Sano Agnasabi ed Abung Iray Totoo
1. Anto so kaslakan ya angat no manpupulong itayo ed kabkaabungan?
1 Diad dakel a lugar et lalon oniirap so pakasabi ed totoo diad kaabungan da. Diad sarayan “panaon a maatap,” napapaskar so dakel a mantrabaho na andukey ya oras ta pian nitarya iray manunan pankaukolan. (2 Tim. 3:1) Arum so nayarin agnasabi ed ayaman da lapud mansasaliw odino wala ira’d panagligliwaan. Panon tayon nipasabi so maong a balita ed saratan?
2. Panon tayon naseguro a naasikaro iray anggapoy nasasabi ed abung?
2 Mangisimpen na Maabig Iran Rekord: Say manunan kundang et isulat iramay anggapo ed abung da. Nagkalautlan importante iya no mabetbet yon kikimeyan so teritorya yo. Kasin isusulat mo so kalye, ngaran mo, tan say petsa? Nayarin mangitilak kay pangisulatan na kaaruman iran nota sano sika odino sananey a manangipalapag so ompawil pian kimeyan iray ag-asabi ed abung. Aglilingwanan ya iter so rekord ed akan-teritorya ed satan no kasumpal mon manpulong, nilikud labat no onabobon a sikay mamawil ed saray ag-asabi. Ibiig ya irekord so siopaman ya interesadon akatongtong mo a pawilen mo.
3. Antoray pigaran suhestion pian nasabi iramay anggapo ed abung da?
3 Salien ed Arum ya Oras Odino Agew: Nayarin saramay agnasasabi ed abung no agew et nasabi ed abung no labi odino diad saray sampot-simba. Niyuksoy mo kasi so eskedyul mo pian makapawil ed mas matukoy a pankanawnawa? (1 Cor. 10:24) No andi, nayarin iter moy listaan na saray ag-asabi ed abung ed sakey a manangipalapag a makasarag ya ompawil ed arum ya oras odino agew. No aliwan matukoy, nayarin sulatan mo iramay ag-asabi ed abung odino salien mo iran tawagan ed telepono. Saray manangipalapag a nalilimitaan so pibibiang da ed panagkabkaabungan a kimey lapud problema ed bunigas so maliket ya ontulong ed sikayo ed saya.
4. Antoy mangipapabitar ed kaimportantian na pamawil-pawil ed saray agnasasabi ed abung?
4 Ipapabitar na sakey ya inkagawa so kaimportantian na panggunaet a nakatongtong iramay agnasasabi ed abung. Kayari na taloy taon a paulit-ulit ya impawil na saray manangipalapag ed sakey ya abung, akatongtong dan siansia so unabung. Naamtaan a sikatoy tumalaran ed saray Tasi ya ondalaw pian nituloy toy panaral na Biblia a nigapo to antis ya inmalis ed satan a lugar.
5. Kapigan a nibagan asumpal so teritorya?
5 Kobrian so Teritorya: Kapigan a nibagan akobrian so teritorya? Kaslakan et no agawaan la so makatunongan iran sagpot pian walay nakatongtong ed kada abung. Nayarin matukoy so maalwar a pangitilak na sakey a tract odino daan a magasin ed saray agnasabi ed abung, nagkalautla diad saray teritoryan matalag a nakikimeyan. Nepeg a nasumpal so teritorya ed loob na apat bulan. Insan nepeg ya ipawil itan ed mangaasikasoy teritorya ta pian napasimbalo to met iray rekord to.
6. Akin a nepeg tayon panggunaetan a napakabatan na maong a balita so amin diad teritorya tayo?
6 Labay tayo a mas dakel ni no posible iray totoon nawalaan na pankanawnawan makaaral ya ontawag ed ngaran nen Jehova tan nilaban. (Roma 10:13, 14) Kabiangan ed saya iramay agtayo nasasabi ed abung da no mankakabkaabungan tayo. Singa si apostol Pablo, pilaleken so ‘panamatua [odino sigpot a pantasi] ed ebanghelyo na grasya na Dios.’—Gawa 20:24.