“Nepeg Kasin Onalis Ak?”
1 Bilang ebat ed ganggan nen Jesus ya “onla kayo . . . manggawa kayo na saray babangatan ed amin a nasyones,” dakel a dedikadon lingkor nen Jehova so inmalis pian manlingkor ed kawalaay babaleg a pankaukolan. (Mat. 28:19) Aaligen day Pablo, a kinmiwas ed tawag a: “Gala ed Macedonia et tulongan mo kami.” (Gawa 16:9) Panon iyan nagawaan ed praktikal a paraan?
2 Sansakeyen ya Igapo: Kasin walay matalag a nakikimeyan a teritorya ed kongregasyon yo? No wala, iyapasakey yo nin kimeyan iratan. Sakbay ya onla ed sananey a pasen, ipanon ni ed saray mamatatken pian seguroen da no sarag yo lay onalis. Nayarin itepet yo met ed manangasikaso na sirkito no walay amta ton asingger a kongregasyon a ditan yo napalaknab so ministeryo yo. Diad biek a dapag, kayari maalwar ya impankuenta, sarag yo lay ontulong ed arum a parti na bansa odino ed sananey a bansa. No ontan so pilalek yo, sikayo tan say ulop na mamatatken so nepeg a mansulat ed sangan opisina no iner so labay yon panlingkoran, ya idatak so teokratikon kipapasen yo. Magmaong no bisitaen yoy lugar sakbay kayon mandesidi no kasin mansiansia kayo ditan odino andi.
3 Manalwar Nipaakar ed Panayam Ditan: Ondarakel so agagin onaalis ed arum a daldalin lapud panaanap da na kaabigay bilay odino pakapaliis manlapud panamairap. Balet, pigara so apatitan na saray andiay prinsipyon totoo ya angisipan ya ontulong ed sikaran makapanpirmi ed balon bansa balet ta kinatkatan da ra insan da ra imbatikan. Wala ni ingen iray kipapasen a papaskaren na sarayan totoo iray immigrant pian mantrabaho ed imoral a paraan. Sano agda labay, sikara lay walad pakayari na bansan nila ra. Diad ontan et lalon onloor so kipapasen na saray immigrant nen say dia ed dilin bansa ra. Nayarin mipundo ira ed saray agagi insan patulongan nira, a magmaliw iran pabelat ed arum a Kristianon pamilya a mantatalikarkar ed dili ran problema tan kairapan. Mansisian iray membro na pigaran sankaabungan, tan onkapuy ed espiritual iray pamilya lapud satan ya agmakabat a desisyon.—1 Tim. 6:8-11.
4 No labay yoy onalis lapud dilin pankaabigan, nodnonoten ya anggan iner so panayaman yo et walaray problema. Mas mainomay a natalonaan iray problema ed lugar ya amta yo la so lenguahe tan kultura, imbes ya onggapo lamet ed agkabisado iran kaliberliber.