo. (Mar. 13:10) Balet, saya so peteg a makapaangat. Akin?
2 Dakel a kongregasyon diad Pilipinas so walaan na teritorya a nitaytayak ed maawang iran lugar, a maslak ed satan et diad kapalandeyan tan mairap a nasabi. Antoy nagawaan tayo pian natulongan iray totoon manaayam ed saratan a maawa-awang a teritorya a makaaral na katuaan nipaakar ed si Jehova, si Jesus, tan say Panarian?
3 Manplanon Maong: Kaukolan a say manangasikaso na serbisyo tan say manangasikasoy teritorya so mangimaton ed pansasagpot na kongregasyon pian nagawaan so sankaabigan. Nayarin iyeskedyul iray nikaduman Sabado sano dakel so makapankimey a sanagew. Sano kimeyan iray ararawin teritorya, iplano so pambayag ed lawak na kimeyan no posibli, a manbalon la na pangugtoan pian napanggayagaan so kaagwan. Nayarin mas masakbay kayon manbabana parad serbisyo nen say gendat pian walay panaon parad pambiahe ed teritorya odino gawaen so miting parad lawak na kimeyan diad asingger ed pasen a pankimeyan. Iyarunsa so pankimey ed ararawin pasen diad panaon sano marakep so tiempo tan say dalan.
4 No walay amta na saray mamatatken ya asingger a kongregasyon a lanang a makakakobri ed teritorya ra, nayarin imbitaan da ran mikimey ed kongregasyon yo diad ararawi iran teritorya, nagkalautla legan na saray bulan na tiagew. Say ontan a pikokoopera so makapagayaga tan mabunga.
5 Seguroen so pangawit na malaem a literatura. No matalag a nakikimeyan so teritorya, nayarin matukoy so pangitilak na tract odino daan a magasin ed saray anggapo’d abung. Iyopresi so tract a Labay Moy Makaaral nin Maong Diad Biblia? ed amin a naabet yo.
6 Sigpot a Mikoopera: Say pankimey ed maawang a teritorya so mankaukolan na pikokoopera na balang sakey ed kongregasyon. Sano kaukolan so andukey a pambiahe, saramay manbiahen maniiba so mannanagnag parad gastos ed gasolina. Nakaukolan so pakatebek sano makaromog na unabung a mabulos a mitongtong. Lawas sinononot ed pankaukolan a nasabi so amin ed teritorya, tan magmaliw a makonsidera ed saramay manaalagar ed grupo yo. No kaliktan yo ni so manbayag a mitongtong ed interesadon too, kasin makapanggawa na saray uksoyan pian agnaabala so grupo?
7 Iyuksoy so pihon pamawil ed saray interesado. Isulat so address pian mantultuloy kan makapantasi panamegley na koreo. No anggapoy kangaranan na saray karsada odino ag-anumeroan iray abung diad baryo, maalwar a mandrowing na mapa odino isulat so pakatandaan no panon a naromog so interesadon too diad ipawil.
8 Agaylan pankanawnawa so walad sikatayo a sumpalen iray bilin nen Jesus: “Tan ed anggan dinan a syudad ono baley a looban yo, anapen yod’man no siopa so makana”! (Mat. 10:11) Maseguron bendisyonan nen Jehova iray sagpot yo legan a mabulbulos yon isesekar so inkasikayo ed sayan makatumang a tuloy a kimey!